އެމްޓީޑީސީ އިން ފާސްކުރީ ހިއްސާއަކަށް 60 ލާރި ބަހަން
2021 ވަނަ އަހަރު އެ ކުންފުންޏަށް ބޮޑު ފައިދާއެއް ލިބިފައިވޭ
އެމްޓީޑީސީގެ އަހަރީ އާންމު ޖަލްސާއެއް
މޯލްޑިވްސް ޓުއަރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ)އިން ހިއްސާއަކަށް 60 ލާރި ބަހަން ފާސްކޮށްފިއެވެ.
އެކުންފުނީގެ ހިއްސާއަކަށް 60 ލާރި ބަހަން ފާސްކޮށްފައިވަނީ އެކުންފުނީގެ އަހަރީ އާންމު ޖަލްސާގައެވެ.
މިދިޔަ އަހަރު އެމްޓީޑީސީއަށް ވަނީ ރެކޯޑު އަދަދެއްގެ ބޮޑު ފައިދާއެއް ލިބިފައެވެ. މިގޮތުން އެކުންފުނީގެ ސާފު ފައިދާ 211.8 މިލިއަން ރުފިޔާއަށް އަރައެވެ. 2020 ވަނަ އަހަރު އެކުންފުންޏަށް ސާފު ފައިދާގެ ގޮތުގައި ލިބިފައިވަނީ 50.8 މިލިއަން ރުފިޔާއެވެ. މިގޮތުން 2020 ވަނަ އަހަރާ އަޅާ ބަލާއިރު އެކުންފުންޏަށް ލިބުނު ސާފު ފައިދާ ވަނީ 160 މިލިއަނުން ބޮޑުވެފައެވެ.
2021 ވަނަ އަހަރު ލިބުނު ބޮޑު ފައިދާއާއެކު ހިއްސާއަކަށް 60 ލާރި ބަހަން ނިންމާފައިވާއިރު، 2020 ވަނަ އަހަރު އެކުންފުނިން ވަނީ ހިއްސާއަކަށް 50 ލާރި ބަހަން ފާސްކޮށްފައެވެ.
އެމްޓީޑީސީން ބުނިގޮތުގައި ފާއިތުވި އަހަރު އެކުންފުންޏަށް ލިބުނު ސާފު ފައިދާ އިތުރުވެފައިވަނީ ކުންފުނިން ކުއްޔަށް ދޫކޮށްފައިވާ ރަށްތަކުގެ ކުލީގެ މުއްދަތު އިތުރުކޮށްދިނުމުންނެވެ.
އެމްޓީޑީސީގެ އަހަރީ އާންމު ޖަލްސާގައި ވަނީ ޑިރެކްޓަރުންގެ ބޯޑުގައި އާންމު ހިއްސާދާރުން ތަމްސީލުކުރާ 5 ޑިރެކްޓަރުން އިންތިޚާބުކޮށްފައެވެ. އަދި ކުންފުނީގެ އޮޑިޓަރެއްގެ ގޮތުގައި ކޭޕީއެމްޖީ ހަމަޖެއްސުމަށް ފާސްކޮށްފައިވެއެވެ.
އެމްޓީޑީސީއަކީ މީގެ ކުރިން ގެއްލުމުގައި ހިންގާފައިވާ ކުންފުންޏެކެވެ. އެކުންފުނި ނަގާ ކޮޅަށް ޖެހުމަށް ކޮށްފައިވާ ގިނަ މަސައްކަތްތަކާއެކު މިހާރު އެކުންފުނި ހިންގަމުން ދަނީ ފައިދާގައެވެ. ކުރިއަށް އޮތް ތަނުގައި އެކުންފުންޏަށް ލިބޭ ފައިދާ ބޮޑުކުރުމަށް މަސައްކަތްކުރައްވާނެ ކަމަށް އެކުންފުނީގެ މެނޭޖިން ޑިރެކްޓަރ ތަޒްމީލް އަބްދުއްސަމަދު ވިދާޅުވިއެވެ.
