ވަރުގަދަ ސްކޮޑް އަކާއެކު ބުރު ސްޕޯޓްސް ކްލަބުން، ދެވަނަ ޑިވިޝަނުގެ މުބާރާތަށް ތައްޔާރުވުމަށް ފަރިތަކުރުން ފަށައިފިއެވެ.

ބުރުގެ ފަރިތަކުރުން ފަށާފައިވަނީ އާދީއްތަ ދުވަހުގެރޭ އެފްއޭއެމްގެ އެއް ނަންބަރު ޓާފުގައެވެ. މިދިޔަ އަހަރުގެ ތިންވަނަ ޑިވިޝަންގެ ޗެމްޕިއަން، ބުރު ދެވަނަ ޑިވިޝަނަށް ތައްޔާރުވަމުން އަންނައިރު، ޓީމުގައި ބިދޭސީ ހަތަރު ކުޅުންތެރިން ހިމެނުމަށް ވަނީ ނިންމާފައެވެ. ޓީމަށް ގެނައުމަށް ހަމަޖެހިފައިވަނީ ސްޕެއިންގެ އެއް ކުޅުންތެރިޔަކާ، ބްރެޒިލްގެ ދެ ކުޅުންތެރިންގެ އިތުރުން ސެންޓްރަލް އޭޝިއާގެ އެއް ކުޅުންތެރިއެކެވެ. އަދި ފުރަތަމަ ޑިވިޝަނަށް ކުޅެފައިވާ 11 ކުޅުންތެރިންނާ، ދެވަނަ ޑިވިޝަނަށް މީގެ ކުރިން ކުޅުނު ފަސް ކުޅުންތެރިންގެ އިތުރުން މިދިޔަ އަހަރު އޮތް ތިންވަނަ ޑިވިޝަން މުބާރާތުގެ މޮޅު ކުޅުންތެރިޔާ މުހައްމަދު ތަސްނީމް (ތައްތި) ވެސް ބުރު ޓީމުގައި ހިމެނެއެވެ.

ރާއްޖެ ޓީވީއަށް ދިން އިންޓަވިއުއެއްގައި ޓީމުގެ ކޯޗު އާފިއު މުހައްމަދު ހާމިދު ބުނީ ޓީމުގެ އަމާޒަކީ މުބާރާތުގެ ތަށި ކާމިޔާބުކުރުން ކަމަށެވެ. ނަމަވެސް ވިކްޓްރީ ފަދަ ބޮޑެތި ކްލަބުތައް މިފަހަރުގެ މުބާރާތުން ފެނުމަކީ މުބާރާތް ކާމިޔާބު ކުރުމަށް ގިނަ މަސައްކަތްތަކެއް ކުރަންޖެހޭނެ ސަބަބެއްގެ ގޮތުގައި އާފިއު ފާހަގަކުރިއެވެ.

ވިކްޓްރީ ފަދަ ބޮޑެތި ކްލަބުތައް މުބާރާތުގައި ވާދަ ކުރުމަކީ މުބާރާތަށް ލިބޭ ކުރިއެރުމެއްގެ ގޮތުގައި ފާހަގަކޮށް އާފިއު ބުނީ މީގެ ސަބަބުން ރާއްޖޭގައި ގެއްލިފައިވާ ފުޓްބޯޅައިގެ ފޯރި އަލުން ގެނެވިދާނެކަމަށް ގަބޫލުކުރާ ކަމަށެވެ. އަދި ވަރުގަދަ ޓީމުތަކާ ވާދަކުރަން ޖެހުމަކީ ބުރު ޓީމަށް ލިބޭނެ އިތުރު ކުރިއެރުމެއްގެ ގޮތުގައި އާފިއު ފާހަގަކުރިއެވެ.

ބުރުން މިދިޔަ އަހަރުގެ ތިންވަނަ ޑިވިޝަން މުބާރާތް ކާމިޔާބުކުރީ މުބާރާތުގެ އެއްވެސް މެޗަކުން ބަލިނުވެއެވެ.