މެންދުރުފަހު ބޯކޮށް ވާރޭވެހި ކުޅުދުއްފުށި ސިޓީގެ ބައެއް ސަރަހައްދުތަކުގައި ފެންބޮޑުވެއްޖެއެވެ.

ބައެއް ސަރަހައްދުތަކުގައި ފޫޓަކަށް ފެންބޮޑުވެފައިވާއިރު ބައެއްގޭގޭގައިވެސް ވަނީ ފެންބޮޑުވެފައެވެ.

ކުޅުދުއްފުށި ސިޓީ ކައުންސިލުން ބުނީ ބައެއް ގޭގެއަށް ފެންވަދެގެން ރިޕޯރޓް ކުރަމުންދާކަމަށާއި، 1 ގޭގައި މީހުން ދިރިނޫޅެވޭވަރަށް ފެންބޮޑުވެގެން މީހުން ބަދަލުކޮށްފައިވާކަމަށެވެ. އެމީހުން ބަދަލުކޮށްފައިވަނީ އާއިލާގެ އެހެން ގެއަކަށް ކަމަށް ކައުންސިލުން ބުނެއެވެ. ވިއްސާރަޔާގުޅިގެން ކުޅުދުއްފުށި ސިޓީ ކައުންސިލްގެ އިމަރޖެންސީ އޮޕަރޭޝަން ސެންޓަރގެ މަސައްކަތް ވެސް ފަށާފައިވާކަމަށް ކައުންސިލުން މައުލޫމާތުދެއްވައެވެ.

ކުޅުދުއްފުށި ސިޓީގެ ބައެއް ގޭގޭގަޔާއި ބައެއް ސަރަހައްދުތަކުގައި ފެންބޮޑުވެ ގެއްލުން ވަމުންދާތީ އިމަރޖެންސީ އޮޕަރޭޝަން ސެންޓަރުންދަނީ ލިބުނު ގެއްލުން ބަލަމުންކަމަށް ކައުންސިލުން މައުލޫމާތުދެއެވެ.

ކުޅުދުއްފުށި ސިޓީއަށް ކުރަމުންދާ ވިއްސާރައިގައި، އެހީތެރިކަން ބޭނުންވާ ފަރާތްތަކަށް އެމަޖެންސީ އޮޕަރޭޝަން ސެންޓަރުން އެހީތެރިކަން ފޯރުކޮށްދިނުމުގައި ހަރަކާތްތެރިވަމުންދާއިރު، މިފަދަ އެހީއެއް ބޭނުންވާ ފަރާތްތަކުން އެސެންޓަރުގެ ހޮޓްލައިން ނަންބަރ 6527173 ނަންބަރަށް ގުޅުއްވުމަށް ކައުންސިލުން އިލްތިމާސްކުރެއެވެ. އަދި ހާލަތު ހަމަޔަކަށް އެޅެންދެން އެ ސެންޓަރުން ޚިދުމަތް ދެމުންދާނެކަމަށް ބުނެފައިވެއެވެ.

ސިޓީ ކައުންސިލުން އިތުރަށް ބުނީ، ކުޅުދުއްފުއްޓަށް ކުރަމުންދާ ގަދަ ވިއްސާރައިގައި ރަށުގެ ގިނަ މަގުތަކެއްގައި ފެންބޮޑުވެފައިވާއިރު، ރަށުގެ ގިނަ ސަރަހައްދުތަކަކުން ޕަންޕު ބަހައްޓައިގެން ފެންހިންދުމުގެ މަސައްކަތް ކުރަމުންދާކަމަށެވެ.

މި މަސައްކަތުގައި ދިވެހި ރެޑް ކްރެސެންޓް، މޯލްޑިވްސް ނޭޝަނަލް ކެޑޭޓް ކޯޕްސް، ކުޅުދުއްފުށި ޕަބްލިކް ވޯރކްސް އަދި ކުޅުދުއްފުށީ ޕޮލިސް ސްޓޭޝަންގެ ފަރާތުން ލިބެމުންދާ އެހީތެރިކަމަށް ސިޓީ ކައުންސިލުން ޝުކުރުއަދާކުރެއެވެ.

2021 ވަނަ އަހަރުވެސް ވިއްސާރަވެ ފެންބޮޑުވެގެން ކުޅުދުއްފުއްޓަށް ބޮޑެތި ގެއްލުންތަކެއްވަނީ ލިބިފައެވެ.