ފިލިޕީންސްގެ ރައީސްކަމާ ދެން ހަވާލުވެވަޑައިގަންނަވާނީ ފަރޑިނަންޑް މާކޯސް ޖޫނިއަރ ކަމަށް ކަނޑައަޅައި އެގައުމުގެ ގާނޫނުހަދާ މަޖިލީސް ނުވަތަ ކޮންގްރެސްގެ ޖޮއިންޓް ސެޝަންއަކުން ބުދަ ދުވަހު އެކަން ފާހަގަކޮށްފިއެވެ. ބޮންގ ބޮންގ މާކޯސް ގެ ނަމުން އާންމުން ދަންނަ ފަރޑިނަންޑް މާކޯސް ޖޫނިއަރއަކީ ފިލިޕީންސްގެ ކުރީގެ ރައީސް މާކޯސްގެ ދޮށީ ދަރިކަލުންނެވެ. ބުދަދުވަހުގެ ކޮންގްރެސްގެ ބައްދަލުވުމުގައި ބޮންގ ބޮންގ މާކޯސްއަށް "ސަރޓިފިކެޓް އޮފް ޕްރެޒިޑެންސީ" އެރުވުމުގެ ކުރިން އޭނާގެ މަންމާފުޅު، ކުރީގެ ފަސްޓްލޭޑީ އިމެލްޑާ މާކޯސް ވެސް ބޮންގ ބޮންގގެ އަރިހުގައި ސްޓޭޖްމަތީގައި މަޑުކޮށްލައްވާފައިވެއެވެ.

ބޮންގ ބޮންގ މާކޯސްގެ ރައީސްކަމުގެ ދައުރު ފައްޓަވައި، މަގާމާ ހަވާލުވެވަޑައިގަންނަވާނީ ޖޫން މަހުގެ 30 ވަނަ ދުވަހުއެވެ. އަދި މިދައުރު 2028އާ ހަމައަށް ދެމިއޮންނާނެއެވެ.

ބޮންގ ބޮންގ މާކޯސްގެ ނައިބަކަށް ހޮވިވަޑައިގެންފައިވަނީ މިހާރުގެ ރައީސް ރޮޑްރިގޯ ޑުޓާޓޭގެ ދަރިކަނބަލުން ސާރާ ޑުޓާޓޭއެވެ.

އުމުރުފުޅުން 64 އަހަރުގެ ބޮންގ ބޮންގ މާކޯސްއަށް ރިޔާސީ އިންތިޚާބުގައި 31.6 މިލިއަން ވޯޓް ލިބިވަޑައިގެންފައި ވެއެވެ. އެއީ ވޯޓުލީ މީހުންގެ 58.77 އިންސައްތައެވެ.

މޭމަހުގެ 9 ވަނަ ދުވަހު އޮތް ފިލިޕީންސް ރިޔާސީ އިންތިޚާބުގައި، ވޯޓުލެވޭ އާބާދީގެ 82 އިންސައްތަ މީހުން ވޯޓުލާފައިވާކަމަށްވެއެވެ.