މިދިޔަ 30 އަހަރުގެ ތެރޭގައި ވޮލީއަށް އަންނަ އެންމެ ބޮޑު ބަދަލު!
24 މެއި 2022 | އަންގާރަ 09:12ކޮލިފައިވާ ކޮންމެ ޓީމަށް އެއްލައްކަ ރުފިޔާވެސް ދޭނެ
ޓެކްނިކަލް ކޮމިޓީގެ ޗެއަރ ކާއްޓޭ
ރާއްޖޭގެ ވޮލީބޯޅައަށް މިއަހަރު މިގެންނަ ބަދަލަކީ މިދިޔަ 30 އަހަރަށް ބަލާއިރުވެސް އަންނަ އެންމެ ބޮޑު ބަދަލުކަމަށް ޤައުމީ ވޮލީ ޓީމްގެ ކުރީގެ ކެޕްޓަން އަދި ކޯޗު މުހައްމަދު ސާޖިދު (ކާއްޓޭ) ބުނެފިއެވެ. ރާއްޖެ ޓީވީގެ "ކުޅިވަރު ފައިލް" ޕްރޮގްރާމްގައި ވާހަކަދައްކަމުން އޭނާ ބުނީ މުބާރާތަށް ކޮލިފައިވާ ހަ ޓީމަށް ބިދޭސީ މޮޅު ކުޅުންތެރިން އެސޯސިއޭޝަނުން ދިނުމަކީ ކުލްބަތްއަ ބާރުވެރިކުރުމަށާއި, މުބާރާތުގެ ވާދަވެރިކަމަށްވެސް ވަރަށްބޮޑު ބަދަލެއް އަންނާނެކަމެއް ކަމަށެވެ.
އެސޯސިއޭޝަންގެ ޓެކްނިކަލް ކޮމިޓީގެ ޗެއަރމަން ކާއްޓޭ ބުނީ ކޮންމެ ކްލަބަކަށް މޮޅު ތިން ކުޅުންތެރިން ދިނުމުން މުބާރާތުގައި ވާދަކުރާ ކޮންމެ ޓީމެއްވެސް ވާނީ ތަށްޓަށް ވާދަކުރާ ވަރުފަދަ ޓީމަކަށްކަމަށެވެ. އަދި ރާއްޖޭގެ ޤައުމީ ޓީމްގެ އެއްވެސް ކުޅުންތެރިއަކު މިބަދަލާ ގުޅިގެން ބެންޗްގައި ނީންނާނެކަމަށެވެ. ކޮންމެ ކުޅުންތެރިއަކުވެސް ވަރުގަދަ 41 މެޗު ކުޅޭނެކަން އޭނާ ފާހަގަކުރިއެވެ.
މިބަދަލުގެ ސަބަބުން ޤައުމީ ޓީމަށް ކުރާނެ ފައިދާ ފާހަގަކުރަމުން ކާއްޓޭ ބުނީ މީގެކުރިން ރާއްޖެއިން ބޭރުގައި ހަދާ ޓްރެއިނިންގ ތަކުގައި ކުޅޭ މެޗުތަކުން އެއްވެސް ޕެރްޝަރެއް ނޯންނަކަމަށެވެ. އެކަމަކު މިހާރު ކުޅުންތެރިންނަށް ލިބޭނީ ޕްރެޝަރުގައި ރަނގަޅު މޮޅު ކުޅުންތެރިންނާއެކު 41 މެޗު ކުޅެލަން ކަމަށާއި, މިއީ ޓްރެއިނިންގ ކޭމްޕާ ނުބައްދަލު ކުރިއެރުމެއްކަމަށެވެ.
ކޮންމެ ޓީމަކަށް ތިން ކުޅުންތެރިން ދިނުމުގެ އިތުރުން އެހެން ޚަރަދުތައް ކުރުމަށް ކޮންމެ ޓީމަކަށް އެއްލައްކަ ރުފިޔާ ދިނުމަށްވެސް އެސޯސިއޭޝަނުން ވަނީ ނިންމާފައެވެ. ފުރަތަމަ މަރުހަލާގައި މިއެހީތެރިކަން ދެނީ ފިރިހެން ޑިވިޝަންގެ ހަ ޓީމަށެވެ. މިއީ މިހާތަނަށް އެސޯސިއޭޝަނުން ކްލަބްތަކަށްދޭ އެންމެ ބޮޑު ސަޕޯޓްކަން ކާއްޓޭ ފާހަގަކުރިއެވެ.
