އައިޖީއެމްއެޗްގައި މަސައްކަތްކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި ޅ. ހިންނަވަރު، މާފިނި، ހަލީމަތު ލަމްހާ އަބްދުއްރަހްމާނުގެ މައްޗަށް އުފުލާފައިވާ ދައުވާގެ އަޑުއެހުމެއް ބުރާސްފަތި ދުވަހު ކުރިއަށް ގެންގޮސްފިއެވެ.

މި މައްސަލައިގައި ބުރާސްފަތި ދުވަހު ކުރިއަށްދިޔަ އަޑުއެހުމުގައި ދައުލަތުން ވަނީ ލަމްހާއާ ދެކޮޅަށް ހެކި ހުށައަޅާފައެވެ. އެގޮތުން އޭނާގެ މައްޗަށް ކުރާ, "އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާ"ގައި ދައުލަތުން ވަނީ 110 ހެކި ހުށައަޅާފައެވެ. އޭގެ ތެރެއިން 74 ހެކިންނަކީ ޝަފަހީ ހެކިންނެވެ.

އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދައުވާގައި 18 ހެތްކެއް ދައުލަތުން ވަނީ ހުށައަޅާފައެވެ. އޭގެ ތެރޭގައި 11 ޝަފަހީ ހެއްކެއް ހިމެނެއެވެ.

އޭގެ އިތުރުން، ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި، ކުށުގެ ދައުވާއާއި ގުޅިގެންވެސް ހުށައަޅާފައިވަނީ 11 ޝަފަހީ ހެކި ހިމެނޭހެން ޖުމުލަ 18 ހެތްކެކެވެ.

ދިފާއުންވެސް ވަނީ ލަމްހާގެ މައްޗަށް ކުރާ ދައުވާތަކާ ގުޅިގެން ހެކި ހާމަކޮށްފައެވެ. އެގޮތުން ތިން ދައުވާއާ ގުޅިގެންވެސް 11 ހެތްކެއް ދިފާއުން ވަނީ ހުށައަޅާފައެވެ.

އެއާއެކު މައްސަލަ ބައްލަވާ ގާޒީ ވަނީ ޝަރީއަތުގެ ކުރީގެ ހުށައެޅުންތަކަށް 15 ދުވަހުގެ މުއްދަތެއް ދެފަރާތަށްވެސް ދެއްވާފައެވެ.

ގާޒީ ވަނީ، ލަމްހާގެ މައްޗަށް ކުރާ 3 ދައުވާވެސް މަދަނީ މިންގަނޑުން ކުރިއަށް ގެންދެވޭނެ ކަމަށް ކަނޑައަޅުއްވާފައެވެ.

މި އަޑުއެހުމުގައި ލަމްހާގެ ބަންދާ ގުޅޭގޮތުންވެސް ވަނީ ވާހަކަ ދައްކާފައެވެ. އެގޮތުން ލަމްހާގެ ބަންދާ ގުޅޭގޮތުން ދައުލަތުން ވަނީ ސިޓީއެއް ހުށަހަޅާފައެވެ.

ޑޮކްޓަރު ދެއްވާފައިވާ އިރުޝާދުގެ ތެރެއިން ފުރިހަމަ ކުރަންޖެހޭ ކަންކަން ކަރެކްޝަންސްއިން ފުރިހަމަ ކޮށްފައިވާކަމަށް، ކަރެކްޝަންސްއިން ފޯރުކޮށްދިން މައުލޫމާތުތަކާ ހަވާލާދެއްވައި ދައުލަތުގެ ވަކީލު ވިދާޅުވިއެވެ.

ދައުލަތުން ބުނާ ގޮތުގައި، ޑޮކްޓަރުގެ އިރުޝާދާ އެއްގޮތަށް، ލަމްހާއަށް ބަރު އެއްޗެހި އުފުލަން ނުޖެއްސުމާއި، ސިޑިން އަރަންޖެހޭ ހާލަތްތަކުގައި އެހީ ފޯރުކޮށްދިނުމާއި، ލޯންޑްރީގެ ޚިދުމަތް ފޯރުކޮށްދިނުމުގެ އިންތިޒާމު ހަމަޖެއްސުމާއި، ފިޒިއޯތެރަޕީގެ ޚިދުމަތް ފޯރުކޮށްދިނުން ފަދަ ކަންކަން ކުރިއަށްދާކަމަށް ކަރެކްޝަންސްއިން ވަނީ ޔަގީންކޮށްދީފައެވެ.  

އެހެންނަމަވެސް، އޭނާ ގޭގައި ހުރެގެން ބެޑްރެސްޓްކުރުމަށް ޑޮކްޓަރު ލަފާ ދެއްވާފައިވާކަން ދިފާއީ ވަކީލުން ފާހަގަ ކުރެއްވިއެވެ. ދިފާއުން ލަމްހާގެ ސިއްހީ ހާލަތާ ގުޅޭގޮތުން ދައްކާފައިވާ ވާހަކަތަކަށް ދައުލަތުން ލިއުމުން ރައްދު ދީފައިނުވާކަމަށްވެސް ވަނީ ވިދާޅުވެފައެވެ.

މައްސަލަ ބައްލަވާ ގާޒީ ވަނީ ދިފާއުގެ ލިއުމަށް ރައްދު ދިނުމަށް ދައުލަތަށް 5 ދުވަހުގެ މުއްދަތެއް ދެއްވާފައެވެ. އޭނާގެ ބަންދު މުރާޖައާއާމެދު ގޮތެއް ނިންމަވާނީ އޭގެ ފަހުންނެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ.