ސަލީބާއާމެދު އާސެނަލްގެ ވިސްނުން ބަދަލެއް ނުވޭ

އިނގިރޭސި ޕްރިމިއަރ ލީގުގެ އާސެނަލަށް ކުޅެމުން އަންނަ ފްރާންސްގެ ޑިފެންޑަރު ވިލިއަމް ސަލީބާއާ މެދު އެ ޓީމުން ގެންގުޅޭ ވިސްނުން ބަދަލުނުވާކަން ހާމަކޮށްފިއެވެ.

މިކަން ހާމަކޮށްފައިވަނީ އިތުބާރު ކުޅިވަރު ނޫސްވެރިޔާ ފެބްރީޒިއޯ ރޮމާނޯއެވެ. ރޮމާނޯ ބުނި ގޮތުގައި ސަލީބާ އާސެނަލްގައި ބެހެއްޓުމަށް އެ ޓީމުން ގެންގުޅޭ ވިސްނުން ބަދަލުނުވާކަމަށެވެ. އަދި އާސެނަލުން ދެކޭ ގޮތުގައި އޭނާ އަކީ އެ ޓީމަށް މިހާރު ވެސް އަދި މުސްތަގުބަލުގައި ވެސް މުހިންމު ކުޅުންތެރިއެއް ކަމަށެވެ. މީގެ އިތުރުން އަންނަ ސީޒަނުގައި ސަލީބާ އާސެނަލްގައި ބެހެއްޓުމަށް އެ ޓީމުގެ ކޯޗު މިކޭލް އާޓެޓާ އާއި ޓެކްނިކަލް ޑިރެކްޓަރު އެޑުއާޑޯ ބޭނުންވެއެވެ.

ސަލީބާގެ ކޮންޓްރެކްޓް އައު ކުރުމާ ގުޅޭ ގޮތުން ކުރިއަށް އޮތް ދުވަސްތަކުގައި އޭނާއާ މަޝްވަރާ ކުރާނެ ކަމަށާއި، ގޮތް ނިންމާނީ ސަލީބާ ކަމަށް ރޮމާނޯ ބުންޏެވެ. އާސެނަލުން މި ސީޒަން ނިންމާލީ ޕްރިމިއަރ ލީގުގެ ފަސް ވަނަ މަގާމުގައި އޮވެއެވެ. އެ ޓީމު އަންނަ ސީޒަނުގެ ޔުއެފާ ޔޫރޮޕާ ލީގުގައި ވާދަ ކުރާނެއެވެ.

ސަލީބާ ވަނީ 2019 ވަނަ އަހަރު އާސެނަލަށް ބަދަލުވި ފަހުން ލޯނު އެއްބަސްވުމެއްގެ ދަށުން ފްރާންސް ލީގުގެ ތިން ޓީމަކަށް ކުޅެފައެވެ. އެއީ ސެއިންޓް އެޓިއޭން، ނީސް އަދި މާސެއިލްއެވެ. އުމުރުން 21 އަހަރުގެ ސަލީބާ އަންނަނީ ފްރާންސްގެ ގައުމީ ޓީމަށް ވެސް ކުޅެމުންނެވެ.