ކޮރޯނާ ވައިރަސް ޑިޒީޒް (ކޮވިޑް-19)ގެ ބަލިމަޑުކަމަކީ މީގެ ކުރިން ހީވެސް ކުރެވިފައި ނެތް އެތައް ކަމަކަށް މުޅި ދުނިޔޭގެ ލޯ ހުޅުވާލަދިން ބަލިމަޑުކަމެކެވެ. އެންމެ ކުރިއަރާފައިވާ ގައުމުތަކުގައި އެންމެ ވަރުގަދަ ޑިމޮކްރަސީތައް ހިންގަމުން ދާ ނުފޫޒުގަދަ ގައުމުތަކުގެ ސަރުކާރުތަކުގައިވެސް ފޫ ނުބެދޭ ބާގަނޑުތަކެއް ހުރިކަން ތިލަކޮށްލަދިން ބަލިމަޑުކަމެކެވެ. ވަކިން ހާއްސަކޮށް، ސިއްހީ ދާއިރާއާއި ކުއްލި ނުރައްކަލުގެ ހާލަތްތަކަށް ގައުމުތައް ތައްޔާރު ނޫންކަން ސާފުކޮށް އަންގައިދިން ބަލިމަޑުކަމެކެވެ.

ޗައިނާގެ ބާޒާރުމަތީ ސަރަހައްދަކުން ބަލީގެ ފުރަތަމަ ކޭސް ރިޕޯޓް ކުރި ފަހުން އަދާ ހަމައަށް 2 އަހަރަށް ވުރެ ގިނަ ދުވަސް ފާއިތުވެ ދިޔަ އިރުވެސް، ގައުމުތަކުން އެ ފަދަ 2 ވަނަ ހާލަތަކަށް ތައްޔާރު ތޯ ސުވާލު އުފެދެއެވެ. ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުދަ ދުވަހު އާންމު ކުރި ރިޕޯޓް ދިނީ ހިތާމަވެރި ހަބަރެކެވެ. 2019 ވަނަ އަހަރުގެ ފަހުކޮޅު މުޅި ދުނިޔެއަށް ކޮވިޑްގެ ބަލިމަޑުކަން ކުރިމަތިވިއިރު ތައްޔާރު ނުވެވި އޮތް ފަދައިން، ގައުމުތަކުގެ ސަރުކާރުތަކުން އާ ބަލިމަޑުކަމަކަށް ތައްޔާރު ނޫން ކަމަށް އެ ރިޕޯޓްގައި ބުނެފައިވެއެވެ.

ޖުލައި 2020 ގައި އެކުލަވާލި އިންޑިޕެންޑަންޓް ޕެނަލް ފޮރ ޕެންޑަމިކް ޕްރެޕެއާޑްނަސް އެންޑް ރެސްޕޯންސްއިން ވަނީ، ގައުމުގެ ސިޔާސީ ލީޑާޝިޕާއި، މާލީ އަދި ސާވޭލަންސް ނިޒާމްތައް ހަރުދަނާ ކުރުމަށް އަޅަން ފެންނަ ފިޔަވަޅުތައް ބަޔާންކޮށް، މިދިޔަ އަހަރުވެސް އިރުޝާދުތަކެއް ދީފައެވެ. ނަމަވެސް އޭގެ ފަހުންވެސް އެކަން ކަމަށް މާބޮޑު ބަދަލެއް އައިސްފައި ވާތީއެއް ނުފެނެއެވެ.

ޑަބްލިއުއެޗްއޯއިން އާންމު ކުރި ރިޕޯޓްގެ އިސް މުސައްނިފުން ކަމުގައި ވާ ނިއުޒީލަންޑްގެ ކުރީގެ ބޮޑުވަޒީރު ހެލެން ކްލާކްއާއި ލައިބީރިއާގެ ކުރީގެ ރައީސް އެލެން ޖޯންސަން ވިދާޅުވީ، ބަލިމަޑުކަމަކުން ދިފާއު ހޯދުމަށް މަސައްކަތް ފަށާފައިވާ ކަމަށާއި، ނަމަވެސް މިހާރު އެކަން ބާރު ދުވެއްޔެއްގައި އަމާޒަށް ވާސިލުވުމަށް އެތައް އަހަރެއް ހޭދަ ވާނެ ކަމަށެވެ.

ބޮޑު ބަލިމަޑުކަމެއް ފެތުރިގެން ހިނގައިދާނެ ހާލަތަކަށް ދުނިޔެ އޮތީ ތައްޔާރު ނުވެކަމުގެ ނުރައްކާ އިންޒާރު، ރިޕޯޓްގައި ދީފައިވެއެވެ.

އިންސާފުވެރި އުސޫލަކުން ވެކްސިން ފޯރުކޮށްދެވެމުން ނިދިޔުމަކީ އެކަމަކުން އަރައިގަތުމަށް އެންމެ ދަތި ހުރަސް ކަމަށް ދިރާސާގެ މުސައްނިފުން ވަނީ ފާހަގަ ކުރައްވާފައެވެ. ކޮންޓްރޯލެއް ނެތި ބަލިމަޑުކަން ފެތުރިގެން ދިއުމަކީ އެ ބަލީގެ އާ ވޭރިއަންޓްތައް އުފެދުމުގެ ފުރުސަތު ތަނަވަސް ކުރާ ކަމަކަށްވާއިރު، ޕެނަލްގެ ރިޕޯޓްގައިވެސް އެކަން ވަނީ ފާހަގަކޮށްފައެވެ. ދަށް ފަންތީގެ އާމްދަނީ ލިބޭ ގައުމުތަކަށް ބަލާއިރު އާބާދީގައި ވެކްސިން ފުރިހަމަ ކޮށްފައި ވަނީ 13 ޕަސެންޓަށް ވުރެވެސް މަދު އަދަދެއްގެ ބައެއްކަން ރިޕޯޓްގައި ފާހަގަ ކޮށްފައިވެއެވެ.

ކަން މިހެން އޮތްއިރު ޖަރުމަނުވިލާތުން ވަނީ އާ ވޭރިއަންޓަކަށް ބިރުން، އިތުރު ވެކްސިން ޑޯޒްތައް ގަންނަން ނިންމާފައެވެ. ނަމަވެސް މިހާރު ވެކްސިން އުފައްދަމުން ދަނީ އުފެއްދެން އޮތް އެންމެ މަތީ މިންވަރަށް ކަން ޕެނަލުން ވަނީ ފާހަގަކޮށްފައެވެ. އަދި އުފެއްދުންތެރިކަން އިތުރު ކުރުމަކީ ވަގުތު ނަގާ ކަމެއް ކަންވެސް ވަނީ ފާހަގަކޮށްފައެވެ.

ދުނިޔޭގެ އެންމެ ނުފޫޒުގަދަ ގައުމުގެ ގޮތުގައި އޮތް އެމެރިކާއިން ހުސްވި ހަފުތާގައި ކޮވިޑް-19 ވާޗުއަލް ސަމިޓްގެ 2 ވަނަ ބައްދަލުވުން ކުރިއަށް ގެންދިޔަ ނަމަވެސް، "ހިލޭ ސާބަހަށް އެހީވުމުގެ" އުސޫލުން އަމަލު ކުރުމަކީ، ކުރިއަށް އޮތް ތަނުގައި ބަލިމަޑުކަމަކަށް ތައްޔާރުވުން ނޫން ކަމަށްވެސް ޑަބްލިއުއެޗްއޯގެ ރިޕޯޓްގައި ވަނީ ފާހަގަކޮށްފައެވެ.