ޕުޔޯލްގެ ނަޒަރުގައި ވޯލްޑްކަޕްގެ ފޭވަރައިޓުންނަކީ ފްރާންސް

މިއަހަރު ގަތަރުގައި އޮންނަ ވޯލްޑްކަޕުގައި (އޭނާ ދެކޭ ގޮތުގައި) ފޭވަރައިޓުންނަކީ ފްރާންސް ކަމަށް، ބާސެލޯނާ އަދި ސްޕެއިންގެ ލެޖެންޑް ކާލެސް ޕުޔޯލް ބުނެފިއެވެ.

ޕުޔޯލް ބުނީ އޭނާގެ ނަޒަރުގައި ފްރާންސް ފޭވަރައިޓުންނަށްވާ ސަބަބަކީ އެ ޓީމުގެ ސްކޮޑުގައި ވަރުގަދަ ކުޅުންތެރިން ތިބުމެވެ. އަދި އެއީ ހުނަރުވެރި އެތައް ކުޅުންތެރިންކަން ޕުޔޯލް ފާހަގަކުރިއެވެ. ޕުޔޯލް ބުނީ ގޮތުގައި ފްރާންސަކީ އެންމެ ފަހުގެ ޗެމްޕިއަނުންނަށް ވުމުން، މިއަހަރު އެމީހުން ނިކުންނާނީ މުޅިން ތަފާތު ރޫހެއްގައިކަމަށެވެ. ފްރާންސުން ވަނީ އެންމެ ފަހުން 2018 ވަނަ އަަހަރު ރަޝިޔާގައި އޮތް ވޯލްޑް ކަޕް ކާމިޔާބުކޮށްފައެވެ. އެއަހަރުގެ މުބާރާތް އެ މީހުން ކާމިޔާބުކުރީ ފައިނަލުގައި ކްރޮއޭޝިއާގެ މައްޗަށް 2-4ން ކުރި ހޯދައިގެންނެވެ.

މީގެ އިތުރުން ޕުޔޯލް ބުނީ ފްރާންސްގެ އިތުރުން ވަރުގަދަ އެހެން ޓީމުތައްވެސް އުޅޭކަމަށެވެ. އޭގެ ތެރެއިން އޭނާއަށް ގަބޫލުކުރެވޭ ގޮތުގައި ސްޕެއިނަކީ އެއް ޓީމުކަމަށެވެ. ޕުޔޯލް ބުނީ ސްޕެއިންއަށް ރަނގަޅު ރޯލެއް އަދާކުރެވިދާނެކަމަށެވެ. ނަމަވެސް ޕުޔޯލް ބުނީ އޭނާ ސްޕެއިންއަކީ ފޭވަރައިޓުންގެ ގޮތުގައި ނުދެކޭކަމަށެވެ. ސަބަބެއްގެ ގޮތުގައި އޭނާ ބުނީ ސްޕެއިނަށް ޕްރެޝަރ ހޭންޑަލްކުރަން ނޭނގެނީކަމަށެވެ. ނަމަވެސް ޕުޔޯލް ބުނީ ސްޕެއިންގައި ޒުވާން، ކޮލިޓީހުރި ސްކޮޑެއް އޮތްކަމަށެވެ.

ނޮވެމްބަރުން ޑިސެމްބަރަށް ކުރިއަށްދާ ވޯލްޑްކަޕްގައި ވާދަކުރާނެ ޓީމުތައް މިހާރު ވަނީ ފައިނަލްވެފައެވެ. މިއަހަރުގެ ވޯލްޑްކަޕުގައި އެކި މީހުން ފޭވަރައިޓުންގެ ގޮތުގައި ކަނޑައަޅަނީ އެކި ޓީމެވެ. އޭގެ ތެރޭގައި އެންމެ ފަހުގެ ޗެމްޕިއަން ފްރާންސް، އެންމެ ގިނަ ފަހަރު ކާމިޔާބުކޮށްފައިވާ ބްރެޒިލްގެ އިތުރުން، އިންގްލެންޑު، އާޖެންޓީނާ އަދި ސްޕެއިން ހިމެނެއެވެ.