ގަވާއިދާއި ޚިލާފަށް ޕާޓީއެއްގައި ރަޖިސްޓްރީކޮށްފައިވާނަމަ ޝަކުވާ ހުށަހެޅުމުގެ ފުރުޞަތު އިލެކްޝަންސް ކޮމިޝަނުން ހުޅުވާލައިފިއެވެ.

އީސީން ބުނީ، ޕާޓީއެއްގެ މެންބަރު ކަމަށް ގަވާއިދާއި ޚިލާފަށް ރަޖިސްޓަރީ ކޮށްފައިވާނަމަ އެކަމުގެ ޝަކުވާ ހުށަހެޅުމުގެ ފުރުޞަތު ވަނީ ހުޅުވާލެވިފައިވާ ކަމަށާއި، އެފަދަ ކޮންމެ ޝަކުވާއެއް ބެލުމަށްފަހު އެކަންކުރި ފަރާތަކާމެދު އެއްވެސް އިސްތިސްނާއެއްނެތި ޤާނޫނީ ފިޔަވަޅު އެޅުމަށް ނިންމަވާފައިވާކަމަށެވެ.

ރާއްޖޭގެ ސިޔާސީ ޕާޓީތަކުން ރަޖިސްޓްރީ ކުރުމަށް ހުށަހަޅާ ފޯމުތަކުގެ ތެރެއިން ސައްޙަ ނޫން ކޮންމެ ފޯމަކަށް 10،000 ރުފިޔާ އިން ޖޫރިމަނާ ކުރުމަށް އީސީން ނިންމީ ބުދަ ދުވަހުއެވެ. އީސީގެ ނައިބު ރައީސް އިސްމާއިލް ހަބީބު ކުރެއްވި ޓްވީޓެއްގައި ވިދާޅުވީ މި ނިންމުމާ އެއްގޮތަށް އޭޕްރިލް މަހުގެ އެއްވަނަ ދުވަހުން ފެށިގެން ޕާޓީތަކުން ހުށަހަޅާފައިވާ ފޯމުތަކާ މެދު އަމަލު ކުރާނެ ކަމަށެވެ.

އޭނާ ވިދާޅުވިގޮތުގައި ސައްޙަ ނޫން ކޮންމެ ފޯމަކަށް ޕާޓީ 10،000 ރުފިޔާއިން ޖޫރިމަނާ ކުރާއިރު ފުރަތަމަ ފަހަރު ރަޖިސްޓްރާ 5،000 ރުފިޔާއިން ޖޫރިމަނާ ކުރާނެ ކަމަށެވެ. އަދި ދެފަހަރަށް ވުރެ ގިނައިން އެކަން ތަކުރާރު ކޮށްފިނަމަ ކޮންމެ ފަހަރަކު ރަޖިސްޓްރާ 10،000 ރުފިޔާއިން ޖޫރިމަނާ ކުރަން ނިންމާފައިވާ ކަމަށް ވެސް ހަބީބު ވިދާޅުވިއެވެ.

މިގޮތަށް އީސީން ނިންމީ ސައްޙަ ނޫން ފޯމު ހުށަހެޅުން ހުއްޓުވުމަށެވެ. މި ބަދަލުން ވެސް އެކަށީގެންވާ ހައްލެއް ނުލިބޭނަމަ ފޯމުގައި ސޮއި ކުރާ ކޮންމެ ހެކިވެރިޔަކުވެސް 5،000 ރުފިޔާއިން ޖޫރިމަނާ ކުރުމަށްވެސް ވަނީ ނިންމާފައެވެ. މިގޮތަށް އަމަލު ކުރާނީ މިއަހަރުގެ އޮކްޓޯބަރު މަހުން ފެށިގެންނެވެ.

އިލެކްޝަންސް ކޮމިޝަނަށް ސައްޙަ ނޫން ފޯމުތައް ހުށަހަޅާކަމުގެ ޝަކުވާތައް ވަނީ ގިނަވެފައެވެ.