ޖަރުމަނުގެ ބުންޑަސް ލީގާގެ މޮޅު ކުޅުންތެރިޔާކަމުގެ މަގާމު އާރުބީ ލެއިޕްޒިގްގެ ކްރިސްޓޮފާ އެންކުންކޫ ހޯދައިފިއެވެ.

އުމުރުން 24 އަހަރުގެ އެންކުންކޫ މި މަގާމު ހޯދީ ބަޔާން މިއުނިކްގެ ރޮބާޓް ލެވަންޑޯސްކީ އާއި ޑޯޓްމަންޑުގެ އާލިން ބްރައުޓް ހާލަންޑާ ވާދަކޮށެވެ. ލެއިޕްޒިގްގައި އޭނާ މި ސީޒަންގައި މޮޅު ކުލުމެއް ދައްކާފައިވެއެވެ. އޭނާ ވަނީ ޖަރުމަނު ލީގުގެ ޕްލެޔާ އޮފް ދަ މަންތް ހަަތަރު ފަހަރެއްގެ މަތިން ހޯދާފައެވެ.

މި ސީޒަނުގައި އޭނާ ވަނީ ލެއިޕްޒިގާއެކު 34 މެޗު ކުޅެފައެވެ. އަދި އޭނާ ވަނީ އެ ޓީމަށް 20 ގޯލު ޖަހައިދީ، 13 އެސިސްޓު ހަދާފައެވެ. މި ސީޒަން ލެއިޕްޒިގް ނިންމާލީ ލީގުގެ ހަތަރު ވަނަ މަގާމުގައި އޮވެއެވެ. އެއީ 34 މެޗުން 58 ޕޮއިންޓު ހޯދައިގެންނެވެ.

ލެއިޕްޒިގާއެކު އޭނާ މިހާތަނަށް ވަނީ 94 މެޗު ކުޅެފައެވެ. އަަދި އޭނާ ވަނީ އެ ޓީމަށް ޖުމުލަ 31 ލަނޑު ޖަހައިދީފައެެވެ. 2019 ވަނަ އަހަރުގެ ތެރޭގައި އޭނާ ލެއިޕްޒިގަށް ބަދަލުވީ ފްރާންސްގެ ޕެރިސް ސެއިންޓު ޖާމަން (ޕީއެސްޖީ)ގައި ހުރުމަށްފަހުއެވެ.

އެންކުންކޫ ވަނީ ދާދި ފަހުން ފްރާންސްގެ ގައުމީ ސްކޮޑުގައި ވެސް ހިމަނާފައެވެ. މިދިޔަ މާޗު މަހު ފްރާންސުން ކުޅުނު ރަހުމަތްތެރިކަމުގެ މެޗަށް ކޯޗު ވަނީ އޭނާ ގައުމީ ޓީމުގައި ހިމަނާފައެވެ. ގައުމީ ޓީމަށް އޭނާ ވަނީ މިހާތަނަށް ދެ މެޗު ކުޅެދީފައެވެ.