"އިންޑިއާ އައުޓް" ހަރަކާތަކީ އަމިއްލަ އެދުމުން ފުރިފައިވާ ހަރަކާތެއްކަމަށް ބުނެ، ޕީޕީއެމްގެ އެންމެ އިސް ސަފުގައި މަސައްކަތް ކުރަމުން އައި އާލަލީ ޝާހިދު (ސްޓެޕް އައްޔަ) އެ ހަރަކާތާ ދުރަށް ހިނގައްޖެއެވެ.
އޭނާ އެކަން އިއުލާންކޮށް ކުރު ވީޑިއޯއަކާއެކު އާދީއްތަ ދުވަހުގެ ރޭ ކުރި ޕޯސްޓެއްގައި ބުނީ، "އިންޑިއާ އައުޓް" ހަރަކާތަކީ މަންޒިލެއް އަދި މިސްރާބެއް ނެތް ހަރަކާތެއްކަމަށެވެ. އަދި ވަކި ބަޔަކު 2023 ވަނަ އަހަރާއި 2024 ވަނަ އަހަރު އޮންނަ އިންތިޚާބުތަކުގައި ކުރިއަރުވަން ޖަހާ "ރޮކެޓެއް" ގޮތުގައި އޭނާ ވަނީ އެ ހަރަކާތް ސިފަކޮށްފައެވެ.
ސްޓެޕް އައްޔަ ބުނީ "އިންޑިއާ އައުޓް" ވާނަމަ މިއަދު އޮންނާނީ އެކަން ކުރެވިފައި ކަމަށާއި، ނަމަވެސް އެއީ އަމިއްލަ އެދުމުން ފޯވެފައި އޮތް ހަރަކާތެއް ކަމަށެވެ.
އިންޑިއާ އައުޓް ހަރަކާތާ ގުޅިގެން ޕީޕީއެމް ތެރޭގައި މައްސަލަތައް ބޮޑުވެ ގިނަ މެމްބަރުންތަކެއް އެ ޕާޓީން ވަކިވަމުން އަންނަ ކަމަށް "ރާއްޖެ އެމްވީ"އަށް ވަނީ މައުލޫމާތު ލިބިފައެވެ. އެގޮތުން އިންޑިއާ އައުޓް މުޒާހަރާއަށް އާންމު މެމްބަރުން ނެރެ، ޕާޓީގެ އިސް މެމްބަރުން ފިލާ ތިބޭތީ އެކަމާ ބައެއް މެމްބަރުން ހިތްހަމަނުޖެހޭ ކަމަށްވެއެވެ.
އިންޑިޔާއާމެދު ނަފުރަތު އުފެއްދުމަށް ހިންގާ ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމުގައި، ގައުމީ ސަލާމަތާބެހޭ މަޖިލީހުގެ މިއަހަރުގެ 3 ވަނަ ބައްދަލުވުމުގައި ކަނޑައަޅާފައިވާކަން ބަޔާން ކުރައްވައި، ރައީސް އިބްރާހީމް މުހައްމަދު ސޯލިހު ވަނީ ގަރާރެއްވެސް ނެރުއްވާފައެވެ. އެ ގަރާރު ނެރުއްވުމުންވެސް އިދިކޮޅު ޕްރޮގްރެސިވް ކޮންގްރެސްއިން ވަނީ، އިންޑިޔާ އައުޓް ލިޔުމުގައި ބަސްތައް ބަދަލުކޮށްގެން އެ ހަރަކާތް ހިންގާފައެވެ. ނުސީދާ އިބާރާތްތަކާއި ކުރެހުންތައް ބޭނުންކޮށްގެން "އިންޑިއާ އައުޓް" ކެމްޕޭން ހިންގުމަށް ކުރަމުންދާ ކަންތައްތަކަކީ ކޯޓު އަމުރަށް ގޮން ޖެހުމުގެ އަމަލުތަކެއްކަމަށް ބެލެވޭނެކަމަށް ކްރިމިނަލް ކޯޓުން ވެސް ވަނީ ބުނެފައެވެ.
