ބަށިބޯޅަ ފައުންޑޭޝަނުން ބާއްވާ، ހދ އަތޮޅު ބަށިބޯޅަ ލީގު 4 ޓީމާއެކު ބުރާސްފަތި ދުވަހު ފަށައިފިއެވެ.

ދެއަހަރުގެ މެދުކެނޑުމަކަށްފަހު މިއަހަރު ބަށިބޯޅަ ލީގު ކުޅުދުއްފުށީގައި ބާއްވާއިރު މި ލީގުގައި ބައިވެރިވެފައިވަނީ ކުޅުދުއްފުށި ދެޓީމާއި ނޭކުރަންދޫ އަދި ނެއްލައިދޫގެ ޓީމެވެ. ބުރާސްފަތި ދުވަހު ހަވީރު ކުޅުދުއްފުށި ސްޓޭޑިއަމްގެ އެރީނާގައި ބޭއްވި ހާއްޞަ ރަސްމިއްޔާތުގައި މި ލީގު ހުޅުއްވާ ދެއްވީ ބަށިބޯޅަ ފައުންޑޭޝަންގެ ރައީސާ ސިޔާމާއާއި ކުޅުދުއްފުށި މޭޔަރު މުހައްމަދު އާތިފްއެވެ.

މުބާރާތުގެ ފުރަތަމަ މެޗްގައި ކުޅުދުއްފުށި ކޮރަލް އަދި ނޭކުރަންދޫ ޓީމް ބައްދަލުކޮށް 15 ލަނޑު 28 ލަޑުން މެޗް ކާމިޔާބުކުރީ ކޮރަލް ޓީމުންނެވެ. މިމެޗްގެ ބަށި ކުއީންއަކަށް ހޮވިފައިވަނީ ކޮރަލް ޓީމްގެ ޖާރޒީ ނަންބަރ 4 އާސިމާ އާދަމްއެވެ. އެންމެ ގިނަ ބޯޅަ ހިފައިގެން އެންމެ ގިނަ ޕޮއިންޓް ލިބުނު ކުޅުންތެރިއަކަށް ހޮވިފައިވަނީ ކޮރަލް ޓީމްގެ ޖާރޒީ ނަންބަރ 1 އައިމިނަތު ހަސަންއެވެ. އޭނާއަށް 76 ޕޮއިންޓް ލިބިފައިވެއެވެ. އަދި އެންމެ ގިނަ ބޯޅަ ޖަހައިގެން އެންމެ ގިނަ ޕޮއިންޓް ހޯދި ކުޅުންތެރިއަކަށް ހޮވިފައިވަނީ ކޮރަލް ޓީމްގެ ޖާރޒީ ނަންބަރ 4 އާސިމާ އާދަމްއެވެ. އޭނާއަށް 92 ޕޮއިންޓް ލިބިފައިވެއެވެ.

މިމުބާރާތުގައި ރޭ ކުޅުނު މެޗްގައި ބައްދަލުކުރީ ކުޅުދުއްފުށި ހިރަފުސްޓީމާއި ނެއްލައިދޫ ޓީމްއެވެ. މިމެޗް 21 ލަނޑު 10 ފޯލި އަދި 27 ލަނޑު 10 ފޯލިން ކާމިޔާބުކުރީ ނެއްލައިދޫ ޓީމެވެ. މިމެޗްގެ ބަށި ކުއީންއަކަށް ހޮވިފައިވަނީ ނެއްލައިދޫ ޓީމްގެ ޖާރޒީ ނަންބަރ 6 އައިޝަތު ރަޝީދާއެވެ. އެންމެ ގިނަ ބޯޅަ ޖަހައިގެން އެންމެ ގިނަ ޕޮއިންޓް ހޯދި ކުޅުންތެރިއަކަށް ހޮވިފައިވަނީ ވެސް އައިޝަތު ރަޝީދާއެވެ. އޭނާއަށް 130 ޕޮއިންޓް ވަނީ ލިބިފައެވެ. އަދި އެންމެ ގިނަ ބޯޅަ ހިފައިގެން ގިނަ ޕޮއިންޓް ހޯދި ކުޅުންތެރިއަކަށް ހޮވިފައިވަނީ ނެއްލައިދޫ ޓީމްގެ ޖާރޒީ ނަންބަރ 8 ސަހާމާ އިބްރާހިމްއެވެ. އޭނާއަށް 48 ޕޮއިންޓްވަނީ ލިބިފައެވެ.

މިމުބާރާތުގެ 4 މެޗް މިއަދު ހަވީރާއި ރޭގަނޑު ކުޅުމަށްވަނީ ހަމަޖެހިފައެވެ.