ޖުލައި މަސް ނިމޭއިރު، ބޭނުންކުރެވޭ ދައުލަތުގެ ރިޒާވްގެ ތަފްސީލް ހިއްސާކުރެއްވުމަށް އީވާ އެދިވަޑައިގެންފި
މި މަސް ފެށުނުއިރު ރާއްޖޭގެ ބޭރު ފައިސާގެ ރިޒާވްގެ ތެރެއިން ސަރުކާރަށް ބޭނުންކުރެވޭ ފައިސާގެ ގޮތުގައި ހުރީ 317 މިލިއަން ޑޮލަރު
މަޖިލީހުގެ ނައިބު ރައީސް އީވާ އަބްދުﷲ
ޖުލައި މަސް ނިމޭއިރު، ސަރުކާރަށް ބޭނުންކުރެވޭ ދައުލަތުގެ ރިޒާވްގެ ތަފްސީލް ހިއްސާކުރެއްވުމަށް ފިނޭންސް މިނިސްޓަރ އިބްރާހިމް އަމީރުގެ އަރިހުން، ރައްޖިތުންގެ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ އެދިވަޑައިގެންފިއެވެ.
މިނިސްޓަރ އަމީރަށް ލިޔުމުން ޖަވާބު ދެއްވުމަށް ހުށައަޅުއްވާފައިވާ ސުވާލުގެ ނޯޓިސް އީވާ ވަނީ ޓްވިޓަރގައި ހިއްސާކުރައްވާފައެވެ. އެ ސުވާލުގައި އީވާ އެދިވަޑައިގެންފައިވަނީ، ޖުލައި މަސް ނިމޭއިރު، ބޭނުންކުރެވޭ ދައުލަތުގެ ރިޒާވުގައި، ކިތައް ދުވަހުގެ ކާޑާއި، ތެޔޮ އަދި ބޭހުގެ ފައިސާގެ ތަފްސީލް ހިއްސާ ކުރެއްވުމަށް އެދިވަޑައިގެންފައެވެ.
އީވާ ވިދާޅުވީ މި މަސް ފެށުނުއިރު ރާއްޖޭގެ ބޭރު ފައިސާގެ ރިޒާވްގެ ތެރެއިން ސަރުކާރަށް ބޭނުންކުރެވޭ ފައިސާގެ ގޮތުގައި ހުރީ 317 މިލިއަން ޑޮލަރު ކަމަށެވެ. މި ހިނގާ ޖޫން މަހާއި، ކުރިއަށް އޮތް ޖުލައި މަހު 130 މިލިއަނަށް ވުރެ ގިނަ ޑޮލަރު، ދަރަނީގެ ގޮތުގައި އަނބުރާ ދައްކަން ޖެހޭ ކަމަށާއި، މި ދެމަހަށް ބަޖެޓް ކޮށްފައިވާ ޑެފިސިޓްއަކީ 150 މިލިއަން ޑޮލަރަށްވުރެ އިތުރު އަދަދެއް ކަމަށް އީވާ ވިދާޅުވެފައިވެއެވެ.
ދައުލަތުން ދައްކަން ޖެހޭ ދަރަނި ދެއްކުމުގެ ގާބިލްކަން އެބަހުރި ކަމަށާއި އެކަމަށް އެއްވެސް ހުރަހެއް ނެތް ކަމަށް ފިނޭންސް މިނިސްޓަރ ވަނީ ވިދާޅުވެފައެވެ. އިތުރުވަމުން އަންނ ޑޮލަރުގެ އާމްދަނީއާއެކު ދައުލަތުގެ ރިޒަރވް ކޮވިޑްގެ ކުރިން ހުރިވަރުގައި ހިފެހެއްޓޭނެކަމަށްވެސް މިނިސްޓަރ ވިދާޅުވިއެވެ.
މިނިސްޓަރ އަމީރު ވިދާޅުވީ، ރާއްޖޭގެ ރިޒާވް ހުސްވެ، ޑިފޯލްޓް ވެދާނެކަމަށް ދެކެވޭ ވާހަކަތަކަކީ ހަޤީޤަތާ ޚިލާފު ވާހަކަތަކެއް ކަމަށާއި، މިފަދަ ވާހަކަތައް ރައްޔިތުން އަދި ބޭރުގެ އިންވެސްޓަރުންނަށް ހަޤީޤަތް އޮޅޭގޮތަށް އަޑުއިވުމުން, ދުނިޔެ މިއޮތް ނާޒުކު ފައްތަރުގައި މުޅި ރާއްޖެއަށް އޭގެ ސަބަބުން ލިބެން ނުޖެހޭ ގެއްލުންތަކެއް ވެދާނެ ކަމެއް ކަމަށެވެ. އަދި އިޤްތިސާދުގައި ނުތަނަވަސްތަކަން އިތުރުވެ، މާކެޓަށް އޭގެ ނޭދެވޭ އަސަރުކޮށްފާނެ ކަމެެއް ކަމަށެވެ.
މިނިސްޓަރ ވިދާޅުވީ، ދައުލަތުގެ އާމްދަނީ ރަނގަޅުވެފައިވީ ނަމަވެސް، ދައުލަތުގެ ޚަރަދުތަކަށް ވަނީ "ވާންވެފައި" ކަމަށެވެ. މިކަމުގައި ސަރުކާރުގެ ވިސްނުމަކީ ޚިދުމަތްތަކަށް ބުރޫ ނާރާނޭހެން ޚަރަދުތައް އަލުން ބައްޓަންކޮށް ބަޖެޓު ފައިނޭންސްކުރުން ކަމަށް ވިދާޅުވިއެވެ. ދުނިޔޭގެ ބާޒާރުގައި ތަކެތީގެ އަގު މައްޗަށް ދިއުމުގެ އަސަރު ރާއްޖެއަށްވެސް ކުރާނެ ކަމަށާއި، މިފަދަ ރިސްކުތަކުން އަރައިގަނެވޭނީ ރަނގަޅު ދަނޑިވަޅުގައި އެކަށީގެންވާ ފިޔަވަޅުތައް އަޅައިގެންކަން ފާހަގަކުރައްވަމުން މިނިސްޓަރވަނީ ސަރުކާރުން ހާލަތު މޮނިޓަރކޮށް ފިޔަވަޅު އަޅަމުންގެންދާކަމަށެވެ.
މިއަހަރުގެ މިހާތަނަށް ދައުލަތުގެ ރަސްމީ ރިޒަރވް ހުރީ 829 މިލިއަން ޑޮލަރުގައި ކަމަށް ސަރުކާރުން ވަނީ ހާމަކޮށްފައެވެ.
