ރިސޯޓެއްގެ އިމާރާތަކުން ވެއްޓި މަރުވީ ފުވައްމުލަކު ޒުވާނެއް
އިމާރާތުން ވެއްޓި މަރުވީ ޒައިދު އިބްރާހިމް
ރިސޯޓުގެ އިމާރާތަކުން ވެއްޓި މަރުވި ޒުވާނާ
ރ. އަތޮޅުގައި ހިންގާ ރިސޯޓެއްގެ އިމާރާތަކުން ވެއްޓި މަރުވެފައިވަނީ ފުވައްމުލަކު ސިޓީގެ ދަނޑިމަގު އަވަށަށް ނިސްބަތްވާ ޒުވާނެއް ކަމަށްވާ ޒައިދު އިބްރާހީމްކަން "ރާއްޖެ އެމްވީ"އަށް ކަށަވަރުވެއްޖެއެވެ.
"ރާއްޖެ އެމްވީ"އަށް މައުލޫމާތު ލިބިފައިވާ ގޮތުގައި 28 އަހަރުގެ ޒައިދު މަރުވީ ހުކުރު ދުވަހުގެ ވަގުތެއްގައި ރ. އަތޮޅުގައި އޮންނަ އިންޓަރކޮންޓިނެންޓަލް މޯލްޑިވްސް މާމުނާގަ ރިސޯޓުގައި ހުރި އިމާރާތަކުންނެވެ. އޭނާ ވެއްޓުނީ ހުކުރު ދުވަހުގެ ރޭ ދަންވަރުގެ 12:30 ހާއިރު ކަމަށާއި، ވަގުތުން އެ އަތޮޅު އުނގޫފާރު ހޮސްޕިޓަލަށް ގެންދިޔަ ކަމަށް ވެސް މައުލޫމާތު ލިބެއެވެ.
އެމީހާ ވެއްޓިފައިވަނީ އިމާރާތުގެ 4 ވަނަ ފަންގިފިލާއިންނެވެ.
ފުލުހުން ވަނީ ރ. އަތޮޅު ރިސޯޓެއްގައި މީހަކު އިމާރާތަކުން ވެއްޓި މަރުވެފައިވާ ކަމަށް ބުނެފައެވެ. އަދި އޭނާ ހޮސްޕިޓަލަަށް ގެންދިޔައިރުވެސް އޮތީ މަރުވެފައި ކަމަށާއި، ތަހުގީގުތައް މިހާރު ކުރާކަމަށް ފުލުހުން ބުންޏެވެ.
މި މައްސަލަ ތަހުގީގު ކުރަން މިހާރު ފުލުހުން ވަނީ އެ ރިސޯޓަށް ޓީމެއް ފޮނުވާފައެވެ.
އެ ރިސޯޓުގައި މަސައްކަތްކުރާ މުވައްޒަފަކު "ރާއްޖެ އެމްވީ"އަށް މައުލޫމާތު ދިން ގޮތުގައި އޭނާ ވެއްޓުނީ އެމީހުން ދިރިއުޅޭ އިމާރާތުން ކަމަށެވެ. އޭނާ އެވަގުތު ހުރީ ޑިއުޓީގައި ކަމަށާއި، އެއީ ޑިއުޓީ ނިމުނު ވަގުތު ކަމަށްވެސް މައުލޫމާތު ލިބެއެވެ.
އެ މުވައްޒަފު ބުނި ގޮތުގައި ވިއްސާރަވުމުގެ ސަބަބުން އިމާރާތުގެ ސިޑިއަށް ފެންއެޅިފައި ހުއްޓެވެ. އެެހެންވެ ކައްސާލައިގެން ވެއްޓުނުކަމަށް ލަފާކޮށް ވާހަކަތައް ދެކެވޭކަމަށް ވެސް އޭނާ ބުންޏެވެ.
