ލަންކާއަށް އެހީތެރިވެދެއްވާނެކަމަށް އިނގިރޭސި ބޮޑުވަޒީރު ވައުދުވެވަޑައިގެންނެވި: ރަނިލް

ސްރީލަންކާގެ ހާލަތާއި ގުޅޭގޮތުން އެގައުމުގެ ބޮޑުވަޒީރު ރަނިލް ވިކްރަމްސިންގހަ އިނގިރޭސިވިލާތުގެ ބޮޑުވަޒީރު ބޮރިސް ޖޯންސަންއާ މަޝްވަރާކުރައްވައިފިއެވެ.

ސްރީލަންކާއަށް ކުރިމަތިވެފައިވާ އިގްތިޞާދީ ކާރިސާއާއެކު އެޤައުމަށް ވަނީ ސިޔާސީގޮތުންވެސް ނުތަނަވަސްކަން ވެރިވެފައެވެ. ދާދިފަހުން ބޮޑުވަޒީރުކަމަށް އައްޔަނުކުރެވިގެންދިޔަ ރަނިލް ގެންދަވަނީ ބައިނަލްއަގްވާމީ އެކި ފަރާތްތަކާއެކު ލަންކާގެ އިގްތިޞާދީ ހާލަތާއި ގުޅޭގޮތުން މަޝްވަރާކުރައްވަމުންނެވެ.

އިނގިރޭސި ބޮޑުވަޒީރާއި މަޝްވަރާކުރެއްވުމަށްފަހު ރަނިލް ކުރެއްވި ޓްވީޓެއްގައި ވިދާޅުވީ ލަންކާގެ ހާލަތާއި ގުޅޭގޮތުން ބޮރިސްއަށް މައުލޫމާތު ދެއްވިކަމަށެވެ. މިއާއެކު ލަންކާއަށް އެހީތެރިކަން ފޯރުކޮށްދެއްވުމަށް ބޮރިސް ވައުދުވެވަޑައިގެންނެވިކަމަށް ރަނިލް ވިދާޅުވިއެވެ.

ވަކިން ޚާއްސަކޮށް މޫސުމީ ބަދަލުތަކުން އަރައިގަތުމަށާއި ހުޅުވާލެވިފައިވާ އަދި ދެމެހެއްޓެނެވި ގޮތެއްގައި މުދާ އެކްސްޕޯޓްކުރެވޭނެ ގޮތްތަކަށް އިގްތިޞާދު ބައްޓަންކުރުމުގައި އެހީތެރިކަން ވެދެއްވާނެކަމަށް ބޮރިސް ވިދާޅުވިކަމަށް ރަނިލް ވިދާޅުވިއެވެ.