ރިސޯޓް ކުލި ނުދައްކާނަމަ އެގްރީމެންޓް ބާތިލު ކުރެވޭނެ ކަމަށާއި، ޓުއަރިޒަމް ސިޔާސީ ހަތިޔާރަކަށް ނުހައްދަވާނެ ކަމަށް ޓުއަރިޒަމް މިނިސްޓަރު ޑރ.އަބްދުﷲ މައުސޫމް ވިދާޅުވެއްޖެއެވެ.

މިނިސްޓަރު މިހެން ވިދާޅުވީ، ހޯމަ ދުވަހު ރައްޔިތުންގެ މަޖިލީހުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ. ޓުއަރިޒަމް މިނިސްޓަރު ވިދާޅުވީ، ކުލި ނުދައްކާ 18 ރިސޯޓަކަށް ނޯޓިސް ދެވިފައިވާ ކަމަށެވެ. މިނިސްޓަރު ވިދާޅުވީ، ރިސޯޓް ކުލި ނުދައްކާ ފަރާތްތަކުގެ އެގްރީމެންޓް ބާތިލު ކުރުމުގެ އިޚްތިޔާރު މިނިސްޓްރީއަށް އޮންނަ ކަމަށް އަދި އެއީ މުޅި އިޤްތިސާދަށް އެންމެ ރަނގަޅު ނިންމުމަކަށް ނުވާތީ މަސައްކަތް ކުރައްވަނީ ދެފަރާތުން ވާހަކަދައްކައިގެން އެކަމަށް ހައްލު ހޯދުމަށް ކަމަށެވެ. އެހެންނަމަވެސް މިއީ ދާއިމަށް މިކަން ކުރެވޭނެ ގޮތެއް ނޫންކަމަށާއި އެހެންކަމުން ދައުލަތަށް ލިބެންޖެހޭ އެ ފައިސާ ހޯދުމަށް މަސައްކަތް ކުރައްވާނެ ކަމަށް އަދި، ޓުއަރިޒަމް ސިޔާސީ ހަތިޔާރެއްގެ ގޮތުގައި ބޭނުމެއް ނުކުރައްވާނެ ކަމަށް މިނިސްޓަރު ވިދާޅުވިއެވެ.

މިނިސްޓަރު މަޖިލީހަށް ވަަޑައިގެންނެވީ، ވެލިދޫ ދާއިރާގެ މެންބަރު މުޙައްމަދު ޢަބްދުﷲ ޝަފީގް ކުރެއްވި ސުވާލަށް ޖަވާބު ދެއްވުމަށެވެ. މެމްބަރުވަނީ ނ.ވެލިދޫ ކައިރީ އޮންނަ ނ.ރާފުއްޓާއި، ނ.ދިއްދޫ ރިސޯޓު ތަރައްޤީކުރުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ރިޔާސީ ވަޢުދެއް ކަމަށް ވިދާޅުވެފައެވެ. އެހެންނަމަވެސް ސަރުކާރުން ނިންމަންޖެހާ ނިންމުންތައް ލަސްވަމުންދާތީ، އެ ދެ ރަށުގައި ރިޒޯޓު ތަރައްޤީކުރުމުގެ މަސައްކަތް އަދިވެސް ފަށާނެ ގޮތެއް ނުވާ ކަމަށާއި، ސަރުކާރުން ނިންމަންޖެހޭ ނިންމުންތައް ނިންމަވައި އެ ދެ ރަށުގައި ރިޒޯޓު ތަރައްޤީކުރުމުގެ ފުރުޞަތު ދެއްވާނީ ކޮން އިރަކުންތޯ ސުވާލުކުރައްވާފައެވެ.

މި ސުވާލަށް ޖަވާބު ދެއްވަމުން ޓުއަރިޒަމް މިނިސްޓަރު މައުސޫމް ވިދާޅުވީ، ރަށްތައް ނުހެދި ހުރުމަކީ އެންމެންގެ ކަންބޮޑުވުން ކަމަށެވެ. ނ.ރާފުއްޓަކީ އެމްއެމްޕީއާރްސީގެ ލިސްޓުގައި ހިމެނޭ ރަށެއް ކަމަށާއި، އެކަން ހައްލުކޮށް، ހައްގުތައް ބަދަލު ކުރުމުގެ ހުއްދަ ދެވިފައިވާކަމަށެވެ. އެހެންކަމުން އުންމީދަކީ ރަށުގެ ހައްގު ބަދަލު ކުރެވި އެރަށުގެ ތަރައްގީގެ މަސައްކަތް ފެށިގެން ދިޔުން ކަމަށެވެ. މިނިސްޓަރު ވިދާޅުވީ، ދިއްދޫ އަކީ މިނިސްޓްރީގެ ބެލުމުގެ ދަށުގައި އޮތް ރަށެއް ނޫން ކަމަށެވެ. އެރަށް ތަރައްގީ ކުރުމަށް ހައުސިން މިނިސްޓްރީން ޕްލޭންތައް ހެދި އެމަސައްކަތް ކުރިއަށްދާ ކަން މިނިސްޓަރު ފާހަގަކުރެއްވިއެވެ. މިނިސްޓަރު ވިދާޅުވީ، އެރަށުގެ އެއްބައި ލަގްޒަރީ ވިލާ އެޅުމަށްޓަކައި ހައުސިންގ މިނިސްޓްރީއިން މިހާރު ބިން ދޫކޮށްފައިވާކަމަށެވެ. ރަށުގެ އެއްބައި ދަނޑުވެރިކަމަށް ކަނޑައެޅިފައި އޮތްކަން މިނިސްޓަރު ފާހަގަކުރެއްވިއެވެ.

ރިސޯޓް ކުލީގެ ގޮތުގައި ނުލިބި ހުރި ފައިސާ އަހަރުން އަހަރަށް އިތުރުވަމުންދާތީ އޮޑިޓަރ ޖެނެރަލްވެސް ވަނީ ކަންބޮޑުވުން ފާޅުކުރައްވާފައެވެ. ދައުލަތުގެ އާމްދަނީގެ ގޮތުގައި މީރާއަށް ލިބެން ޖެހޭ ފައިސާގެ ތެރެއިން ނުލިބި ހުރި ފައިސާގެ 78 އިންސައްތައަކީ ރިސޯޓުތަކުގެ ކުއްޔާއި، އެއާ ގުޅޭ ޖޫރިމަނާގެ ފައިސާއެވެ. ޓޫރިސްޓް ރިސޯޓުތަކުގެ ކުއްޔާއި ޖޫރިމަނާގެ ގޮތުގައި ލިބެން ޖެހޭ 16.9 ބިލިޔަން ރުފިޔާގެ ތެރެއިން 13.5 ބިލިޔަން ރުފިޔާއަކީ ޖޫރިމަނާ އަދި އިންޓްރަސްޓްގެ ގޮތުގައި ލިބެން ޖެހޭ ފައިސާ އެވެ.