ލަންކާގައި ބޭރުފައިސާ ގެންގުޅޭ މީހުންނާމެދު ފިޔަވަޅު އަޅަނީ
19 މެއި 2022 | ބުރާސްފަތި 08:51ތިން މަހަށް ވުރެ ގިނަ ދުވަހު ބޭރުފައިސާ އަތުގައި ބަހައްޓާ މީހުންނާމެދު ފިޔަވަޅުއަޅަން ވަނީ ނިންމާފައި
ލަންކާގެ އިގްތިސާދުގެ ގޯސްވެ އެގައުމަށް ވަނީ ބޭރުފައިސާ ލިބުމުގައި ދަތިތަކާ ކުރިމަތިލާންޖެހިފައި
ލަންކާގައި ބޭރުފައިސާ ބޭންކަށް ޑިޕޮސިޓް ނުކޮށް ގެންގުޅޭ މީހުންނާމެދު ފިޔަވަޅުއަޅަން ނިންމައިފިއެވެ.
ލަންކާގެ ސެންޓްރަލް ބޭންކްގެ ގަވަރުނަރު ނަންދަލަލް ވީރަސިންގހަ ވަނީ އެގައުމުގައި މީހުންނަށް އެއްފަހަރާ ފޮރުވައިގެން ގެންގުޅެވޭނެ ބޭރުފައިސާގެ އަދަދު 15،000 ޑޮލަރުން 10،000 ޑޮލަރަށް ދަށްކޮށްފައިވާކަން ބުރާސްފަތި ދުވަހު އިއުލާނުކުރައްވާފައެވެ.
ގަވަރުނަރު ވަނީ ތިން މަހަށް ވުރެ ގިނަ ދުވަހު ބޭރުފައިސާ އަތުގައި ބަހައްޓާ މީހުންނާމެދު ފިޔަވަޅުއަޅަން ނިންމާފައިވާކަމަށްވެސް ވިދާޅުވެފައެވެ.
އެގޮތުން ބޭރުފައިސާ ގެންގުޅޭ މީހުންނަށް ގްރޭސް ޕީރިއަޑެއް ދެވޭނެ ކަމަށާއި އެ ދުވަސްތައް ހަމަވުމުން އެފައިސާ ބޭންކަން ޑިޕޮސިޓްކުރަން ޖެހޭނެ ކަމަށް ގަވަރުނަރު ވިދާޅުވިއެވެ. ގަވަރުނަރު ވަނީ ބޭންކަށް ޑިޕޮސިޓް ނުކޮށް އަތުގައި ބޭރުފައިސާ ބަހައްޓާނަމަ ލަންކާގެ ފޮރިން އެކްސްޗޭންޖް ގާނޫނުގެ ދަށުން ގަވައިދާ ހިލާފަށް އަތުގައި ބަހައްޓާފައިވާ ފައިސާ ދައުލަތަށް ނެގޭނެ ކަމަށް ވިދާޅުވެފައެވެ.
ދާދިފަހުން މިފަދަ ދެ ހާދިސާއެއް ހިނގާފައިވާކަމަށް ވަނީ ރިޕޯޓުކޮށްފައެވެ.
ލަންކާގެ ފުލުހުންނާއި ސެންޓްރަލް ބޭންކްގެ އޮފިޝަލުން ގުޅިގެން އާންމުންގެ ބޭރުފައިސާ ނެގުމުގެ މަސައްކަތްކުރާ ކަމަށް ލަންކާގެ ނޫހެއްގައި ރިޕޯޓުކޮށްފައިވާއިރު، އެގައުމުގައި ގިނަ އަދަދެއްގެ ބަޔަކު ދަނީ ގޭއްގޭގައާއި ބޭންކް ވައުލްޓްސްތަކުގައި ބޭރުފައިސާ ފޮރުވާފައި ބަހައްޓަމުން ކަމަށް ގަވަރުނަރު ވިދާޅުވިއެވެ.
