ފުޓްބޯޅައިގެ ހުރިހާ ހަރަކާތްތަކުން ވިކްޓްރީ ސަސްޕެންޑްކޮށްފައި އޮތްއޮތުން ނިމުމަކަށް ގެނެސް, އެފްއޭއެމްގެ ކޮންގްރެސްއިން މިއަދު އެސަސްޕެންޝަން އުވާލައިފިއެވެ. ވިކްޓްރީގެ ސަސްޕެންޝަން އުވާލާފައި މިވަނީ އެކްލަބުން ކުޅުންތެރިންނަށް ދޭންހުރި މުސާރައާއި, ދަރަނިތައް ޚަލާސްކުރުމުންނެވެ.
އެފްއޭއެމްއިން ވިކްޓްރީގެ ސަސްޕެންޝަން އުވާލިއިރު ދެވަނަ ޑިވިޝަންގައި ވާދަކުރަން ޓީމެއް އެކުލަވާލައި, އާދިއްތަ ދުވަހުގެރޭ އެޓީމުން ވަނީ ޕްރެކްޓިސްވެސް ފަށާފައެވެ. ޓީމުން ދަރަނިތައް ދައްކައި، ޕްރެކްޓިސް ފެށީ އާ ބޯޑެއް އިންތިޚާބުކޮށްގެންނެވެ. އާބޯޑާއެކު ވިކްޓްރީގެ ޗެއަރމަންކަމަށް އިންތިޚާބުވީ މުލީއާގޭގެ ޗީފް އޮފް ސްޓާފް ހުސެއިން އާދަމް (އާދަމްބެ)އެވެ. އެބޯޑްގައި ރައްޔިތުންގެ މަޖިލީހުގެ ހުޅުމާލެ ދާއިރާގެ މެންބަރު އަދި ރައީސުލްޖުމްހޫރިއްޔާގެ ކޮއްކޯފުޅު އަލީ ނިޔާޒު ހިމެނިވަޑައިގަންނަވައެވެ.
2019 ވަނަ އަހަރު ވިކްޓްރީ ސަސްޕެންޑްކުރީ، މުސާރަ ނުދިނުމާއި އެޑްމިނިސްޓްރޭޓިވް މައްސަލަތަކެއްގެ ސަބަބުންނެވެ. އޭރު ކްލަބްގެ ޗެއަރމަންއަކަށް ހުންނެވީ އަހުމަދު ނާޝިދު (ނާޝް)އެވެ. އާބޯޑް އިންތިޚާބުވެ، ދާދި އަވަހަށް ވަނީ ކުޅުންތެރިންގެ މުސާރަ އެފްއޭއޭއެމްއާ ހަވާލުކޮށްފައެވެ. އަދި ބިދޭސީ ކުޅުންތެރިންނާއި, ލަންކާގެ ކޯޗު ޕަކީރު އަލީއާއެކު ޓީމެއް އެކުލަވާލާފައެވެ.
ވިކްޓްރީއަށްވުރެ ކުރިން ސަސްޕެންޑްކުރި އެންމެ ކާމިޔާބު ކްލަބް ނިއުރޭޑިއަންޓްގެ ސަސްޕެންޝަން އުވާނުލިނަމަވެސް، ދަރަނިތައް ދެއްކުމުން ސަސްޕެންޝަން އުވާލުމުގެ ބާރު އެކްސްކޯއަށް ދިނުމަށް މިއަދުގެ ކޮންގްރެސްއިން ވަނީ ނިންމަވާފައެވެ. ނިއުރޭޑިއަންޓުންވެސް އާ ބޯޑެއް އިންތިޚާބުކޮށް, ދަރަނިތައް ދައްކައި، ކްލަބް އަލުން ކޮޅަށް ނެގުމުގެ މަސައްކަތް ދަނީ ކުރަމުންނެވެ. އެމަސައްކަތުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ އެއްބާރުލެއްވުން ލިބޭކަމަށް ނިއުރޭޑިއަންޓްގެ އާބޯޑުން ބުންޏެވެ. މިއަދު ކޮންގްރެސްގައި ވިކްޓްރީގެ ސަސްޕެންޝަން އުވާލުމުގެ ކުރިން އެފްއޭއެމްގެ ރައީސް ބައްސާމް އަދީލް ޖަލީލްވެސް ވިދާޅުވީ، ސަސްޕެންޝަންގައި އޮތް ދެކްލަބްގެ ސަސްޕެންޝަންގެ މައްސަލައަށް ހައްލު ގެނައުން ކޮންގްރެސްގައި އޮންނާނެކަމަށާއި, ރައީސުލްޖުމްހޫރިއްޔާއާ މިއަދު ބައްދަލުކުރެއްވި ކަމަށެވެ.
