200 މީޓަރު ދުވުމުގެ ރެކޯޑުވެސް ނާހިލް މުގުރާލައިފި

މިހާރު ކުރިއަށްދާ 23 ވަނަ އިންޓަރ ސްކޫލް އެތުލެޓިކްސް ޗެމްޕިއަންޝިޕްގެ 200 މީޓަރު ދުވުމުގެ ރެކޯޑު ގދ. އަތޮޅު ތައުލީމީ މަރުކަޒުގެ ދަރިވަރު ނާހިލް ނިޒާރު މުގުރާލައިފިއެވެ.

ނާހިލް މި ރެކޯޑު މުގުރާލީ މިއަދު ހަވީރު އޮތް 17 އަހަރުން ދަށުގެ 200 މީޓަރު ދުވުމުން އެއްވަނާގައި ރޭސް ނިންމައިގެންނެވެ. ނާހިލް ވަނީ 23.2 ސިކުންތުގެ ތެރޭގައި ރޭސް ނިންމާފައެވެ. މީގެ ކުރިން މުބާރާތުގެ 200 މީޓަރު ރެކޯޑު އޮންނަނީ ގދ. އަތޮޅު ތައުލީމީ މަރުކަޒުގެ އިސްދަރިވަރު ރާހިލް ވާފިރު އަތުގައެވެ. ރާހިލް އޭރު ރެކޯޑު ހަދާފައިވަނީ 23.8 ސިކުންތުން ރޭސް ނިންމައިގެންނެވެ.

މިއީ ނާހިލް މުބާރާތުގައި މުގުރާލި ދެވަނަ ރެކޯޑެވެ. ނާހިލް ވަނީ މުބާރާތުގައި 100 މީޓަރު ދުވުމުންވެސް ރެކޯޑު ހަދާފައެވެ. 100 މީޓަރު ދުވުމުގައިވެސް މީގެ ކުރިން ރެކޯޑު އޮންނަނީ ރާފިލް އަތުގައެވެ. ރާފިލް ވަނީ 11.7 ސިކުންތުގެ ތެރޭގައި ރޭސް ނިންމައިގެން ރެކޯޑު ހަދާފައެވެ. ނަމަވެސް މިއަހަރުގެ މުބާރާތުގައި ނާހިލް އެރެކޯޑު މުގުރާލީ 11.2 ސިކުންތުން ރޭސް ނިންމައިގެންނެވެ.

ރާއްޖެޓީވީއަށް ދިން އިންޓަރވިއުއެއްގައި ނާހިލް ބުނީ، އޭނާގެ އަމާޒަކީ ލޯންގް ޖަމްޕުގެ ރެކޯޑުވެސް މުގުރާލުން ކަމަށެވެ. ލޯންގް ޖަމްޕު އިވެންޓަށް ނާހިލް ނިކުންނާނީ މާދަމާ ހަވީރުއެވެ.