ބީޖޭޕީގެ ދެ އޮފިޝަލުން، ރަސޫލާއަށް ފުރައްސާރަކުރި މައްސަލަ 15 ގައުމަކުން ކުށްވެރިކޮށްފި

ކީރިތި ރަސޫލާ (ސައްލަﷲ އަލައިހި ވަސައްލަމް) އަށް ފުރައްސާރަކޮށް އިންޑިއާގެ ވެރިކަންކުރާ ޕާޓީ, ބާރަތަޔާ ޖަނަތާ ޕާޓީ (ބީޖޭޕީ)ގެ ދެ އޮފިޝަލުން ކަމަށްވާ، ނުޕުރް ޝަރްމާ އާއި ނަވީން ކުމާރު ޖިންދާލް ދެއްކި ވާހަކަތަކަކާ 15 ގައުމަކުން ކުށްވެރިކޮށްފިއެވެ.

އެ ދެމީހުންގެ ވާހަކަތައް ކުށްވެރިކޮށް އިސްލާމީ ގިނަ ގައުމުތަކަކުން ދަނީ އިހުތިޖާޖުކުރަމުންނެވެ. އިންޑިއާގައިވެސް އެގައުމުގެ އިސްލާމުން ވަނީ މިކަމާ ދެކޮޅަށް ގައުމުގައި އިހުތިޖާޖުކޮށްފައެވެ. މިގޮތުން ހޯމަ ދުވަހު މިކަމާ ގުޅިގެން އިންޑިއާގައި ކުރިއަށް ދިޔަ އިހުތިޖާޖުގައި 38 މީހުން ހައްޔަރުކޮށްފައިވާކަމަށް ރިޕޯޓުތައް ބުނެއެވެ.

އިސްލާމީ ގައުމުތައް ކަމަށްވާ އީރާން، ކުވައިތު، ގަތަރު އަދި ސައުދި އަރަބިއްޔާ ހިމެނޭހެން އޮމާން، ޔޫއޭއީ، އީރާނުން ވެސް ވަނީ އެކަށް ކުށްވެރިކޮށްފައެވެ. މީގެ އިތުރުން އުރުދުން، އަފްގާނިސްތާން، ބަހުރައިން، ދިވެހިރާއްޖެ އަދި ލީބިޔާއާއި އިންޑޮނޭޝިއާއިން ވެސް ވަނީ އެކަން ކުށްވެރިކޮށް، އެގޮތަށް އެކަން ކުރުމަށް މަގުފަހިކޮށްފައިވާތީ އިންޑިއާގެ ސަރުކާރާ ދެކޮޅަށް މުޒާހަރާކުރުމަށް ގޮވާލާފައެވެ.

މި 15 ގައުމުން ވަނީ އެކަން ހަރުކަށި އިބާރާތުން ކުށްވެރިކޮށް ރަސޫލާއަށް ފުރައްސާރަކުރި މައްސަލަ ބަލައިނުގަނެވޭނަކަމަށް ބުނެ އިންޑިއާ ސަރުކާރުން އެކަމާއި ގުޅިގެން މައާފަށް އެދުމަށް ގޮވާލާފައެވެ.

އިންޑިއާގައި ވެސް އިދިކޮޅު ޕާޓީތަކުން ވަނީ ބައިނަލްއަގުވާމީ ދުނިޔޭގައި ބީޖޭޕީގެ 2 އޮފިޝަލުން ގައުމުގެ އަގުވައްޓާލިކަމަށް ބުނެ ގާނޫނީ ފިޔަވަޅު އެޅުމަށް ބާރުއަޅާ އިންޑިއާ ސަރުކާރަށް ފިއްތުންތައް ކުރިމަތިކުރުވަމުންނެވެ.

އިންޑިއާގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނި ފުރައްސާރައިގެ ޓްވީޓްތަކާއި ކޮމެންޓުތަކަކީ އެއްވެސް ހާލަތެއްގައި ސަރުކާރުގެ ވިސްނުން ނޫން ކަމަށާއި، އެއީ އެމީހުންގެ އަމިއްލަ ހިޔާލުކަމަށެވެ.

މީގެ އިތުރުން އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އިން ވަނީ ރަސޫލާއަށް ފުރައްސާރަ ކުރި މައްސަލަ ހަރުކަށި އިބާރާތުން ކުށްވެރިކޮށް، އިންޑިއާގެ އާބާދީ މަދު މުސްލިމުންގެ ހައްގުތައް ހިމާޔަތްކުރުމަށް އަޅަންޖެހޭ ފިޔަވަޅުތައް އަޅައި ދިނުމަށް އދ އަށް ގޮވާލާފައެވެ. މީގެ އިތުރުން ގަލްފުގެ ގައުމުތަކާއި އިސްލާމީ އެހެން ގައުމުތަކުގައި ހަރަކާތްތެރިވާ އިންޑިއާ ސަރުކާރުގެ ސަފީރުންނާ މަންދޫބުން ގައުމުތަކުން ވަނީ އެގައުމުތަކުގެ ފޮރިން މިނިސްޓްރީއަށް ހާޒިރުކޮށް އެދެމީހުންގެ އަމަލު ކުށްވެރިކުރާކަން އަންގާ އެކަމުގެ ލިއުން ދީފައެވެ.

ބީޖޭޕީގެ ދެ އޮފިޝަލުންގެ މި އަމަލުތަކާއެކު ސޯޝަލް މީޑިއާގައި އެކި ގައުމުތަކުން އަންނަނީ އިންޑިއާގެ އުފެއްދުންތައް ބޮއިކޮޓްކުރުމަށް ގޮވާލަމުންނެވެ.

ނުޕުރު ޝަރްމާ ބީޖޭޕީން ވަކިކޮށްފައިވާއިރު، ޖިންދަލް ވަނީ ޕާޓީގެ ހަރަކާތްތަކުން ސަސްޕެންޑް ކޮށްފައެވެ. ބީޖޭޕީގެ މިނިންމުމަށް ސައުދީ މަރުހަބާ ކިޔާފައިވާއިރު، ނިއު ދިއްލީގައި ހުންނަ ގަތަރުގެ އެމްބަސީގެ އިސް އޮފިޝަލަކު ވަނީ އެ ދެ މެމްބަރުންގެ ވާހަކަތަކުން ސަރުކާރު އެއްކިބާވާ ކަމަށް އިންޑިއާގެ ސަރުކާރުން އާންމުކޮށް އިއުލާނުކުރަން ޖެހޭނެ ކަމަށްވެސް ބުނެފައެވެ. އެގޮތުން އެ އޮފިޝަލް ވަނީ ދީނަށް ފުރައްސާރަ ކުރުމަކީ އިގުތިސާދީ ގޮތުން އިންޑިއާއަށް އެކަމުގެ ތަކުލީފު އުފުލަން ޖެހިދާނެ ކަމެއް ކަމަށް ފާހަގަކޮށް، ގަތަރުގެ ބައެއް ސުޕަރމާކެޓް ތަކުން މިހާރުވެސް އިންޑިއާގެ މުދާ ބޮއިކޮޓްކުރުމަށް ރިޕޯޓުތައް ހުށަހަޅަމުންދާކަމަށް ބުނެފައެވެ.

ނުޕުރް ޝަރްމާ، ރަސޫލާއަށް ފުރައްސާރަކޮށްފައިވަނީ ޓީވީއެއްގައި ކުރިއަށް ގެންދިޔަ ބަހުސްއެއްގެ ތެރެއިންނެވެ. ބީޖޭޕީ މީޑިއާގެ ޗީފް ނަވީން ކުމާރު ޖިންދަލް ރަސޫލާއަށް ފުރައްސާރަކޮށް ކުރީ ޓްވީޓެކެވެ. ނަމަވެސް ޕްރެޝަރާއެކު އޭނާ ވަނީ ފަހުން އެ ޓްވީޓް ޑިލީޓްކޮށްފައެވެ.

މި މައްސަލަ ހޫނުވެ އިންޑިއާގައި މުސްލިމުން މުޒާހަރާ ކުރަމުން އަންނަ އިރު، ނުޕުރް އަށް މަރުގެ އިންޒާރު ލިބިފައިވާކަމަށް ބުނެ އޭނާ ވަނީ ދިއްލީ ފުލުހުންނަށް މައްސަލައެއް ވެސް ހުށަހަޅާފައެވެ. ޓީވީގައި ދެއްކި ވާހަކަތަކާއި ގުޅިގެން ފަހުން ނުޕުރް ވަނީ ޓްވިޓާގައި މައާފަށް އެދިފައެވެ.