ފުވައްމުލަކުގައި ތެޔޮ ޓޭންކެއްގައި ރޯވެ، މީހަކު ފިހިއްޖެ
މި ހާދިސާގައި އަނިޔާލިބުނީ ބަންގްލަދޭޝް ރައްޔިތަކަށް
އެމްއެންޑީއެފުން އަލިފާން ނިއްވުމުގައި ހަރަކާތްތެރިވަނީ
ފުވައްމުލަކުގައި ތެޔޮ ޓޭންކެއްގައި ރޯވެ ހިނގި އަލިފާނުގެ ހާދިސާއެއްގައި މީހަކު ފިހިއްޖެއެވެ.
މޯޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)ން ބުނި ގޮތުގައި، މި ހާދިސާ ހިނގާފައިވަނީ ގޭސް ކަޓަރެއް ބޭނުން ކޮށްގެން ޓޭންކުގެ މަސައްކަތެއް ކުރަން އުޅުމުގެ ތެރޭގައެވެ. އަލިފާން ރޯވެފައިވަނީ ފުވައްމުލަކު ދޫޑިގަން އަވަށޫގައި އޮތް "ދަ ހޯކްސް ފިއުލް"ގެ ތެޔޮ ޓޭންކެއްގައި ކަމަށް އެމްއެންޑީއެފުން ބުންޏެވެ.
އެމްއެންޑީއެފުން ބުނީ މި ހާދިސާގައި އަނިޔާވެފައިވަނީ އެ މަސައްކަތުގައި އުޅުނު ބަންގްލަދޭޝް ރައްޔިތަކަށް ކަމަށެވެ. އެ މީހާގެ ހާލު ސީރިއަސް ކަމަށް މައުލޫމާތު ލިބެއެވެ.
މި ހާދިސާގެ ރިޕޯޓް އެމްއެންޑީއެފަށް ލިބުނީ ހޯމަ ދުވަހުގެ މެންދުރު 3:06 ހާއިރުއެވެ. އަލިފާން ނިއްވުމުގައި ހަރަކާތްތެރިވީ އެމްއެންޑީއެފްގެ ސަދަން އޭރިއާ ފުވައްމުލަކު ފަޔަރ ސްޓޭޝަންގެ ސިފައިންނާއި ފުވައްމުލަކު އެއަރޕޯޓްގެ ފަޔަރމަނުންނެވެ.
