މެސީއަކީ އަބަދު ވެސް އެންމެ މޮޅު ކުޅުންތެރިޔާ: ގާޑިއޯލާ

ޕެރިސް ސެއިންޓް ޖަރމަން (ޕީއެސްޖީ)އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީއަކީ އަބަދުވެސް އެންމެ މޮޅު ކުޅުންތެރިޔާކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

މެސީއާއެކު ކުރިން ބާސެލޯނާގައި ދުވަސްތައް ހޭދަކުރި ގާޑިއޯލާއަކީ އަބަދުވެސް މެސީގެ މޮޅު ވާހަކަ ދައްކާ ކޯޗެކެވެ. މީގެ ކުރިން އެތައް ފަހަރެއްގެ މަތިން އޭނާ ވަނީ މެސީގެ މޮޅު ކުޅުމަށް ތައުރީފުކޮށްފައެވެ.

މެސީއާއެކު ހޭދަކުރެވުނު އެންމެ ފާހަގަކޮށްލެވޭ ވަގުތުތަކީ ކޮބައިތޯ އެހުމުން ގާޑިއޯލާ ބުނީ، އެތައް ބައިވަރު ވަގުތުގެ ހަނދާންތައް ހުންނާނެކަމަށެވެ. މިލިއަނުން ފާހަގަކުރެވޭވަރުގެ ކަންކަން ހުންނާނެކަމަށެވެ. އަދި ގާޑިއޯލާ ބުނީ މެސީއަކީ އެންމެ މޮޅު ކުޅުންތެރިޔާ ކަމަށާއި، އެއީ އެހާވެސް ފަސޭހަ ޖަވާބެއް ކަމަށެވެ.

މީގެ ކުރިން ގާޑިއޯލާ ބުނީ އޭނާ ބާސާއަށް ކޯޗުކަން ކޮށްދިން ދުވަސްވަރު މެސީ އެ ޓީމުގައި ހުރުމަކީ އާދައިގެ ކަމެއް ނޫންކަމަށެވެ. އަދި އޭނާގެ ކެރިއަރުގެ ހުރިހާވެސް އެއްޗަކީ މެސީ ކަމަށާއި، އޭނާ ކޮމްޕެޓެޓިވް މީހަކަށް ހެދީ މެސީކަމަށް ގާޑިއޯލާ ވަނީ ބުނެފައެވެ. ގާޑިއޯލާ ބުނީ މެސީ ނެތްނަމަވެސް އޭރު ބާސާއަށް ތަށި ހޯދުނީސް ކަމަށާއި، ނަމަވެސް މެސީ ނެތްނަމަ ބާސާގެ އެންމެ ރަން ދުވަސްވަރު ހޯދި ކާމިޔާބީތަކެއް ނުލިބުނީސްކަމަށެވެ.

ބާސާއާއެކު ގިނަ ކާމިޔާބީތަކަށް ހޯދާފައިވާ ގާޑިއޯލާ ބުނީ އޭނާގެ ކެރިއަރުގައި މޮޅެތި ކުޅުންތެރިންތަކަކާ ދިމާވެއްޖެކަމަށެވެ. ނަމަވެސް ހުރިހާ ގޮތަކުން ބަލާއިރުވެސް މެސީވަރުގެ މޮޅު ކުޅުންތެރިޔަކު އޭނާ ނުދެކޭ ކަމަށް ގާޑިއޯލާ ބުންޏެވެ.