ކާޑުގެ ބާވަތްތަކާއި ތެލާއި ބޭސް, ދަތިނުވެ ގަންނަވަރަށް ފައިސާ ހުންނާނެކަމުގެ ޔަގީންކަން ދެއްވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

ނޫސްވެރިންނާ ބައްދަލު ކުރައްވައި ރައީސް ވިދާޅުވީ، ކާޑުގެ ބާވަތްތަކާއި ތެލާއި ބޭސް، ދަތިނުވެ، ކުރިއަށް އޮތް މަސްތަކުގައި ގަންނާނެވަރަށް ފައިސާ ހުންނާނެ ކަމުގެ ޔަގީންކަން ރައްޔިތުންނަށް ދެއްވާކަމަށެވެ. އަދި ޔޫޒެބްލް ރިޒަރވް އެންމެ ގިނައިން ހުރި އެއް އަހަރަށް މިއަހަރު ވާނެކަމަށްވެސް އެމަނިކުފާނު ވިދާޅުވިއެވެ.

ރައީސް އިތުރަށް ވިދާޅުވީ، ދައުލަތަށް ބޭނުންވާ އަސާސީ ތަކެތި ފޯރުކޮށްދޭ އެސްޓީއޯއަށް ފައިނޭންޝަލް ކެޕޭސިޓީ ފޯރުކޮށްދީފައިވާ ކަމަށެވެ. އެސްޓީއޯއިން އެ ބާވަތްތައް ދަތިނުވެ އިމްޕޯޓް ކުރެވޭނެ ކަމަށްވެސް ރައީސް ވިދާޅުވިއެވެ.

އިސްލާމިކް ޓްރޭޑް ފައިނޭންސް ކޯޕަރޭޝަން (އައިޓީއެފްސީ)ން ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އަށް ފޯރުކޮށްދީފައިވަނީ 175 މިލިއަން ޑޮލަރުގެ ޓްރޭޑް ފައިނޭންސިންގއެކެވެ.

އައިޓީއެފްސީގެ މުރާބަހާ ޓްރޭޑް ފައިނޭންސިންގގެ އެއްބަސްވުމުގައި އެންމެ ފުރަތަމަ އެސްޓީއޯއިން ސޮއިކޮށްފައިވަނީ 2019 ވަނަ އަހަރުގެ އޮކްޓޯބަރު މަހުއެވެ. 2019 ވަނަ އަހަރަށްފަހު އައިޓީއެފްސީން އަންނަނީ ކޮންމެ އަހަރަކުވެސް އެސްޓީއޯއަށް އެހީތެރިކަން ފޯރުކޮށްދެމުންނެވެ.

މި ފެސިލިޓީގެ ދަށުން މިއަހަރު 175 މިލިއަން ޑޮލަރު ރާއްޖެއަށް ދިނުމަށް އެއްބަސްވެފައިވާއިރު، މި އެއްބަސްވުމުގައި ސޮއިކޮށްފައިވަނީ މިސްރުގައި މިހާރު ކުރިއަށްދާ އައިއެސްޑީބީ 2022 އަހަރީ ބައްދަލުވުމުގެ ތެރެއިންނެވެ. އެސްޓީއޯގެ ފަރާތުން އެއްބަސްވުމުގައި ސޮއިކުރެއްވީ ސީއީއޯ އަދި މެނޭޖިންގ ޑިރެކްޓަރު ހުސެއިން އަމްރެވެ. އައިޓީއެފްސީގެ ފަރާތުން އެއްބަސްވުމުގައި ސޮއިކުރެއްވީ ސީއީއޯ ހާނީ ސާލެމް ސޮންބޮލްއެވެ. މި ރަސްމިއްޔާތުގައި ފިނޭންސް މިނިސްޓަރު އިބްރާހިމް އަމީރު ވަނީ ބައިވެރިވެވަޑައިގެންފައެވެ.

މި ޓްރޭޑް ފައިނޭންސިންގެ ތެރެއިން އެސްޓީއޯއިން ރާއްޖެއަށް ބޭނުންވާ އަސާސީ މުދާ ގެންނާނެއެވެ. މީގެތެރޭގައި ތެލާއި، އަސާސީ ކާނާގެ ބާވަތްތަކާއި، ބޭހާއި، ސިއްހީ ދާއިރާއަށް ބޭނުންވާ އެކި އާލާތްތައް ހިމެނެއެވެ.

އެސްޓީއޯއިން ގެންދަނީ ރާއްޖެއަށް ކޮންމެހެން ބޭނުންވާ ތަކެތި މެދުކެނޑުމެއްނެތި ލިބޭނެކަމުން ޔަގީންކުރަމުންނެވެ. ކޮވިޑް-19ގެ ހާލަތުގައިވެސް ރާއްޖެއަށް ބޭނުންވާ ކާނާއާއި ބޭހާއި އަދި މިނޫންވެސް ތަކެތި މެދުކެނޑުމެއްނެތި ފޯރުކޮށްދިނުމަށް އެސްޓީއޯއިން ވަނީ މަސައްކަތްކޮށްފައެވެ.

2021 ވަނަ އަހަރު ގޮންޖެހުންތަކެއް ކުރިމަތިވިނަމަވެސް އެކުންފުނިން ވަނީ ކުންފުނީގެ ތާރީޚުގައި ހޯދާފައި ނުވާވަރުގެ ބޮޑު ކާމިޔާބީއެއް ހޯދާފައެވެ. 2021 ވަނަ އަހަރު އެ ކުންފުންޏަށް 10.1 ބިލިއަން ރުފިޔާ ލިބިފައިވާއިރު، ސާފު ފައިދާގެގޮތުގައި 478.5 މިލިއަން ރުފިޔާ ވަނީ ލިބިފައެވެ.

ރައީސް މިހެން ވިދާޅުވެފައިވާއިރު ކާޑުގެ ބާވަތްތަކާއި ތެލާއި ބޭސް ދަތިވެދާނެކަމަށް ބުނެ ބައެއް ފަރާތްތަކުން ދަނީ އާންމުންގެ ހިތްތަކުގައި ބިރުވެރިކަން އުފައްދަމުންނެވެ. ރާއްޖޭގެ އިގުތިސާދާ ގުޅޭގޮތުން އޮޅުންއަރާގޮތަށް ވާހަކަތައް ފަތުރަމުންދާއިރު، އެބަޔަކު އެކަން އެ ކުރަނީ ސިޔާސީ ބޭނުމެއްގައިކަން ވެސް ރައީސް ފާހަގަކުރެއްވިއެވެ.