ފަހު ވަގުތު ލާޒިއޯއާއި ޔުވެންޓަސް އެއްވަރުވެއްޖެ

އިޓާލިއަން ލީގުގައި ރޭ ޔުވެންޓަސް އާއި ލާޒިޔޯ ބައްދަލުކުރި މެޗު ފަހު ވަގުތުގައި އެއްވަރުވެގެން ނިމިއްޖެއެވެ.

ރޭގެ މެޗަކީ ޔުވެންޓަސް ކުޅެމުން އަންނަ އާޖެންޓީނާގެ ޕައުލޯ ޑީބާލާ އެ ޓީމުގެ ދަނޑުގައި ކުޅޭނެ ފަހު މެޗެވެ. މީގެ އިތުރުން އިޓަލީގެ ޖިއޮޖިއޯ ކިއެލީނީ ވެސް ޔުވެންޓަސްގެ ދަނޑުގައި ކުޅޭނެ ފަހު މެޗެވެ.

މެޗުގައި ފުރަތަމަ ލަނޑު ޖަހައި ލީޑު ނެގީ ވެސް ޔުވެންޓަސް އިންނެވެ. ޔުވެންޓަސްގެ ފުރަތަމަ ލަނޑު މެޗުގެ 10 ވަނަ މިނެޓުގައި ޖެހީ ޑޫސާން ވްލަހޯވިޗް އެވެ. އެ ޓީމުފެ ދެ ވަނަ ލަނޑު މެޗުގެ 36 ވަނަ މިނެޓުގައި ޖެހީ އަލްވާރޯ މޮރާޓާއެވެ.

ލާޒިއޯއަށް މެޗުގެ ނަތީޖާގެ ފަރަގު ކުޑަކޮށްދިން ލަނޑަކީ ޔުވެންޓަސްގެ އަލެކްސް ސަންޑްރޯ އަތުން ބައި ކޮޅަށް ވަތް ލަނޑެކެވެ. އެއީ ލާޒިއޯގެ ޕެޓްރިކް ބޮލުން ފޮނުވާލި ބޯޅައަށް ކުޅެން އުޅުމުގެ ތެރޭގައި އޭނާގެ ފައިގައި ޖެހިފައި ގޯލަށް ބޯޅަ ވަދެގެންނެވެ.

ލާޒިއޯއިން ދެ ވަނަ ލަނޑު ޖަހައި މެޗުގެ ނަތިޖާ ހަމަހަމަކޮށްފައިވަނީ އިތުރު ވަގުތުގެ ގޮތުގުގައި ދެއްކި 6 މިނެޓުގެ ތެރޭގައެވެ. އެ ލަނޑު ޖެހީ ލާޒޮއީގެ ސާގޭއި މިލިންކޮވިޗް-ސަވިޗްއެވެ. އެއީ އެ ޓީމުގެ ޓޯމާ ބަސިޗް ފޮނުވާލި ހަމަލާއެއް ޔުވެންޓަސްގެ ކީޕަރުގެ އަތުގައި ޖެހި ރީބައުންސަށް ނިކުން ބޯޅަ ގޯލަށް ފޮނުވާލައިގެން އޭނާ ޖެހި ލަނޑެކެވެ.

މެޗުން އެއްވަރުގެ ލިބުނު އެއް ޕޮއިންޓާއެކު ޔުވެންޓަސް އޮތީ 37 މެޗުން 70 ޕޮއިންޓު ހޯދައިގެން ތާވަލްގެ ހަތަރު ވަނަ މަޤާމުގައެވެ. ލާޒިއޯ އޮތީ 63 ޕޮއިންޓާއެކު ފަސް ވަނަ މަޤާމުގައެވެ.