އޭސީސީން މައްސަލަތަކުގައި އިސްކަންދޭނެ އުސޫލު އެކުލަވާލާ އަމަލުކުރަން ފަށައިފި
24 މެއި 2022 | އަންގާރަ 16:34ތަޙުޤީޤުކުރަމުންދާ މައްސަލައަކަށް އިސްކަންދެވޭނެ މަރުޙަލާތަކާއި، ޢާންމު އުޞޫލެއްގެ ގޮތުން ޚާއްސަ އިސްކަމެއް ދީގެން މައްސަލަ ތަޙުޤީޤުކުރުމަށް ނިންމާނެ ޙާލަތްތައް ކަނޑައަޅާފައިވޭ
އެންޓި-ކޮރަޕްޝަން ކޮމިޝަން މެމްބަރުން
އެންޓިކޮރަޕްޝަން ކޮމިޝަން (އޭސީސީ) އަށް ހުށަހެޅޭ މައްސަލަތައް ތަޙުޤީޤުކުރުމުގައި އިސްކަންދޭނެ ގޮތުގެ މިންގަނޑުތައް އެކަށައަޅައި، މައްސަލަތައް ތަރުތީބުކުރުމުގައި ޢަމަލުކުރާނެ ގޮތުގެ އުޞޫލެއް އެކުލަވާލައި ޢަމަލުކުރަންފަށައިފިއެވެ.
އޭސީސީން ބުނީ މި އުޞޫލުގެ ދަށުން ކޮމިޝަނަށް ހުށަހެޅޭ މައްސަލައެއް ނުވަތަ ކޮމިޝަނުން ތަޙުޤީޤުކުރަމުންދާ މައްސަލައަކަށް އިސްކަންދެވޭނެ މަރުޙަލާތަކާއި، ޢާންމު އުޞޫލެއްގެ ގޮތުން ޚާއްސަ އިސްކަމެއް ދީގެން މައްސަލަ ތަޙުޤީޤުކުރުމަށް ނިންމާނެ ޙާލަތްތައް ކަނޑައަޅާފައި ވާނެކަމަށެވެ.
މި އުޞޫލަކީ ކޮމިޝަނަށް ހުށަހެޅޭ މައްސަލަތަކުގެ ތެރެއިން ވަކި މައްސަލައަކަށް އިސްކަންދީގެން ތަޙުޤީޤުކުރުމުގައި ޢަމަލުކުރެވެނީ އެއް ހަމައަކުން، ދެފުށް ފެންނަ ގޮތުގައިކަން ޔަޤީންކުރުމަށާއި، އަދި މައްސަލަތައް ތަޙުޤީޤުކުރުމުގައި ޢަމަލުކުރެވެނީ ޖަވާބުދާރީ ކުރެވެނިވި ނިޒާމެއްގެ ތެރެއިންކަން ކަށަވަރުކުރުމަށް އެކުލަވާލާފައިވާ އުސޫލެކެވެ. އަދި ވަކި މައްސަލައަކަށް އިސްކަންދީގެން ތަޙުޤީޤުކުރުމަށް ނިންމާ ނިންމުމަކީ ޒާތީ ތަޢައްސުބުންނާއި ނުފޫޒުން އެއްކިބާވެ ތިބެ ނިންމާ ނިންމުމެއްކަން ކަށަވަރުކުރުމުގެ މަޤްޞަދުގައި އެކުލަވާލާފައިވާ އުޞޫލެއްކަމަށް އޭސީސީން ބުނެއެވެ.
މިއުސޫލުގައި ވާގޮތުން ޚާއްސަ އިސްކަމެއްދީގެން ބަލާނެ ހާލަތްތަކުގެ ގޮތުގައި ވަނީ 14 ހާލަތެކެވެ. އޭގެތެރޭގައި ހިމެނެނީ:
- ވަކި މުއްދަތެއްގެ ކުރިން ނުވަތަ އަވަހަށް ކޮމިޝަނުން މައްސަލަ ތަހުގީގުކޮށް ނުނިންމައިފިނަމަ، ދައުލަތަށް އިއާދަނުކުރެވޭފަދަ ބޮޑު ގެއްލުމެއް ލިބިދާނެކަމުގެ އިހުތިމާލު އޮތުން
- އާންމު މަސްލަހަތާއި ގުޅިފައިވާ މައްސަލައަކަށްވުން
- މައްސަލައިގެ ހެކި ނައްތާލަފާނެކަމުގެ އިހުތިމާލު އޮތުން
- މައްސަލައިގައި ހިމެނޭ ފައިސާގެ އަދަދަށް ރިޢާޔަތްކޮށްގެން
- މައްސަލައިގައި ތުހުމަތުކުރެވޭ ފަރާތް ކުށްކުރިއިރު ހުރި ނުވަތަ މައްސަލަ ތަހުގީގުކުރާއިރު ހުރި މަގާމަށް ރިޢާޔަތްކޮށްގެން
- މައްސަލައާ ގުޅިގެން ދައުލަތުގެ މަޝްރޫއެއް އެއްވެސް އިދާރާއަކުން ހުއްޓުވާފައިވުން ނުވަތަ މަޑުޖައްސާފައިވުން
- މައްސަލައިގައި ލިބިފައިވާ ހެކި ގަރީނާ ވަޒަންކުރުމަށްފަހު ދައުވާ ކުރުމުގެ ފުރުސަތު ބޮޑު ކަމަށް ބެލެވޭ މައްސަލައަކަށްވުން
