އަދުލުގެ ނިޒާމު ހަލުވި ކުރުމަށް ޖަހަންވީ ވެކްސިން އެނގޭނީ ތަފާސްހިސާބުން: ފަނޑިޔާރު ސުއޫދު
ސިވިލް ކޯޓުގައި ޙުކުމް ތަންފީޒު ނުކުރެވި 2700 އެއްހާ މައްސަލަ އެބައޮތް
ސުޕްރީމް ކޯޓުގެ ފަނޑިޔާރު ހުސްނުއްސުއޫދު
އަދުލުގެ ނިޒާމު ހަލުވި ކުރުމަށް ޖަހަންވީ ވެކްސިން އެނގޭނީ ތަފާސްހިސާބުގެ ޒަރިއްޔާއިންކަމަށް ސުޕްރީމް ކޯޓުގެ ފަނޑިޔާރު ހުސްނުއްސުއޫދު ވިދާޅުވެއްޖެއެވެ.
ހުސްނުއްސުއޫދު އެހެން ވިދާޅުވީ ޖިނާއީ އަދުލުގެ ނިޒާމާ ގުޅުންހުރި ގާނޫނުތަކާއި ގަވާއިދުތަކާއި އުސޫލުތައް އެއްތަނަކުން ފެންނަން ހުންނާނެގޮތަށް ޕްރޮސެކިއުޓަރ ޖެނެރަލް އޮފީހުން އެކުލަވާލި “ލެތުން” ޑޭޓާބޭސް އިފްތިތާޙު ކުރުމުގެ ރަސްމިއްޔާތުގައި އާދިއްތަ ދުވަހު ދެއްކެވި ވާހަކަފުޅުގައެވެ.
މި ރަސްމިއްޔާތުގައި ވާހަކަފުޅު ދައްކަވަމުން ފަނޑިޔާރު ހުސްނުއްސުއޫދު ވަނީ އަދުލުގެ ނިޒާމުގައި ތަފާސްހިސާބު އަދާކުރާ މުހިއްމު ދައުރަށް އަލިއަޅުވާލައްވާފައެވެ.
ސުއޫދު ވިދާޅުވީ، ކޯޓުތަކާއި ޝަރުއީ ދާއިރާއަށް ދިމާވާ މައްސަލަތަކުގެ ފުންމިން ދެނެގަތުމުގައި ތަފާސްހިސާބު މުހިއްމު ދައުރެއް އަދާކުރާކަމަށެވެ. އެއީ އަދުލުގެ ނިޒާމު އިތުރަށް ދެފުއް ފެންނާނެ ގޮތަކަށް، އަދި މި ނިޒާމަށް ހުރި ގޮންޖެހުންތައް ދެނެގަނެ، ކަންކަން އިސްލާޙު ކުރުމަށްވެސް މުހިއްމު ކަމެއްކަމަށް ސުއޫދު ވިދާޅުވިއެވެ.
ޖިނާއީ އަދުލުގެ ނިޒާމާ އެއްގޮތަށް މަދަނީ އަދުލުގެ ނިޒާމު ރަނގަޅުކުރުމަށްވެސް ތަފާސްހިސާބު އެނގުން މުހިއްމުކަން ފަނޑިޔާރު ސުއޫދު ފާހަގަ ކުރެއްވިއެވެ.
މިސާލެއްގެ ގޮތުން، އެންމެ ރަޖިސްޓްރާއެއް ހުންނެވުމުގެ ސަބަބުން މަދަނީ ކޯޓަށް ދިމާވެފައިވާ ދަތިތަކަށް ސުއޫދު ވަނީ އަލިއަޅުވާލައްވާފައެވެ. އެގޮތުން ސިވިލް ކޯޓުގެ ރަޖިސްޓްރާއަށް މައްސަލައެއް ހުށައަޅައިގެން ޖަވާބެއް ލިބުމުގައި ގިނަ ދުވަސްތަކެއްވާކަމަށް ބުނެ އާންމުން ކުރަމުންދާ ޝަކުވާތަކާއި ގުޅޭގޮތުން ވާހަކަ ދެއްކެވިއެވެ.
ސުއޫދު ވިދާޅުވީ، މި މައުލޫމާތުތައް އެނގެން ހުންނަނަމަ، ޕޮލިސީ ލެވެލްގައި މި މައްސަލަތަކަށް ޙައްލު ހޯދޭނެ ގޮތެއް ހޯދުމަށް ފަސޭހަވެގެންދާނެ ކަމަށެވެ.
ފަނޑިޔާރުންނާ ގުޅިގެން ހުރި ކަންކަން ޙައްލު ކުރުމުގައިވެސް ތަފާސްހިސާބު އެނގުން މުހިއްމުކަމަށް ސުއޫދު ވިދާޅުވިއެވެ.
މިސާލެއްގެ ގޮތުން، ސިވިލް ކޯޓުގެ ޑިވިޝަންތައް ބަހާލުމުގެ ކުރިން ކޮންމެ ފަނޑިޔާރެއްގެ އަތްޕުޅުގައި އޮންނަނީ 150 އެއްހާ މައްސަލަ ކަމަށާއި، ޑިވިޝަންތައް އުވާލައި ޙުކުމް ތަންފީޒު ކުރުމުގެ މައްސަލަތައް ހުރިހާ ފަނޑިޔާރުންނަށް ބަހާލުމުން މިހާރު ކޮންމެ ފަނޑިޔާރެއްގެ އަތްޕުޅުގައި 300 އެއްހާ މައްސަލަ އެބައޮތްކަމަށް ސުއޫދު ވިދާޅުވިއެވެ.
ސުއޫދު އިތުރަށް ވިދާޅުވީ، މާލޭގައި ސިވިލް ކޯޓުގައި ޙުކުމް ތަންފީޒު ނުކުރެވި 2700 އެއްހާ މައްސަލަ އެބައޮތް ކަމަށެވެ. ހުރިހާ ފަނޑިޔާރުންނަށް އެ މައްސަލަތައް ބަހާލެއްވުމުގެ ކުރިން އެކަން ކުރައްވަން ތިއްބެވީ 3 ބޭފުޅުންކަމަށް ސުއޫދު ވިދާޅުވިއެވެ. ވީއިރު، ނަތީޖާ ނެރެވޭނެ މިންވަރާމެދު ވިސްނަވާލެއްވުމަށް ސުއޫދު އެދިވަޑައިގެންނެވިއެވެ.
