ވޮލީބޯލް އެސޯސިއޭޝަނުން ބާއްވާ އެސޯސިއޭޝަން ކަޕްގެ ޕްރެލިމިނަރީ ބުރުގެ ދެވަނަ ހޯދައި އޮއްފު އެފްސީން އެސޯސިއޭޝަން ކަޕަށް ކޮލިފައިވެއްޖެއެވެ.

އެއްވަނަ ޓީމުގެ ގޮތުގައި އެސޯސިއޭޝަން ކަޕުން ޖާގަ ހޯދީ ކުލަބް ވެމްކޯއެވެ. އެއީ ކުޅުނު ތިން މެޗުން ވެސް މޮޅުވެގެެންނެވެ.

ޒުވާނުންގެ މަރުކަޒުގެ އެތެރޭ ހޯލުގައި މިރޭ ކުޅުނު މެޗަކީ އޮއްފު އެފްސީ އާއި އައްޑޫ ސްޕޯޓްސް ކުލަބަށް މުހިންމު މެޗެކެވެ. މެޗުން މޮޅުވާ ޓީމެއް އެސޯސިއޭޝަން ކަޕަށް ކޮލިފައިވާނެއެވެ.

މިރޭގެ މެޗު އޮއްފު އެފްސީން ކާމިޔާބުކުރީ ތިން ސެޓު ދެ ސެޓުންނެވެ. މެޗުގެ ފުރަތަމަ ދެ ސެޓު އޮއްފު އޮއްފު އެފްސީން ހޯދީ 19-25 އަދި 16-25 ންނެވެ. ނަމަވެސް ޖެހިގެން އައި ދެ ސެޓު ވެސް ހޯދީ އައްޑޫ ސްޕޯޓްސް ކުލަބުންނެވެ. ވާދަވެެރި ކުޅުމަކަށްފަހު އައްޑޫ ސްޕޯޓްސް އިން ތިން ވަނަ ސެޓު ހޯދީ 25-27 ންނެވެ. ޖެހިގެން އައި ހަތަރު ވަނަ ސެޓު އެ ޓީމުން ހޯދީ 21-25 ންނެވެ. ވާދަވެރި ކުޅުމަކަށްފަހު އޮއްފު އެފްސީން ވަނީ 15-17 އިން ފަސް ވަނަ ސެޓު ހޯދައި މެޗުން މޮޅުވެފައެވެ. އެއާއެކު އޮއްފު އެފްސީއަށް ވަނީ އެސޯސިއޭޝަން ކަޕުން ޖާގަ ލިބިފައެވެ. މެޗުގެ މޮޅު ކުޅުންތެރިޔަކަށް ހޮވުނީ އޮއްފު އެފްސީގެ މުހައްމަދު އަލީއެވެ.

މިރޭގެ ފުރަތަމަ މެޗުގައި ކުޅުނީ ވެމްކޯއާއި އެސްޕިރޭޝަން ފޯ އޯލް އިނީޝިއޭޓިވް ސްޕޯޓްސްއެވެ. މިރޭގެ މެޗަށް ނިކުތްއިރުވެސް ވެމްކޯއަށް އޮތީ އެސޯސިއޭޝަން ކަޕުން ޖާގަ ލިބިފައެވެ. އެއީ އެ ޓީމު ކުރިން ކުޅުނު ދެ މެޗުން ވެސް މޮޅުވެފައި އޮތުމުންނެވެ. ކުރިން ދެމެޗާ އެއްގޮތަށް މިރޭގެ މެޗުވެސް ވެމްކޯއިން ކާމިޔާބުކުރީ ފަސޭހަކަމާއެކުއެވެ. ވެމްކޯއިން ވަނީ ސީދާ ތިން ސެޓުން މެޗު ކާމިޔާބުކޮށްފައެވެ. މެޗުގެ ސެޓުތައް އެ ޓީމުން ހޯދީ 25-10، 25-12 އަދި 25-22 ންނެވެ. މެޗުގެ މޮޅު ކުޅުންތެރިޔަކަށް ހޮވުނީ ވެމްކޯގެ އިސްމާއީލް ސާޖިދުއެވެ.

ޖުމުލަ ހަ ޓީމާއެކު އެސޯސިއޭޝަން ކަޕްގެ ފިރިހެން ޑިވިޝަންގެ މެޗުތައް ފަށާނީ އަންނަ މަހުއެވެ. މުބާރާތުގެ އަންހެން ޑިވިޝަންގެ މެޗުތައް މާދަމާ ރޭ ފަށާނެއެވެ.