ޕެރިސް ސެއިންޓް ޖާމެއިން (ޕީއެސްޖީ) އަށް ކުޅެމުން އަންނަ މާކޯ ވެރާޓީގެ މުސްތަގުބަލާއިމެދު ގޮތެއް ނިންމާނީ ކްލަބުންކަމަށް އޭނާ ބުނެފިއެވެ.

ވެރާޓީ އޭނާގެ މުސްތަގުބަލާއި މެދު ގޮތެއް ނިންމުމަށް ކްލަބާއެކު މަޝްވަރާތައް ކުރަމުން އަންނަ ކަމަށެވެ. ނަމަވެސް ހަގީގަތުގައި އޭނާ ކްލަބާއި މަޝްވަރާ ކުރަން ބޭނުންވެސް ނުވާކަން ފާހަގަކޮށް ވެރާޓީ ބުނީ އޭނާގެ ކޮންޓްރެކްޓް އައުކުރާނެތޯ ނުވަތަ ނޫންތޯ ނިންމާނީ ކްލަބުގެ ބޯޑުން ކަމަށެވެ. އަދި ކްލަބުން ކޮންމެ ގޮތަކަށް ނިންމި ނަމަވެސް ކްލަބާއި މެދުގައި އެއްވެސް ހިތަހަމަ ނުޖެހުމެއް ނޯންނާނެ ކަމަށާއި، އެނިންމުމަށް އިހްތިރާމް ކުރާނެ ކަމަށްވެސް އޭނާ ބުންޏެވެ.

ޕީއެސްޖީގެ މެދުތެރެއަށް ކުޅެމުން އަންނަ ވެރާޓީ އެޓީމާއި ގުޅުނީ 2012 ވަނަ އަހަރުއެވެ. އޭގެ ފަހުން އެޓީމަށް 246 މެޗު ކުޅެދީ ހަތް ލަނޑު ވެރާޓީ ޖަހާފައިވެއެވެ.

ޕީއެސްޖީއާއެކު ވެރާޓީ ހަދާފައިވާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުއެވެ. ވެރާޓީގެ ކޮންޓްރެކްޓާއި މެދު ވަކި ގޮތެއް ނިންމާފައި ނުވާއިރު، ޕީއެސްޖީން ވަނީ މެންޗެސްޓަރ ޔުނައިޓެޑަށް ކުޅެމުން އަންނަ ޕައުލް ޕޮގްބާ ހޯދުމަށްވެސް މަސައްކަތް ކޮށްފައެވެ. ނަމަވެސް ޕޮގްބާ ދިއުން ގާތީ އޭނާ ކުރިން ކުޅުނު އިޓަލީގެ ޔުވެންޓަސްއަށެވެ.