ށ މިލަންދޫގައި ޒުވާން މާބަނޑު އަންހެނަކު މަރުވެފައި އޮއްވާ ފެނިއްޖެ

ށ. މިލަންދޫގައި 21 އަހަރުގެ މާބަނޑު އަންހެނެއްގެ ޚަބަރެއް ނުވެގެން ކޮޓަރި ބެލިއިރު މަރުވެފައި އޮއްވާ ހޮނިހިރު ދުވަހުގެ ރޭ ފެނިއްޖެ އެވެ.

ފުލުހުން ބުނީ އެ ރަށު ލިވަޕޫލް، ފާތުމަތު ޝަރުމާ މަރުވި އިރު އޭނާގެ ބަނޑަށް ހަ މަސް ކަމަށެވެ.

މިލަންދޫ ސިއްހީ މަރުކަޒަށް އޭނާ ގެންދިޔައީ، އާއިލާއާ ހަވާލާދީ ފުލުހުން ބުނާ ގޮތުގައި، ކޮޓަރި ތެރެއަށް ވެއްޓިފައި އޮއްވާ ފެނިގެންނެވެ. އޭރު އޭނާގެ ހޭ ވެސް ނެތް ކަމަށާއި ހޮސްޕިޓަލަށް ގެންދިޔަ އިރު ވެސް އޮތީ މަރުވެފައި ކަމަށް ފުލުހުން ބުނެ އެވެ.

މީގެ އިތުރުން ފުލުހުން ބުނީ ޝަރުމާގެ މަރާމެދު ޝައްކު ކުރެވޭ އެއްވެސް ކަމެއް ފާހަގަ ކުރެވިފައި ނުވާކަމަށެވެ.

މިލަންދޫ ކައުންސިލް މެމްބަރަކު ވިދާޅުވެފައިވަނީ އަލަތު ދަރިފުޅަށް ބަލިވެއިން ޝަރުމާއާއެކު އެ ގޭގައި ދިރިއުޅެމުން އަންނަނީ އޭނާގެ މަންމަ ކަމަށެވެ. ޝަރުމާގެ ފިރިމީހާ އާއި ބައްޕަ މަސައްކަތް ކުރަނީ ރިސޯޓެއްގައި ކަމަށް ވެސް އޭނާ ވިދާޅުވި އެވެ.

ކައުންސިލް މެންބަރު ވިދާޅުވެފައިވާ ގޮތުގައި އޭނާ މަރުވެފައި އޮއްވާ ފެނުނީ ޚަބަރެއް ނުވެގެން ގޭ މީހުން ކޮޓަރިއަށް ވަދެ ބެލުމުން ކަމަށާއި އޭރު ޝަރުމާ ވެއްޓިފައި އޮތް ކަމަށެވެ.

މި ހާދިސާއާ ގުޅިގެން ޝަރުމާގެ މަންމަ ހާލު ދެރަވެގެން ސިއްހީ މަރުކަޒުގައި ވަނީ އެޑްމިޓްކޮށްފަ އެވެ.