މަތިންދާބޯޓުގެ ފާޚާނާތެރެއަށް އުފަންވުމުން، ކުއްޖާގެ ނަމަކަށް ކީ "ސްކައި"

މާބަނޑުވުމަކީ ޚާއްސަ އުފާތަކަކާއި ތަފާތު އިހުސާސްތަކެއް ތަޖުރިބާކުރެވޭ، ވަރަށް މުހިއްމު ދުވަސްވަރެކެވެ. އެކި އަންހެނުންނަށް މާބަނޑުވުމާ ކުރިމަތިލާން ދިމާވަނީ އެކި އުމުރުގައެވެ. އެހެން ނަމަވެސް ސިއްހީ މާހިރުން ދެކޭގޮތުގައި މާބަނޑުވުމަށް އެންމެ ރަގަޅު ދުވަސްވަރަކީ އުމުރުން 20 އަހަރާ 35 އަހަރާ ދެމެދުއެވެ. މި “ރޭންޖު“ން ބޭރުވިނަމަވެސް ސަލާމަތުން މާބަނޑުވުމުގެ ދުވަސްތައް ހޭދަކޮށް، ސިއްހަތު ރަނގަޅު ދަރިން ދުނިޔެއަށް އުފަންކުރުމުގެ ނަސީބު ބައެއް މައިންނަށް ލިބިފައި އެބަހުއްޓެވެ.

ދަރިފުޅަށް ބަލިވެ އިންނަ ހިސާބުން ދެމަފިރިން އެކުއްޖަކާމެދު ވަރަށް ގިނަ ފޮނި ހުވަފެންތައް ދެކެއެވެ. އަދި އެ ކުއްޖާއަށް ކިޔާނެ ނަމަކާއި ކުއްޖާގެ ލައްވާނެ ހެދުމަށް ދާންދެން ނިންމައެވެ. އެހެންނަމަވެސް އެ ނިންމުންތަކާ ޚިލާފަށް ބައެއް ފަހަރު ކަންތައްތައް ދިމާވެއެވެ.

މަދުން ނަމަވެސް، މަތިންދާބޯޓުން މާބަނޑު މީހުން ދަތުރުކުރާއިރު ވިހާ ވާހަކަ އަޑުއިވެއެވެ. އަދި އެމީހާ ވިއްސުމަށްޓަކައި ބޯޓުގައި ތިބޭ މީހުން ވެސް އެހީތެރިވެދެއެވެ. މިފަހަރުވެސް މިވަނީ މިފަދަ ހާދިސާއެއް ހިނގާފައެވެ.

އެމެރިކާގެ ފްރަންޓިއަރ އެއަރލައިނުން ދަތުރުކުރި އަންހެނަކު މިވަނީ ބޯޓުގެ ފާޚާނާ ތެރެއަށް ވިހާފައެވެ. ޑެންވަރ އިންޓަރނޭޝަނަލް އެއަރޕޯޓުން އޮލާންޑޯ އިންޓަރނޭޝަނަލް އެއަރޕޯޓަށް ދަތުރުކުރި މި ބޯޓުގައި އިން އަންހެންމީހާ ވިހާފައިވަނީ އޭނާ ވިހަން އޮތް ދުވަހަށްވުރެ ކުރިންނެވެ. ބޯޓުގެ އެޓެންޑެންޓް ޑިއާނާ ޖިރަލްޑޯ ވަނީ އެ އަންހެންމީހާ ވިއްސުމުގައި އެހީތެރިވެދީފައެވެ. އެއަރލައިނުން ވެސް ވަނީ އެ އަންހެން މީހާ ވިހެއުމަށް އެހީތެރިވެދިން ޓީމަށް ޝުކުރު އަދާކޮށްފައެވެ. އެ އަންހެން މީހާ ވަނީ ފްލައިޓްގެ ތެރެއަށް ކުއްޖާ އުފަންވުމުން، "ސްކައި"ގެ ނަމުން އެކުއްޖާއަށް ނަންދީފައެވެ. މިއީ ހަމަގައިމުވެސް ވަރަށް ތަފާތު ކަމަކަށް ވާނެއެވެ.

މިފަދަ އެތައް ހާދިސާތަކެއް މީގެ ކުރިން ވެސް ވަނީ ހިނގާފައެވެ. އެގޮތުން 11 ގަޑިއިރުގެ ދަތުރެއްގައި 30،000 ފޫޓް މަތިން ދަތުރުކުރި ޔުނައިޓަޑް އެއަރލައިންސްގައި ވެސް އަންހެނަކު ވަނީ ފިރިހެން ކުއްޖަކު ވިހާފައެވެ. އެ އަންހެން މީހާ ދަރިފުޅު ވިހާފައިވަނީ އެވަގުތު ބޯޓުން ދަތުރުކުރި ޑޮކްޓަރަކާއި ދެ ނަރުހުންގެ އެހީތެރިކަމާއެކުގައެވެ.

މިފަދަ އެތައް ތަފާތު ހާދިސާތައް ހިނގަމުން އަންނައިރު، ބަލިވެއިންކަން ނޭނގި ހުއްޓާ ވިހެއުން މިއީ ގިނަ ބަޔަކަށް ގަބޫލުކުރަން ދަތި ވާހަކައަކަށް ވެދާނެ އެވެ. ނަމަވެސް މިއީ ހަގީގަތުގައި ވެސް ދިމާވާ ކަމެކެވެ. މަދުން ނަމަވެސް މި ކަހަލަ ހާދިސާތައް ދުނިޔޭގެ އެކި ކަންކޮޅުތަކުގައި ހިނގާފައި އެބަހުއްޓެވެ.

މިގޮތަށް ނޭނގި ހުއްޓާ ވިހެއުމަށް ކިޔަނީ "ކްރިޕްޓިކް ޕްރެގްނަންސީ" އެވެ. މި ގޮތަށް ބަލިވެ އިންނަ މީހުން ގަވާއިދުން ޕީރިއަޑް ވެސް ވެއެވެ. އަދި ވިހަން ކައިރިވާއިރު ވެސް ބަނޑު ނުފުއްޕަ އެވެ. މިއީ ކޮންމެ 475 އަންހެނަކުން އެކަކަށް ދިމާވާ ކަމެއް ނަމަވެސް ބައެއް މީހުންނަށް ދުވަސް ނުފުރެނީސް ހައެއްކަ މަސް ފުރޭ ފަހުންވެސް ބަލިވެއިންކަން އެނގެއެވެ. އަނެއް ބަޔަކު ވިހަން ދެން ވެސް ބަލިވެ އިންކަން ނޭނގިތިބެއެވެ.