ލައިޓެއް ނުދިއްލިގެން މިނިސްޓަރު މަޖިލީހަށް ގެނައުން ނިމުމަކަށް ގެންނަން ޖެހޭ ކަމަށް މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޚްލޫފް ވިދާޅުވެއްޖެއެވެ.

ޔޫތު މިނިސްޓަރު މިހެން ވިދާޅުވީ، މާވަށު ދާއިރާގެ މެންބަރު މުޙައްމަދު ސަޢީދު ކުރެއްވި ސުވާލަަށް މަޖިލީހުގައި ޖަވާބުދެއްވަމުންނެވެ.

ސައީދު ކުރެއްވި ސުވާލަކީ، ލ.މާވަށުގެ ފުޓްސެލް ދަނޑުގެ ޓާފް އެއްކޮށް ހަލާކުވެފައިވާތީ މިކަން ހައްލުކޮށްދެވޭނީ ކޮންއިރަކުތޯ އާއި، މާވަށުގެ 2 ވޮލީ ކޯޓާއި ފުޓްސެލް ދަނޑުގެ ލައިޓުތައް ހަލާކުވެ ނުދިއްލޭތީ ލައިޓުތައް އަލުން ޖަހައިދެވޭނީ ކިހާތާކުތޯއެވެ. މީގެ އިތުރުން މާވަށުގެ ޔޫތު ސެންޓަރު މަރާމާތުކުރުމުގެ މަސައްކަތް ފެށޭނީ ކޮން ދުވަހަކުތޯއެވެ.

ސުވާލަށް ޖަވާބު ދެއްވަމުން މިނިސްޓަރު މަހުލޫފު ވިދާޅުވީ، ކައުންސިލުން ފުޓްސަލް ދަނޑުގެ މަރާމަތުގެ ރިކުއެސްޓް އައިސްފައި އެބައޮތް ކަމަށާއި، އެކަމަށް ބަޖެޓް ކުރެވިފައި ނެތް ކަމަށެވެ. އެހެން ނަމަވެސް އެކަން ކުރެވޭނެ ގޮތެއް އޮތްތޯ ބައްލަވާނެކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ، ދަނޑުތަކުގެ ލައިޓެއް ނުދިއްލިގެން މިނިސްޓަރާއި ހިސާބަށް އެކަން ގެނެސް މަޖިލީހުގެ ތަޅުމުގައި ލައިޓަކާ ގުޅޭގޮތުން ކުރެވޭ ސުވާލުތަކަށް ނިމުމެއް އަންނަން ޖެހޭ ކަމަށެވެ. އަދި ރަށްރަށުގެ ދަނޑުތަކުގެ މައްސަލައަކީ ކައުންސިލްތަކަށްވެސް ހައްލު ކުރެވޭވަރުގެ މައްސަލައެއް ކަަމަށެވެ.

މިނިސްޓަރު ވިދާޅުވީ، މިފަަދަ ކަންކަން ހައްލު ކުރުމަށް މިނިސްޓްރީންވެސް ވީވަރަކުން މަސައްކަތް ކޮށްދެމުންދާ ކަމަށެވެ. މިނިސްޓަރު ވިދާޅުވީ، ކައުންސިލްތަކަށް ބަޖެޓް އިތުރުކޮށްގެން ނަމަވެސް މިކަހަލަ ކުދިކުދި ކަންކަން ހައްލު ކުރުމަށް މިނިސްޓަރާއި ހިސާބަށް އައުން ނިމުމަކަށް ގެންނަން ޖެހޭ ކަމަށެވެ. މިފަދަ ކަންކަމަކީ ކައުންސިލްތަކުން ހަމަޖެއްސޭނެ ކަންކަން ކަމަށް މިނިސްޓަރު ވިދާޅުވިއެވެ.

ޒުވާނުންގެ މަރުކަޒުތައް މިހާރު ކައުންސިލްތަކަށް ހަވާލުކުރެވިފައިވާ ކަމަށާއި، ބައެއް ކައުންސިލްތަކުން އެތަންތަން ރަނގަޅަށް ނުހިންގޭތީ މިހާރު މިނިސްޓްރީއާ ހަވާލު ކުރަމުން އަންނަކަންވެސް ޔޫތު މިނިސްޓަރު ފާހަގަކުރެއްވިއެވެ.