ބާރ ކައުންސިލްގެ ރައީސްކަމަށް ވިޝާމް އިންތިޚާބުކޮށްފި

ބާރ ކައުންސިލްގެ ދެވަނަ ދައުރުގެ ރައީސަކަށް ކުރީގެ އެސިސްޓެންޓް އެޓަރނީ ޖެނެރަލް އިސްމާއީލް ވިޝާމް އިންތިޚާބުކޮށްފިއެވެ.

އޭނާ މި މަގާމަށް އިންތިޚާބުކޮށްފައިވަނީ ހޮނިހިރު ދުވަހު ނެގި ވޯޓުންނެވެ. ވިޝާމާއެކު އެ މަގާމަށް ވާދަކުރެއްވީ ބާރ ކައުންސިލްގެ އެގްޒެކެޓިވް ކޮމިޓީގައި ހިމެނިވަޑައިގަންނަވާ މުހައްމަދު ފައިސަލެވެ.

ކައުންސިލްގެ ނައިބަކަށް އިންތިޚާބުކޮށްފައިވަނީ މިޒްނާ އަހުމަދުއެވެ. އެމަގާމަށް އޭނާ އެކަނި ކުރިމަތިލެއްވުމުން ނެގީ ފެންނަ ނުފެންނަ ވޯޓެކެވެ.

ބާރ ކައުންސިލްގެ އެގްޒެކެޓިވް ކޮމިޓީގެ 6 މަގާމަކަށް 5 ބޭފުޅަކު ކުރިމަތިލެއްވިއެވެ. ނަމަވެސް ފެންނަ ނުފެންނަ ވޯޓުން އިންތިޚާބުވީ އެންމެ 3 ބޭފުޅުންނެވެ. އެގޮތުން، މި މަގާމަށް އިންތިޚާބުވީ ކޮމިޓީގައި މިހާރުވެސް ހިމެނިވަޑައިގަންނަވާ ކުރީގެ ޕްރޮސެކިއުޓަރ ޖެނެރަލް އަހުމަދު މުއިއްޒުއާއި އިބްރާހިމް ޝަމީލްއާއި ސާދިހު ނަސީރެވެ.

ބާރ ކައުންސިލްގެ ދެވަނަ ދައުރަށް ރައީސާއި ނައިބު ރައީސް އަދި އެގްޒެކެޓިވް ކޮމިޓީއަށް ބޭފުޅުން އިންތިޚާބުކޮށްފައި މިވަނީ އެ ކައުންސިލްގެ ފުރަތަމަ ދައުރު އަންނަ ޖުލައި މަހުގެ 13 ވަނަ ދުވަހަށް ހަމަވާތީއެވެ.

ބާރ ކައުންސިލްގެ ފުރަތަމަ ދައުރުގެ ރައީސަކީ މައުމޫން ހަމީދެވެ. އަދި ނައިބު ރައީސަކީ ކުރީގެ އެޓަރނީ ޖެނެރަލް އަބްދުﷲ މުއިއްޒުއެވެ.