އިންޓަރ އޮފީސް ބެޑްމިންޓަން ޗެލެންޖުގެ ޗެމްޕިއަންކަން ދިރާގު އަދި ޕޮލިސް

އެމްޕީއެލް ޑަބްލިއުއެސްއީ އިންޓަރ އޮފީސް ބެޑްމިންޓަން ޗެމްޕިއަންޝިޕު 2022 ގެ އަންހެން ޑިވިޝަންގެ ޗެމްޕިއަންކަން ދިރާގު އަދި ފިރިހެން ޑިވިޝަންގެ ޗެމްޕިއަންކަން ކުޅުދުއްފުށި ޕޮލިސް ހޯދައިފިއެވެ.

ބުރާސްފަތި ދުވަހު މެންދުރުފަހު ކުޅިދުއްފުށީ ޔޫތު ސެންޓަރުގައި ކުޅުނު އަންހެން ޑިވިޝަނުގެ ފައިނަލުގައި ބައްދަލުކޮށްފައިވަނީ ކުލަބް އިމިގްރޭޝަނާއި ދިރާގެވެ. މެޗުގެ ފުރަތަމަ ގޭމުގައި ދިރާގުގެ ޝައުޒާ އިބްރާހިމާއި ޒުހުދާ ހަސަންގެ ޕެއާއިން ވަނީ އިމިގްރޭޝަނުގެ އައިޝަތު ޒޫނާއާއި ދީމާ ރަޝީދުގެ ޕެއާ 2 ސެޓު 1 ސެޓުން ބަލިކޮށްފައެވެ. ދެވަނަ ގޭމުގައި ދިރާގުގެ މަރިޔަމް ޝަފާހަތު ވަނީ އިމިގްރޭޝަނުގެ ފަދުވާ ޒާހިރު ސީދާ 2 ސެޓުން ބަލިކޮށްފައެވެ. ފުރަތަމަ ސެޓު ޝަފާހަތު ގެންދިޔައީ 21 - 6 ންނެވެ. އަދި ދެވަނަ ސެޓު ގެންދިޔައީ 21 - 13 ންނެވެ. ތިންވަނަ ގޭމުގައި އިމިގްރޭޝަނުގެ ފަދުވާ ޒާހިރާ ދީމާ ރަޝީދުގެ ޕެއާ ސީދާ 2 ސެޓުން ދިރާގުގެ ޒުހުދާ ހުސެއިނާ އާމިނަތު އަލީގެ ޕެއާއިން ވަނީ ބަލިކޮށްފައެވެ.

ފިރިހެން ޑިވިޝަންގެ ޗެންޕިއަންކަން ޕޮލިސް ޓީމް ހޯދީ ކަސްޓަމްސް ޓީމާ ވާދަކޮށްގެނެވެ. މެޗުގެ ފުރަތަމަ ގޭމު ޕޮލިހުގެ ވަސީމްއާއި ޖާވިޒުގެ ޕެއާއިން ހޯދީ ކަސްޓަމްސްގެ އިފްޒަލްއާއި ނަޝީދުގެ ޕެއާ ބަލިކޮށްގެންނެވެ. މިގޭމު އެޓީމުން ކާމިޔާބުކުރީ 2 ސެޓު 1 ސެޓުންނެވެ. ދެވަނަ ގޭމު ސީދާ 2 ސެޓުން ކަސްޓަމްސްގެ އަހްމަދު އަލީ ބަލިކޮށް ހޯދީ ކޭސީޕީގެ ވަސީމްއެވެ. އެހެންނަމަވެސް ތިންވަނަ ގޭމުގައި ކަސްޓަމްސްގެ މުހައްމަދު އާދަމްއާއި ނަޝީދުގެ ޕެއާއިން ވަނީ ޕޮލިހުގެ ޕެއާ ބަލިކޮށްފައެވެ.

ހަތަރުވަނަ ގޭމުގައި ކަސްޓަމްސްގެ އަލީ ރަޝީދު ވަނީ ޕޮލިހުގެ ހުޝާމް އަތުން 2 ސެޓު 1 ސެޓުން ބަލިވެފައެވެ. ފަސްވަނަ ގޭމުގައި ކަސްޓަމްސްގެ އިފްޒަލްއާއި މުހައްމަދު ލުތުފީގެ ޕެއާއިން ވަނީ ސީދާ 2 ސެޓުން ޕޮލިހުގެ ޕެއާ ބަލިކޮށްފައެވެ. ފަހު ގޭމުގައި ކޭސީޕީގެ ޖާވިޒް ވަނީ ސީދާ ދެ ސެޓުން ކަސްޓަމްސްގެ އިބްރާހިމް ޝަރީފް ބަލިކޮށްފައެވެ.

މުބާރާތުގެ ފިރިހެން ޑިވިޝަނުގެ ޗެމްޕިއަން ޓީމަށް 5000 ރުފިޔާގެ ފައިސާގެ އިނާމު އަދި ޓްރޮފީ ހަވާލުކޮށްފައިވާއިރު ރަނަރަޕް ޓީމަށް ވަނީ ފައިސާގެ އިނާމުގެ ގޮތުގައި 2000 ރުފިޔާ އަދި ޓްރޮފީ ހަވާލުކޮށްފައެވެ. އަންހެން ޑިވިޝަނުގެ ރަނަރަޕް ޓީމަށް ވަނީ 1500 ރުފިޔާގެ ފައިސާގެ އިނާމު އަދި ޓްރޮފީ ހަވާލުކޮށްފައެވެ. އަދި ޗެމްޕިއަން ޓީމަށް ވަނީ 4000 ރުފިޔާގެ ފައިސާގެ އިނާމުގެ އިތުރުން ޓްރޮފީ ހަވާލުކޮށްފައެވެ.