ރަނގަޅު މުޖުތަމައެއް ބިނާކުރަން އެންމެ ފުރަތަމަ ހަރުދަނާކުރަންޖެހެނީ އާއިލާތައް
ހުކުރު ޚުތުބާ
އާއިލާއެއްގެ ބިންގާ އަޅާއިރު ޒަވާޖީ ހަޔާތުގެ ބައިވެރިއަކަށް ދީންވެރި، ޚުލްގުހެޔޮ މީހަކު އިޚްތިޔާރުކުރުމަށް އިސްކަންދޭންޖެހޭކަމަށް ހުކުރު ޚުތުބާގައި ބުނެފިއެވެ.
"ހަރުދަނާ އާއިލާއެއް ބިނާކުރުން" މި މައުޟޫއަށް ރާއްޖޭގެ އެކި ކަންކޮޅުތަކުގައި އިއްވި ހުކުރު ޚުތުބާގައި ބުނީ އިންސާނީ މުޖުތަމައެއް އުފެދެނީ ކުދިކުދި އާއިލާތަކުން ކަމުގައެވެ. މުޖުތަމައެއް ހަރުދަނާކުރުމަށް އެންމެ ފުރަތަމަ ހަރުދަނާކުރަންޖެހެނީ މި ކުދި ކުދި އާއިލާތައް ކަމުގައި ޚުތުބާގައި ބުނެފައިވެއެވެ.
މުޖުތަމައުގެ އަޚްލާގީ ފެންވަރު ދަށްވާން ދިމާވާ އެންމެ ބޮޑު ސަބަބަކީ ބޮޑެތިވަމުން އަންނަ ދަރިންނަށް ހަރުދަނާ ތަރުބިއްޔަތެއް ނުދެވުމެވެ. އެ ދަރިންނަށް ރަނގަޅު ތަރުބިއްޔަތެއް ދެވޭނީ ޒަވާޖީ ހަޔާތުގެ ބައިވެރިއަކަށް ދީންވެރި، ޚުލްގުހެޔޮ މީހަކު އިޚްތިޔާރުކޮށްގެން ކަމަށް ޚުތުބާގައި ބުނެފައިވެއެވެ. ކައިވެނިކުރުމަށް އިޚްތިޔާރުކުރާ އަންހެން މީހާގެ ކިބައިގައި ރަނގަޅު ސިފަތަކެއް ހުންނަންޖެހޭ ފަދައިން ފިރިހެން މީހާގެ ކިބައިގައިވެސް ރަނގަޅު ސިފަތަކެއް ހުންނަންޖެހޭ ކަމަށް ޚުތުބާފައި ބުނެފައިވެއެވެ. ދީންވެރި، އޯގާތެރި، ޚުލްގު ހެޔޮ މީހަކު ހަޔާތުގެ ބައިވެރިއަކަށް ޚިޔާރުކޮށްފިނަމަ އެމީހަކަށް ދެދުނިޔޭގެ ބާއްޖަވެރިކަން ލިބޭނެއެވެ.
ހަޔާތުގެ ބައިވެރިއަކު އިޚްތިޔާރުކުރުމުގައި ބަލަންވީ އެންމެ އެކަށީގެންވާ މިންގަނޑު އިސްލާމް ދީނުގައި މިގޮތަށް އައިސްފައިވީނަމަވެސް މި މިންގަނޑަށް ބަލައިލެވެނީ ކިހާ ވަރަކަށްތޯ ޚުތުބާގައި ވަނީ ސުވާލު އުފައްދާފައެވެ. ރަނގަޅަށް ބަލައިނުލާ އިޚުތުޔާރުކުރާ ބައިވެރިޔާގެ ހަޤީޤީ ސޫރަ ފެންނަން ފަށަނީ ކައިވެނިކޮށް، ދަރިންވެސް ލިބޭ ފަހުން ކަމަށާއި، އެންމެ ފަހުން އާއިލާ ރޫޅި، ދަރިންނަށް ވަރަށް ބޮޑު ނިކަމެތިކަމެއް ލިބިގެންދާކަމަށް ޚުތުބާގައި ބުނެފައިވެއެވެ.
މީގެ އިތުރުން ދެމަފިރިން އެކަކު އަނެކަމަށް ވަގުތު ނުދިނުމަކީވެސް ފެންނަ ވަރަށް ގޯސް މަންޒަރެއް ކަމަށް ޚުތުބާގައި ބުނެފައިވެއެވެ. ކޮންމެ ދުވަހަކުވެސް އާއިލާއާއި ދަރިންނަށް ދޭންވާ ވަގުތު ނުދޭނަމަ އާއިލާއަށް ވާނީ ކިހިނެއްތޯ ޚުތުބާގައި ސުވާލުކޮށްފައިވެއެވެ.
އާއިލާއެއްގައި ދެމަފިރިންގެ އެންމެ އިސް މަސްއޫލިއްޔަތަކަށް ވާންޖެހޭނީ ދަރިންނަށް ރަނގަޅު ތަރުބިއްޔަތެއް ދީ، އެކުދިންގެ ޙައްޤުތަކަށް ރައްކާތެރިވުން ކަމުގައި ޚުތުބާގައި ބުނެފައިވެއެވެ. އަދި ދަރިން ތަރުބިއްޔަތުކުރުމުގައި އެންމެ އެދެވޭ ނަތީޖާއެއް ހޯދުމަށް މައިންބަފައިން ދަރިންނަށް ރިވެތި ނަމޫނާއެއް ދައްކަންޖެހޭ ކަމަށް ޚުތުބާގައި ބުނެފައިވެއެވެ.
