100 ކިލޯގެ ޑްރަގް މައްސަލައިގައި ހިމެނޭ މީހުންގެ މައްޗަށް އުފުލާފައިވާ ޑައިމޯފިން ޓްރެފިކްކުރުމުގެ ދައުވާތަކުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި 18 މޭގައިވެސްއަޑުއެހުމެއްކުރިއަށް ގެންދިޔައެވެ. އެއީ ޑައިމޯފިން ޓްރެފިކް ކުރުމުގެ ކުށުގެ ދައުވާ އުފުލާފައިވާ މީހުންނަށް ދައުވާ އިއްވުމާއި، ޖަވާބުދާރީވުމަށް ބޭއްވި އަޑުއެހުމެކެވެ.

މި މައްސަލައިގައި، ޑައިމޯފިން ޓްރެފިކް ކުރުމުގެ ކުށުގެ ދައުވާ އުފުލާފައިވަނީ ހދ. ކުމުންދޫ، ޑިއާފުރެންޑް، އިބްރާހީމް ސިނާން، ގއ. ކޮލަމާފުށި، ސޯސަންގެ، އިބްރާހީމް ޒައިދު ހަބީބު، ކ. މާފުށި، ސްވީޓްމީޑް، އަހުމަދު މާހިރު، ނ. ވެލިދޫ، ބީޗްހެވެން، ޖުމާން މުސްތަފާ، ލ. ކަލައިދޫ، ޖަނަވަރީމާގެ، މުހައްމަދު އަހްމަދު، ދ. ބަނޑިދޫ، ޕޮލާރިސް، މުހައްމަދު ހުސައިންގެ އިތުރުން، ބިދޭސީ ދެ ރައްޔިތުން ކަމަށްވާ ބަންގްލަދޭޝްގެ ޑީއެމް މޮބިންއާއި، އެމްޑީ ރަފީގުލް އިސްލާމްގެ މައްޗަށެވެ.

އެހެންނަމަވެސް، ދިމާވި ޓެކްނިކަލް މައްސަލައެއްގެ ސަބަބުން އެ ދުވަހު މުހައްމަދު އަހްމަދުގެ ބައި ކުރިއަށް ގެންދެވިފައިނުވާއިރު، މި މައްސަލައިގައި ދައުވާލިބޭ ޒާއިދު ކޯޓަށް ހާޒިރުވެފައިނުވާތީ އޭނާގެ ބައިވެސް ކުރިއަށް ގެންދެވިފައެއް ނުވެއެވެ. ވުމާއެކު، ހޯމަ ދުވަހުގެ އަޑުއެހުމަކީ އެމީހުންގެ މައްޗަށް ކުރާ ދައުވާގެ ބައި ކުރިއަށް ގެންދިއުމަށް ބޭއްވި އަޑުއެހުމެކެވެ.

މި އަޑުއެހުމުގައި ދައުލަތުން ވަނީ އެދެމީހުންގެ މައްޗަށް ކުރާ ދައުވާ އިއްވައި، ދައުވާ ސާބިތުވެއްޖެނަމަ އަންނާނެ އަދަބުވެސް ބަޔާން ކޮށްދީފައެވެ. އެގޮތުން ދައުވާ ސާބިތުވެއްޖެނަމަ، އުމުރަށް ޖަލަށް ލުމާއެކު 1 ލައްކަ ރުފިޔާއާ 10 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެކަން ދައުލަތުގެ ވަކީލާ ފާހަގަ ކުރެއްވިއެވެ.

އޭގެ އިތުރުން، އެ ދައުވާ ސާބިތުނުވެ، މި ކުށުގެ އަމަލުގައި އެއްވެސް މިންވަރަކަށް ބައިވެރިވިކަން ނުވަތަ ކުށް ކުރަން އުޅުނުކަން ސާބިތުވެއްޖެނަމަ 18 އަހަރަށް ޖަލަށް ލުމާއެކު، 75،000 ރުފިޔާއާއި، 7،500،000 ރުފިޔާއާ ދެމެދުގެ ޖޫރިމަނާއެއް އަންނާނެކަމަށް ދައުލަތުގެ ވަކީލާ ވިދާޅުވިއެވެ.

ޒާއިދުއާއި މުހައްމަދު އަހުމަދުވެސް ވަނީ ދައުވާއަށް އިންކާރުކޮށްފައެވެ. ވުމާއެކު. ދައުލަތުން ވަނީ އެދެމީހުންގެ މައްޗަށް ހެކި ހުށައަޅާފައެވެ.

ދެން މި މައްސަލައިގެ އިބްތިދާއީ އަޑުއެހުމެއް އޮންނާނީ 3 އޯގަސްޓުގައެވެ.

މި މައްސަލައިގައި ހިމެނޭ މީހުން ހައްޔަރުކުރި އޮޕަރޭޝަންގައި ރާއްޖޭގެ ބައެއް ފަޅު ރަށްރަށާއި ހުޅުމާލެއާއި މާލެއާއި މާލޭގެ ބައެއް ގޭގެ އިތުރުން ސަފާރީއަކާއި ލޯންޗެއް ބަލައި ފާސްކޮށްފައިވެއެވެ. އެގޮތުން، 100 ކިލޯއަށްވުރެގިނަ މަސްތުވާތަކެތި ހޯދާފައިވަނީ ފަޅުރަށެއްކަމަށްވާ އދ. ބޮޑުކާށިހުރާގައި ފޮރުވާފައި ހުއްޓައެވެ.