މިރޭ 11:00ން މާދަމާ ފަތިހު 5:00ށް ލަންކާގައި ކާފިއު އިއުލާންކޮށްފި
މީގެ ކުރިން، މެއި 9 ވަނަ ދުވަހު ލަންކާގައި އިއުލާންކުރި ކާފިއު އުވާލާފައި ވަނީ އާދިއްތަ ދުވަހު
ލަންކާގައި އަނެއްކާވެސް ކާފިއު އިއުލާންކޮށްފި
ލަންކާގައި އަނެއްކާވެސް ކާފިއު އިއުލާންކޮށްފިއެވެ.
ލަންކާގެ ރައީސް އޮފީހާ ހަވާލާދީ އެގައުމުގެ ނޫސްތަކުން ރިޕޯޓުކޮށްފައިވާގޮތުން, ކާފިއު އިއުލާންކޮށްފައިވަނީ ހޯމަ ދުވަހުގެރޭ 11:00ން އަންގާރަ ދުވަހުގެ ފަތިހު 5:00ށެވެ.
ކާފިއު ވަގުތު ބޭރަށް ނުކުމެ އުޅެވޭނީ ޚާއްސަ ހުއްދައަކާއެކު ކަމަށް ރައީސް އޮފީހުން ބުނެއެވެ.
މީގެ ކުރިން، މެއި 9 ވަނަ ދުވަހު ލަންކާގައި އިއުލާންކުރި ކާފިއު އުވާލާފައިވަނީ އާދިއްތަ ދުވަހުއެވެ. މީޑިއާތަކުން ފާހަގަކުރާގޮތުގައި ލަންކާގެ ކާފިއު އުވާލާފައި ވަނީ ބުދިސްޓުންގެ ވެސަކް ފެސްޓިވަލާ ދިމާކޮށެވެ.
މެއި 9 ވަނަ ދުވަހު ލަންކާގައި ކާފިއު އިއުލާނުކުރީ، ލަންކާގެ ސަރުކާރަށް ވާގިވެރިވާ ފަރާތްތަކާ ސަރުކާރުގެ އިސްތިއުފާއަށް ގޮވާލާ މުޒާހަރާކުރަމުންދިޔަ މީހުންނާ ދެމެދު ހިނގި ހަމަނުޖެހުންތަކެއް ހޫނުވުމުންނެވެ. އޭރު ބޮޑުވަޒީރުކަމުގެ މަގާމުގައި ހުންނެވި މަހިންދަ ރާޖަޕަކްސަ ބޮޑުވަޒީރުކަމުގެ މަގާމުން އިސްތިއުފާދެއްވާފައި ވަނީވެސް މި ހަމަނުޖެހުންތަކުގެ ތެރޭގައެވެ.
ލަންކާ ސަރުކާރާ ދެކޮޅަށް ކުރަމުންދިޔަ ސުލްހަވެރި މުޒާހަރާތައް ހޫނުވެފައި ވަނީ މިދިޔަ ހަފުތާގައެވެ. މިދިޔަ ހަފުތާގެ ހަމަނުޖެހުންތަކުގައި 9 މީހުން މަރުވެ 300ށްވުރެ ގިނަ މީހުންނަށް އެކިވަރުގެ އަނިޔާ ލިބިފައިވާކަމަށް ރިޕޯޓުތައް ބުނެއެވެ.
މިދިޔަ ހަފުތާގެ ހަމަނުޖެހުންތަކާ ގުޅިގެން މިހާތަނަށް 300ށްވުރެ ގިނަ މީހުން ހައްޔަރުކޮށްފައިވާކަމަށް، އެގައުމުގެ ފުލުހުންނާ ހަވާލާދީ ރިޕޯޓުކޮށްފައިވެއެވެ.
