ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ގެކޮޅުގައި ދަމާފައިހުރި ބެނާއެއް ނެގުމަށް ކޯޓު އަމުރު ހޯދުމަށް އިންވެސްޓިގޭޝަން އޮފިސަރެއްގެ ލޮގިން ބޭނުންކޮށްގެން ކްރައިމް އިންވެސްޓިގޭޝަން ކޮމާންޑްގެ ހެޑް އެސިސްޓަންޓް ކޮމިޝަނަރ އޮފް ޕޮލިސް މުހައްމަދު ރިޔާޒު ކޯޓު އަމުރަށް އެދުނުކަމަށް ބުނެ ދިޔަރެސް ނޫހުން އާންމުކޮށްފައިވާ މައުލޫމާތަކީ ދޮގު މައުލޫމާތެއްކަމަށް ދިވެހި ފުލުހުންގެ ޚިދުމަތުން ބުނެފިއެވެ.
އެކަން ހާމަކޮށް ފުލުހުން ނެރެފައިވާ ބަޔާނުގައި ބުނެފައިވަނީ ދިވެހި ފުލުހުންގެ ޚިދުމަތުގައި ކޯޓު އަމުރަށް އެދުމުގެ އުސޫލު ހަމަޖެހިފައި އޮންނަނީ އިންވެސްޓިގޭޝަން އޮފިސަރެއްގެ ސުޕަވައިޒަރު އެޕްރޫވް ކުރުމުން ކޯޓުއަމުރު ރިކުއެސްޓު ކޮމްޕިއުޓަރ ސިސްޓަމުން ޖެނެރޭޓްވާ ގޮތަށްކަމަށެވެ. ޔާމީންގެ ގެކޮޅުން ބެނާ ނެގުމުގެ އަމުރަށް އެދިފައިވަނީވެސް މިއުސޫލުންކަމަށް ފުލުހުން ބުނެއެވެ.
އެގޮތުން މިމައްސަލައިގައިވެސް ކޯޓު އަމުރު ރިއުއެސްޓް ޖެނެރޭޓުކޮށްފައިވަނީ އިންވެސްޓިގޭޝަން އޮފިސަރ ރިކުއެސްޓް ކުރުމުން ސުޕަވައިޒަރު އެޕްރޫވްކުރުމުންކަމަށް ފުލުހުން ބުނެއެވެ.
މީގެއިތުރުން މިކަމާއި ގުޅޭގޮތުން ދިޔަރެސް ނޫހުގައި ލިޔެފައިވާ އާޓިކަލްގައި ފުލުހުންގެ މީޑިޔާއިން މިކަމާއި ގުޅޭގޮތުން ޖަވާބެއް ދީފައިނުވާކަމަށް ބުނެފައިވާ ބުނުމަށްވެސް ފުލުހުން ވަނީ ޖަވާބު ދީފައެވެ. އެގޮތުން މިކަމާއި ގުޅޭ ސުވާލެއް މެއި 27 ވީ ހުކުރު ދުވަހުގެ ހެނދުނު 10:11 އެހާކަންހާއިރު ވަޓްސްއެޕް މެދުވެރިކޮށް ފޮނުވާފައިވާކަމަށް ފުލުހުން ބުނެއެވެ. ނޫސްވެރިންނަށް މައުލޫމާތު ދިނުމަށް ދެ ފޯނު ނަންބަރު ކަނޑައެޅިފައިވީނަމަވެސް އެއިން އެއްވެސް ނަންބަރަކަށް ގުޅުމަކާ ނުލައި ފޮނުވި މެސެޖު ލިބުނުކަންވެސް ޔަގީންކުރުމަކާނުލައި އޭގެ ކުޑަވަގުތު ކޮޅެއް ފަހުން ވަނީ މިކަމާއި ގުޅޭގޮތުން ފުލުހުންނާއި ސުވާލުކުރުމުން ޖަވާބު ނުދޭކަމަށްބުނެ އެއާޓިކަލް ޝާއިއުކޮށްފައިކަމަށް ފުލުހުން ބުނެއެވެ.
އެހެންކަމުން، ދިވެހި ފުލުހުންގެ ޚިދުމަތުން ނޫސްވެރިން ބޭނުންވާ މައުލޫމާތު ފޯރުކޮށްދިނުމަށް ހަމަޖައްސާފައިވާ ގޮތްތައް ބޭނުން ކޮށްގެން މިކަމާއި ގުޅޭ ޞައްހަ މައުލޫމާތު ހޯދުމަށް އެކަށީގެންވާ ގޮތެއްގައި މަސައްކަތްކޮށްފައިނުވާކަމަށް ފުލުހުން ބުނެއެވެ. އަދި ފުލުހުންގެ މަސައްކަތާއި ގުޅޭގޮތުން ދޮގު މައުލޫމާތު ނުފެތުރުމަށްވެސް ވަނީ އިލްތިމާސްކޮށްފައެވެ.
ބޮޑުތަކުރުފާނު މަގުގައި ހުންނަ, ކުރީގެ ރައީސް އަބްދުﷲ ޔާމީންގެ ގެކޮޅުގައި ދަމާފައިހުރި އިންޑިއާ އައުޓް ބޮޑު ބެނަރ ފުލުހުން ނަގާފައިވަނީ ކޯޓު އަމުރެއްގެ ދަށުން އޭޕްރީލް 21 ވަނަ ދުވަހުއެވެ. ބެނާ ނަގާފައިވާ ދުވަހު ސިޔާސީ ބޭނުމެއްގައި, ވަކި ގައުމަކާ ދެކޮޅަށް ރާވައިގެން ހިންގާ ކެމްޕޭނުތަކަކީ ގައުމީ ސަލާމަތާ ގުޅުންހުރި, އަދި ނުރައްކާ އޮތް ކަމެއް ކަމަށްވާތީ އެފަދަ ހަރަކާތްތައް ހުއްޓުވުމަށް ކަނޑައަޅައި, ތަންފީޒުކުރުމަށް ދައުލަތުގެ ކަމާބެހޭ އެންމެހައި އިދާރާތަކަށް އަންގައި، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ގަރާރެއްވެސް ނެރުއްވާފައެވެ.
އަނެއްކޮޅުން ޔާމީންގެ ގެކޮޅުގައި ހަރުކޮށްފައިވާ އިންޑިއާ އައުޓް ބޮޑު ބެނަރ ނެގި މައްސަލައިގެ އިސްތިއުނާފު އަޑުއެހުންތައް ހައިކޯޓުގައި އަންނަނީ ކުރިޔަށް ގެންދަމުންނެވެ.
