ލަންކާއަށް އެހީ ހޯދާ މަންދޫބަކަށް ނަޝީދު ހަމަޖެއްސުމުން ރައީސްގެ މަރުޚަބާ
ކުރިޔަށް އޮތް ތަނުގައި ވެސް ލަންކާއަށް ދިވެހިންގެ އެހީ ލިބޭނެ ކަމުގެ ޔަޤީންކަން ރައީސް ދެއްވި
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް
ސްރީލަންކާއަށް އެހީ ހޯދާ މަންދޫބަކަށް ރައްޔިތުންގެ މަޖިލިހުގެ ރައީސް، ރައީސް މުހައްމަދު ނަޝީދު ހަމަޖެއްސުމުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އެމަނިކުފާނަށް މަރުޚަބާ ވިދާޅުވެއްޖެއެވެ.
ބައިނަލްއަޤުވާމީ ޖަމިއްޔާތަކާއި ދޭދޭ ޤައުމުތަކުން އެހީ ހޯދަން އެހީތެރިވާ މަންދޫބަކަށް ރައީސް ނަޝީދު ހަމަޖެއްސީ، އެ ޤައުމުގެ ބޮޑުވަޒީރުކަމާ ހަވާލުވެވަޑައިގެންނެވި ރަނިލް ވިކްރަމަސިންހަ އެވެ. އެއީ ރައީސް ނަޝީދުގެ ހުށަހެޅުއްވުމަކަށް ރަނިލް އިޖާބަދެއްވާ ހަވާލުކުރެއްވި މަސައްކަތެކެވެ.
ރައީސް ޞާލިހު ކުރެއްވި ޓްވީޓުގައި، ކުރިޔަށް އޮތް ތަނުގައި ވެސް ލަންކާއަށް ދިވެހިންގެ އެހީ ލިބޭނެ ކަމުގެ ޔަޤީންކަން ދެއްވިއެވެ. އެމަނިކުފާނު ވިދާޅުވީ، ރާއްޖެ އަބަދުވެސް އޮންނާނީ ލަންކާއާ އެކީގައި ކަމަށާއި މި އުނދަގޫ ވަގުތުން އަރައިގަންނަން ވެދެވެން އޮތް ގޮތަކުން އެހީތެރިވެދެއްވާނެ ކަމަށެވެ.
ރައީސް ޞާލިހުގެ އިތުރުން ފޮރިން މިނިސްޓަރ އަބްދުﷲ ޝާހިދު ވެސް ވަނީ ރައީސް ނަޝީދަށް މަރުޚަބާ ވިދާޅުވެ ޓްވީޓެއްކުރައްވާފައެވެ. މިޓްވީޓްގައި ރާއްޖެ އާއި ލަންކާއަކީ ޒަމާންވީ ދެ ރަހުމަތްތެރިންކަމަށާއި އަބަދުވެސް އެހީތެރިކަން ފޯރުކޮށްދެމުންދާނެކަމަށް ވަނީ ވިދާޅުވެފައެވެ.
ލަންކާއަށް މިހާރު ދިމާވެފައިވާ އިޤްތިސާދީ ކާރިސާގައި ކުރިއަށް އޮތް ދުވަސްތަކީ ދަތި އުދަނގޫ ދުވަސްތަކަކަށް ވާނެ ކަމަށް ބޮޑުވަޒީރު ވިކްރަމަސިންހަ ވިދާޅުވެފައިވެއެވެ. އަދި ލަންކާއަށް ބޭނުންވާ ޒާރޫރީ މުދާ ގެނައުމަށް ޚަރަދުކުރުމަށް ކުރިއަށް އޮތް ދުވަސްތަކުގެ ތެރޭގައި ވީހާވެސް އަވަހަށް 75 މިލިއަން އެމެރިކާ ޑޮލަރު ބޭނުންވާ ކަމަށް ވެސް ބޮޑުވަޒީރު ވަނީ ވިދާޅުވެފައެވެ.
ލަންކާގެ އިޤްތިސާދީ ކާރިސާއަކީ އެޤައުމަށް މިނިވަންކަން ލިބުނު ފަހުން ކުރިމަތިވެފައިވާ އެންމެ ބޮޑު އިޤްތިސާދީ ކާރިސާއެވެ.
