ސްޕެނިޝް ލަލީގާ: ރޮނާލްޑޯގެ ލަނޑުން ރެއާލްއަށް މޮޅެއް

ސްޕެނިޝް ލަލީގާގައި ކްރިސްޓިއާނޯ ރޮނާލްޑޯ ޖަހައިދިން ލަނޑުން ރެއާލް މެޑްރިޑް ކުޅުނު މެޗުން އެ ޓީމު މޮޅުވެއްޖެއެވެ.

ހޮނިހިރު ދުވަހުގެ ރޭ އަމިއްލަ ދަނޑުގައި މަލާގާއާއި ދެކޮޅަށް ކުޅުނު މެޗުން ރެއާލް މޮޅުވީ 3-2 ގެ ނަތީޖާއަކުންނެވެ. ރީތި ފުޓްބޯޅައެއް ފެނިގެންދިޔަ މި މެޗުގައި ދެ ޓީމުން ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސް ކޮށްފައެވެ. މި މެޗުގެ ފުރަތަމަ ލަނޑު ޖަހާ ލީޑު ނަގާފައިވަނީ ރެއާލްއިންނެވެ. އެގޮތުން މެޗުގެ ނުވަވަނަ މިނެޓުގައި މި ލަނޑު އެ ޓީމަށް ޖަހައިދިނީ ފްރާންސްގެ ފޯވާޑް ކަރިމް ބެންޒެމާއެވެ. މި ލަނޑަކީ ރޮނާލްޑޯ ބޮލުން ފޮނުވާލި ހަމަލާއެއް މަލާގާގެ ގޯލުގެ ދަނޑީގައި ޖެހުމަށް ފަހު ކުޅުމުގެ ތެރެއަށް އަނބުރާ އައުމުން ރީބައުންސްގައި އޭނާ ޖެހި ލަނޑެކެވެ.

އެހެން ނަމަވެސް މެޗުގެ 18 ވަނަ މިނެޓުގައި ކީކޯގެ އެހީތެރިކަމާއެކު ޑިއޭގޯ ރޯލާން ވަނީ ލަނޑެއް ޖަހައި މަލާގާއަށް މެޗުގެ ނަތީޖާ އެއްވަރުކޮށްދީފައެވެ. މަލާގާއިން ލަނޑުޖެހިތާ ދެ މިނެޓު ނުވަނީސް ކްރޫސް ނަގައިދިން ކޯނަރަކުން ބޮލުން ލަނޑެއް ޖަހައިދީ ކަސެމީރޯވަނީ އަލުން އަނބުރާ ރެއާލްއަށް ލީޑު ނަގައިދީފައެވެ.

ފުރަތަމާ ހާފު ރެއާލް ކުރީގައި އޮވެގެން ނިމިގެންދިޔައިރު ދެވަނަ ހާފުގައި ވެސް ދެ ޓީމުން ވަނީ ފޯރިގަދަ ކުޅުމެއް ދައްކާފައެވެ. އެގޮތުން މި ހާފުގައި ގޮންޒާލޯ ކާސްޓްރޯ ވަނީ ލަނޑެއް ޖަހައިދީ އަނެއްކާވެސް މަލާގާއަށް މެޗުގެ ނަތީޖާ ހަމަހަމަ ކޮށްދީފައެވެ. ދެ ޓީމު އެއްވަރުވެއޮވެ މެޗު ނިމެން ދަނިކޮށް ރެއާލްއިން މެޗުގެ ލީޑު ނެގީ 76 ވަނަ މިނެޓުގައެވެ. މި ލަނޑަކީ އެ ޓީމަށް ލިބުނު ޕެނަލްޓީގައި ރޮނާލްޑޯ ފޮނުވާލި ބޯޅަ މަލާގާގެ ކީޕަރު އަތުގައި ޖެހުމަށް ފަހު އަލުން ކުޅުމުގެ ތެރެއަށް އައުމުން އޭނާ ޖެހި ލަނޑެކެވެ.

މި މެޗުގައި ރޮނާލްޑޯ އަދި ބެންޒެމާގެ ފަރާތުން ފެނިގެން ދިޔަ ލަނޑުތަކަކީ އެ ކުޅުންތެރިން މި ސީޒަނުގެ ސްޕެނިޝް ލަލީގާގައި މިހާތަނަށް ޖެހި ދެވަނަ ލަނޑެވެ.

ލަލީގާގައި ސެލްޓަ ވީގޯ ވަނީ އަމިއްލަ ދަނޑުގައި 1-0 އިން ލެގާނޭސް ބަލިކޮށްފައެވެ. ހަމައެހެންމެ އެއިބާ ވަނީ 2-1 ގެ ނަތީޖާއަކުން އަލަވޭސް ބަލިކޮށްފައެވެ.

ރެއާލްގެ މި މޮޅާއެކު އެ ޓީމު އޮތީ ކުޅުނު 13 މެޗުން ލިބުނު 27 ޕޮއިންޓާއެކު ތާވަލުގެ ތިންވަނައިގައެވެ. އަންނަ މަހުގެ ތިންވަނަ ދުވަހު އެ ޓީމު ދެން ކުޅޭ މެޗުގައި ނުކުންނާނީ އެތްލެޓިކް ބިލްބާއޯއާއި ދެކޮޅަށެވެ.