ޓީބީ ބަލި ރާއްޖެއިން ނައްތާލުމަށް ކުރަމުންދާ މަސައްކަތުގައި، އިންޑިޔާއިން ޓީބީ ބޭސް ހަދިޔާކޮށްފި
19 މެއި 2022 | ބުރާސްފަތި 15:23ހަދިޔާކުރި ބޭސްތަކުގެ ތެރޭގައި އެންޓި-ޓީބީގެ އެކި ބާވަތުގެ 27،000 ވުރެ ގިނަ ޓެބްލެޓް ހިމެނޭ
ޓީބީ ބޭސް ހަދިޔާކުރުމުގެ ރަސްމިއްޔާތުގެ ތެރެއިން
ދިވެހިރާއްޖެއިން 2025ވަނަ އަހަރަށް ޓީބީ ބަލި ނައްތާލުމަށް ކުރަމުންދާ މަސައްކަތުގެ ދަށުން އިންޑިޔާއިން ޓީބީ ބޭސް ހަދިޔާކޮށްފިއެވެ.
އިންޑިއާ ސަރުކާރުގެ ފަރާތުން ދިވެހިރާއްޖެ އަށް ހަދިޔާކުރައްވާފައިވާ އެންޓި-ޓިއުބަކިއުލޮސިސް(ޓީބީ) ބޭސް، ހެލްތު މިނިސްޓްރީގެ ސްޓޭޓް މިނިސްޓަރޝާހް އަބްދުﷲ މާހިރުއާ ހަވާލުކުރައްވާފައިވަނީ އިންޑިއަން ހައިކޮމިޝަންގެ ޗާޖް ޑެ އެފެއަރޒް ރޯހިތު ރަތިޝްއެވެ.
ހަދިޔާކުރި ބޭސްތަކުގެ ތެރޭގައި އެންޓި-ޓީބީގެ އެކި ބާވަތުގެ 27،000 ވުރެ ގިނަ ޓެބްލެޓް ހިމެނެއެވެ. މީގެތެރޭގައި މަލްޓި-ޑްރަގް ރެސިސްޓަންޓް ޓިއުބަކިއުލޮސިސް(އެމް.ޑީ.އާރް- ޓީބީ)ވެސް ހިމެނެއެވެ. މި ބޭސްތައް ހަދިޔާ ކުރެވިފައިވަނީ އިންޑިއާގެ "ނެއިބަރހުޑް ފަސްޓް" ސިޔާސަތުގެ ދަށުން ނެޝަނަލް ޓިއުބަކިއުލޮސިސް އެލިމިނޭޝަން ޕްރޮގްރާމް(އެން.ޓީ.އީ.ޕީ)ގެ ސްޓޮކްއިންނެވެ.
ދިވެހިރާއްޖޭގެ ސަރުކާރުން ސިއްޙީ ދާއިރާގެ ކުރިއެރުވުމަށް ކުރަމުންދާ މަސައްކަތުގައި އިންޑިއާއިން ކުރިޔަށް އޮތްތަނުގައިވެސް އެހީތެރިކަން ފޯރުކޮށްދެމުންދާނެއެވެ.
ޓީބީއަކީ ރަނގަޅުކުރެވޭ ބައްޔެއް ކަމުގައި ވިޔަސް، އެއީ ދުނިޔޭގައި އެންމެ ހަލުވި މިނުގައި ފެތުރޭ، އޭގެ ސަބަބުން އެންމެ ގިނަ މީހުން މަރުވަމުންދާ ބައްޔެވެ. ރާއްޖެ ހިމެނޭ ދެކުނު އޭޝިޔާގެ ބައްރަކީ ދުނިޔޭގެ އާބާދީގެ ހަތަރުބައިކުޅަ އެއްބައި ކަމުގައިވާއިރު، ދުނިޔޭގެ ނިސްބަތުން ޓީބީ ޖެހޭ މީހުންގެ އަދަދުގެ 43 އިންސައްތަ މީހުންނަކީ މިސަރަހައްދުގެ މީހުންނެވެ. އޭގެތެރެއިންވެސް ބޭސްފަރުވާއިން ރަނގަޅު ނުކުރެވޭ ތިންބައިކުޅަ އެއް ބަޔަކީ މިސަރަހައްދަށް ނިސްބަތްވާ މީހުންނެވެ.
