ވެލްފެއާ، ވޯޓަށް ބަދަލު ކުރަން އެނގޭނެތަ؟

އެއީ 2021 ވަނަ އަހަރުގެ މެދެއްހާ ހިސާބެވެ. ލަންޑަންއަށް ދިއުމަށް ދަތުރު ހަދައިގެން އިން އިންޑިއާ އަންހެނަކު، ފްރެންކްފާޓް އެއާޕޯޓަށް އޭނާގެ ވެކްސިން ކާޑު ހުށަހެޅިއެވެ. އެއާލައިންގެ އޭޖެންޓް، ވެކްސިން ކާޑަށް ބަލާލުމަށްފަހު އަންހެން މީހާގެ މޫނަށް ބަލާލިއެވެ. އަނެއްކާވެސް ކާޑަށް ބަލާލިއެވެ. އެ މޫނުމަތިން ފާޅުވީ ނުރުހުމުގެ އަސަރެވެ. ކަމެއް ގޯސްވެއްޖެއެވެ. ފަސެންޖަރާ ދިމާއަށް އަމާޒު ކުރީ ފްރޯޑްގެ އިލްޒާމެވެ. އޭނާ ހުށަހެޅި ކާޑުވީ ފޭކަކަށެވެ. އޭގައި ޖަހާފައި އޮތީ އެހެން މީހެއްގެ ފޮޓޯއެކެވެ. ކަނޑައެޅިގެން ބޮޑު ތުނބުޅިއެއް ހުރި ފިރިހެނެއްގެ ފޮޓޯއެކެވެ.

ފަސެންޖަރު ހިންދެމިލުމުގެ ނޭވާއެއް ލިއެވެ. އަދި ވެގެން އުޅޭ ތަފްސީލުކޮށްދޭން ފެއްޓިއެވެ. "ތީ ނަރޭންދްރާ މޯދީ؛ އަހަރަމެންގެ ބޮޑުވަޒީރު". އަންހެން މީހާ ކިޔައިދިނެވެ. ކޮރޯނާވައިރަސް ޑިޒީޒް (ކޮވިޑް-19) އިން ދިފާއުވުމަށް އިންޑިއާގައި ހިންގާ ވެކްސިން ކެމްޕޭންގައި ދޫކުރާ ވެކްސިން ކާޑުގައި ޖަހާފައި އޮންނަނީ ބޮޑުވަޒީރު މޯދީގެ ފޮޓޯއެކެވެ. އެއީ ތެދެކެވެ.

މި ދަންނަވާލީ މިދިޔަ އަހަރު ސޯޝަލް މީޑިއާގައި ވައިރަލްވި ވާހަކައެކެވެ. އިންޑިއާ ރަށްވެހިންނަށް ވަރުގަދަ މެސެޖެއް ދިން ވާހަކައެކެވެ. އާނއެކެވެ. ބޮޑުވަޒީރުގެ ކިބައިން "ސަލާމަތް ނެތް" ކަމުގެ މެސެޖެވެ. އަތުގައި ޖެހޭ ނޫސް ކަރުދާހަކަސް، އެއްލާ ކަޅިއަކުން ފެންނަ ބިލްބޯޑަކަށް، ސްކްރޯލް ކޯލާ ވެބް ޕޭޖަކަސް، ކަން އޮތީ އެހެނެވެ. މުޅި އޮޑީގައި ހަސަނުގެ ދެފައޭ ބުނާ އުސޫލުން، ހުރިހާ ތާކު މޯދީގެ ފޮޓޯއެވެ.

ދުވަހު ނޫސް ކިޔައި ނުއުޅޭ މީހުންނާއި ސަރުކާރު ވެބްސައިޓްތަކަށް ނުވަންނަ މީހުންނަށް، މޯދީގެ ފޮޓޯއަކީ ވެލްފެއާގެ ސިއްކައެކެވެ. އަލަށް ފަށާ މަޝްރޫއުތަކުގެ ނަން ފެށެނީވެސް "ޕްރަދާން މަންތްރީ" ނުވަތަ "ބޮޑުވަޒީރު"ގެ ލަފުޒުންނެވެ. ފަޤީރު އަވަށްތަކަށް ސަރުކާރުން ފޯރުކޮށްދޭ ޒަރޫރީ ކާބޯތަކެތި ހިމެނޭ ބަސްތާތަކުންވެސް ފެންނަނީ މޯދީގެ ހިނިތުންވުމެވެ. އިންޑިއާގެ ކުރީގެ ބޮޑުވަޒީރު އިންދިރާ ގާންދީގެ ނަމުން ނަން ދެވިގެން ހިންގި ގެދޮރުވެރި ކުރުމުގެ މަޝްރޫއެއްގެ ނަންވެސް "ބޮޑުވަޒީރުގެ" ނަމަށް ބަދަލު ކުރިއެވެ.

ފްރޭންކްފާޓް އެއާޕޯޓްގައި ހިނގާދިޔަ ކަންކަން ސޯޝަލް މީޑިއާގައި ހިއްސާ ކުރި ގިނަ މީހުން އެކަން ކޮށްފައި ވަނީ މޯދީއަށް ފާޑުކިއުން އަމާޒުކުރުމުގެ ރޫހެއްގައެވެ. އެ މީހުން ބުނާ ގޮތުގައި މޯދީ މަސައްކަތް ކުރެއްވީ ނަފްސީ ޝަހްސިއްޔަތު އިސްކޮށް، ޕާސަނަލިޓީ ކަލްޓެއް ބިނާ ކުރެއްވުމަށެވެ. ހަޤީޤަތް އޮތީ ކިހިނަކުން ތޯ ބަލާއިރު، މަންޒަރު އަދި މާ ހައްސާސްއެވެ. މޯދީގެ ބާރްތިޔާ ޖަނާތާ ޕާޓީ (ބީޖޭޕީ)އިން މަސައްކަތް ކުރަމުން ދަނީ، މީހުން އެންމެ ގަޔާވާނެ ކަންކަން ކޮށްގެން ކްރެޑިޓް ހޯދުމަށެވެ.

2014 ވަނަ އަހަރު ބީޖޭޕީއިން އިންޑިއާގެ ވެރިކަމާ ހަވާލުވިއިރު، ގެދޮރުވެރި މަޝްރޫއުތަކުގެ ކްރެޑިޓް މައި ސަރުކާރަށް ދިނީ އެންމެ 5 ބައިކުޅަ 1 ބައި މީހުންނެވެ. ރަށްފުށުގެ ސަރަހައްދުތަކަށް ވަޒީފާ ކަށަވަރުކޮށްދިނުމަށް ކްރެޑިޓް 4 ބައިކުޅަ 1 ބައި މީހުންނެވެ. ފުރަތަމަ ދައުރުގެ ވެރިކަން ނިމި، 2019 ވަނަ އަހަރުގެ އިންތިޚާބަށް ވީ އިރު، 2 ބައިކުޅަ 1 ބައި މީހުން ކްރެޑިޓް ދިނީ މައި ސަރުކާރަސެވެ. ކައްކާ ގޭސް ފޯރުކޮށްދިނުން ފަދަ އާ މަޝްރޫއުތަކަށް ބަލާއިރު 70 ޕަސެންޓް މީހުން ކްރެޑިޓް ދިނީ މައި ސަރުކާރަށެވެ.

އިންޑިއާގެ އެކި ސަރަހައްދުތަކުގައި ވެރިކަން ކުރަމުންދާ އިދިކޮޅު ޕާޓީތަކުން އެ ފިލާވަޅު ރަނގަޅަށް ދަސްކޮށްފިއެވެ. މަހާރާޝްތުރާގެ ސަރުކާރުން ފޯރުކޮށްދޭ އެހީތައް ނޫހަށް އަރައެވެ. ރާޖަސްތާނުގައިވެސް އެކަން އޮތީ އެހެންނެވެ. "މޯދީގެ ކޮޕީކެޓުން" މުޅި ޤައުމަށް ފެތުރުނީއެވެ.

ފަޤީރުންނަށް ބަލާއިރު ނަސީބު ހިފީ ސީދާ އަތުގައެވެ. ދިރިއުޅުމުގެ ހާލަތު ރަނގަޅުކޮށްދިނުމަށް މަރުކަޒީ ސަރުކާރުން މަސައްކަތް ކުރާއިރު، އެ މަޝްރޫއުތަކާ ވާދަ ކުރުމަށް އިދިކޮޅު ފަރާތްތަކުން ހިންގާ ސްޓޭޓް ސަރުކާރުތަކުންވެސް ކުރަނީ އެއްކަމެކެވެ. ރައްޔިތުން އުޅެމުންދާ ދަތި ހާލު ބަޔާންކޮށްދީގެން ވޯޓު ހޯދުމުގެ ބަދަލުގައި، ދިރިއުޅުމަށް ހެޔޮ ބަދަލެއް ގެނެސްދީގެން ވޯޓު ހޯދުން ނުވަތަ ވެލްފެއާ ވޯޓަށް ބަދަލު ކުރަން، އިންޑިއާގެ ޕޮލިޓީޝަނުން ކިތަންމެހާ ރަނގަޅަކަށްވެސް ދަސްކޮށްފިއެވެ. ހިންދޫ މެޖޯރިޓީ އޮތެއް ކަމަކު މުސްލިމުންނަށްވެސް މަންފާ ލިބެއެވެ.

މިހާ ހިސާބަށް ވާހަކަ ދިޔައިރު ރައްޔިތުންނަށް ލިބެނީ މުޅިންވެސް ފައިދާއޭ ހީވާ ކަހަލައެވެ. ނަމަވެސް، ހަޤީޤަތަކީ ހަމަ އަސްލުވެސް އެއީތޯ ސުވާލު ކުރަންޖެހެއެވެ. އާންމު ފާޚާނާ ބަރިތައް ގާއިމު ކުރުމާއި ބޭންކު އެކައުންޓްތައް ހުޅުވާދިނުން ފަދަ ވަގުތުން ނަތީޖާ ފެންނަ މަޝްރޫއުތައް މެކުހަށް ޖަހާފައި އޮތެއް ކަމަކު، ލޮލަށް ނުފެންނަ މަޝްރޫއުތަކަށް މާ ބޮޑު ސަމާލުކަމެއް ނުދެއޭ ދެންނެވުމަކުން ގޯހެއް ނެތެވެ. ތައުލީމާއި ސިއްހީ ނިޒާމުގެ ހާލަތުގެ އިތުރު ތަފްސީލަކަށް ބޭނުމެއް ނުވެއެވެ.