ލިވަޕޫލްގެ ފޯވާޑް ޑިވޯކް އޮރިގީ މިއަންނަ ސީޒަންގައި އޭސީ މިލާނަށް ބަދަލުވުން ގާތްކަމަށް ރިޕޯޓުތައް ބުނެފިއެވެ.

ލިވަޕޫލްއާއެކު އޮރިގީ ހަދާފައިވާ އެއްބަސްޗުމުގެ މުއްދަތު މިމަހުގެ ނިޔަލަށް ހަމަވާނެއެވެ. ލިވަޕޫލްގައި އެކަށީގެންވާ ވަރަށް މެޗުތައް އޮރިގީއަށް ކުޅެވިފައި ނުވާއިރު، މި ސީޒަނަށްފަހު އޭނާ ކްލަބުގައި ނުހުންނާނެކަމަށް ޓީމުގެ ކޯޗު ޔާގަން ކްލޮޕް ވަނީ ބުނެފައެވެ.

2015 ވަނަ އަހަރު ލިވަޕޫލްއާ ގުޅުނު ފަހުން އޮރިގީ ވަނީ މޮޅު ކުޅުމެއް ދައްކާފައެވެ. އަދި ޓީމަށް މުހިންމު ލަނޑުތަކެއްވެސް އޮރިގީ ކާމިޔާބު ކޮށްދިނެވެ. މީގެ ތެރޭގައި ޔުއެފާ ޗެމްޕިއަންސް ލީގުގެ ސެމީ ފައިނަލުގައި ބާސެލޯނާގެ ފަހަތުން އަރާ މޮޅުވި މެޗުގައި އޭނާ ޖެހި ދެލަނޑު ފާހަގަކުރެވެއެވެ. އަދި 2019 ވަނަ އަހަރު އެވަޓަންއާ ބައްދަލުކުރި މެޗުގެ ފަހު ވަގުތު ލަނދުޖަހާ އޭނާ ވަނީ ޓިމު މޮޅުކޮށްދީފައެވެ.

ނަމަވެސް މިފަހުން އޭނާއަށް ޓީމުގައި އެދެވޭ ވަރުގެ ކުޅުމެއް ދެއްކިފައެއް ނުވެއެވެ. މިއާއެކު މި ސީޒަން ނިންމުމަށްފަހު އޭނާ ލިވަޕޫލްއާ ވަކިވާއިރު، އޮރިގީ ދިއުން އެންމެ ގާތީ އިޓަލީގެ މިލާނަށް ކަމަށް ރިޕޯޓުތައް ބުނެއެވެ.

އޮރިގީ ވަނީ ލިވަޕޫލްގައި 107 މެޗު ކުޅެ 22 ލަނޑު ޖަހާފައެވެ. ކްލޮޕް ބުނީ އޭނާ ގަބޫލުކުރާ ގޮތުގައި ޓީމުން ވަރުގަދަ ފެއާވެލްއެއް އޮރިގީއަށް ދޭން ޖެހޭނެ ކަމަށެވެ.