އައްޑޫ މާރާމާރީއާ ގުޅިގެން ހައްޔަރުކުރި 15 އަހަރުގެ ކުއްޖާގެ ބަންދަށް 10 ދުވަސް ޖަހައިފި
މި މައްސަލައިގައި 18 އަހަރު ނުފުރޭ ދެ ކުއްޖަކު ވަނީ ހައްޔަރުކޮށްފައި
އައްޑޫ ސިޓީ، ފޭދޫ
ސ. ފޭދޫގައި ތޫނު އެއްޗަކުން ހަމަލާދީ މީހަކު ޒަޚަމްކޮށްލި މައްސަލައާ ގުޅިގެން ހައްޔަރުކުރި އުމުރުން 15 އަހަރުގެ ކުއްޖާގެ ބަންދަށް 10 ދުވަސް ޖަހައިފިއެވެ.
މިދިޔަ ބުދަ ދުވަހުގެ ރޭގެ މެންދަމު ފޭދޫގައި ހިންގި މާރާމާރީގައި ޒަޚަމްވެ، ފަރުވާދެމުން ދަނިކޮށް އެމީހާ ވަނީ މަރުވެފައެވެ. މަރުވީ އުމުރުން 21 އަހަރުގެ މީހެކެވެ.
މި މައްސަލައާއި ގުޅިގެން 16 އަހަރުގެ ކުއްޖަކާއި 15 އަހަރުގެ ކުއްޖަކު ވަނީ ހައްޔަރުކޮށްފައެވެ. 16 އަހަރުގެ ކުއްޖާގެ ބަންދަށް 10 ދުވަހުގެ މުއްދަތު ދީފައިވާއިރު، ފުލުހުން ބުނީ 15 އަހަރުގެ ކުއްޖާގެ ބަންދަށްވެސް 10 ދުވަސް ކޯޓުން ދީފައިވާކަމަށެވެ.
މީގެއިތުރުން ފުލުހުން ވަނީ ފޭދޫގެ އަމަން ނަގާލަން އުޅުނުކަމުގެ ތުހުމަތުގައި ބަޔަކު ހައްޔަރުކޮށްފައެވެ. އެއީ އުމުރުން 18 އަހަރުގެ ދެ މީހަކާއި 29 އަހަރުގެ މީހެކެވެ. އެ މީހުން ބަންދުގައި ބައިތިއްބައިގެން ތަހުގީގު ކުރިއަށް ގެންދަން ކޯޓުން ފަސް ދުވަސް ދީފައިވާކަމަށް ފުލުހުން ބުނެއެވެ.
އެ މައްސަލަ އިތުރަށް ތަހުގީގު ކުރަމުންދާކަމަށް ފުލުހުން ބުނެއެވެ. ފުލުހުން މިހާތަނަށް މިމާރާމާރީއާ ގުޅޭގޮތުން ބުނެފައިވަނީ މިއީ ދެ ގްރޫޕެއްގެ ދެމެދުގައި ހިނގި ހަމަނުޖެހުންތަކާއި ގުޅިގެންނާއި މަސްތުވާތަކެއްޗާ ގުޅުންހުރި މާރާމާރީތަކެއްކަމަށް ބެލެވިފައިވާކަމަށެވެ.
ފޭދޫގައި އެންމެ ފުރަތަމަ މާރާމާރީ ހިންގީ މިދިޔަ އަންގާރަ ދުވަހުގެ ރެ އެވެ. އެ މާރާމާރީގައި 19 އަހަރުގެ މީހަކަށް ވަރަށް ބޮޑަށް އަނިޔާވެ، އޭނާއަށް މިހާރު ފަރުވާދެމުން ދަނީ މާލެ ގެނެސްގެންނެވެ.
