މާލެއިން ކަރަންޓު ކެނޑުމަށް ދިމާވި މައްސަލަ ހައްލު ކުރުމަށް އައު ކޭބަލް މިހާރު އަޅާފައި ވާކަމަށާއި، އެ ކޭބަލުން ކަރަންޓު ދީފައިވާކަމަށް ސްޓެލްކޯއިން ބުނެފިއެވެ.

އަންގާރަ ދުވަހު މުޅި މާލެއިން އެކި ވަގުތުތަކުގައި ވަނީ ކަރަންޓު ކެނޑިފައެވެ. އެކަމާއި ގުޅިގެން އެދުވަހު ބޭއްވި ނޫސްވެރިންގެ ބައްދަލުވުމެއްގައި ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް ވިދާޅުވީ މައްސަލަ ޖެހުނު ކޭބަލް ރަނގަޅުކޮށް ދާއިމީ ހައްލެއް ގެންނަން ދެ ދުވަހެއް ވަރު ނަގާނެކަމަށެވެ. ގާކޮށި ކައިރީގައި ހުރި ސަބް ސްޓޭޝަންއާއި ހަމައަށް އިތުރު ކޭބަލްއެއް އެޅުމަށް މާލެ ސިޓީ ކައުންސިލާއެކު މަޝްވަރާތަކެއް ކުރަމުންދާ ކަމަށް ޝަރީފް ވިދާޅުވިއެވެ.

ހުކުރު ދުވަހު ސްޓެލްކޯއިން ކުރި ޓްވީޓެއްގައި ބުނެފައިވަނީ ޑިސްޓްރިބިއުޝަން ނެޓްވޯކްގެ ގެއްލުންވެފައިވާ ކޭބަލްގެ ބަދަލުގައިއަލަށް އަޅާފައިވާ ކޭބަލް ސަބްސްޓޭޝަނާއި ގުޅާލައި، އެނާޖައިޒް ކުރުމަށް ހުކުރު ދުވަހުގެ ހަވީރު 4:00ގައި ގާކޮށި ފްލެޓްތައް ހިމެނޭ ސަރަހައްދުން 20 މިނެޓަަށް ކަރަންޓު ކެނޑިގެންދާނެކަމަށެވެ.

އެކަމާއި ގުޅޭ އިތުރު ތަފްސީލު "ރާއްޖެއެމްވީ" އަށް ދެމުން ސްޓެލްކޯގެ މީޑިޔާ އޮފިޝަލް އަހުމަދު މުހައްމަދު ވިދާޅުވީ އައު ކޭބަލް އާއިއެކު މިހާރު އެމަސައްކަތް ނިމިފައިވާކަމަށެވެ. އަދި ހޮނިހިރު ދުވަހުގެ ހެނދުނު ޓެކްނިކަލް ކުޑަ މަސައްކަތެއް ކުރާނެކަމަށާއި އެއާއެކު މުޅި މިމައްސަލައަށް ހައްލު އައީކަމަށެވެ.

އަންގާރަ ދުވަހު މާލޭގެ ބޮޑު ސަރަހައްދަކުން ކަރަންޓު އެންމެ ފުރަތަމަ ކެނޑުނީ ފަތިހު ހަތަރެއްޖަހާ އެހާކަންހާއިރުއެވެ. އަދި 7:30 އެހާކަންހާއިރު މުޅި މާލެއިން ކަރަންޓު ކެނޑުނެވެ. އަދި ކަރަންޓު ކެނޑުމާއެކު ގިނަ ޚިދުމަތްތަކަކަށް ބުރޫއަރާފައިވެއެވެ. މިގޮތުން ބައެއް ސްކޫލްތަކުގެ ހެނދުނު ދަންފަޅީގެ ކިޔެވުންވެސް ކެންސަލްކޮށްފައިވެއެވެ.