ޔުނައިޓެޑްގައި ރޮނާލްޑޯ ބަހައްޓަން ޓެން ހާގް ބޭނުންވޭ!
ރޮނާލްޑޯ ވަނީ މި ސީޒަންގައި ޔުނައިޓެޑަށް ކުޅެދިން 30 މެޗުގައި 18 ލަނޑު ޖަހާފައި
ކްރިސްޓިއާނޯ ރޮނާލްޑޯ އާއި އެރިކް ޓެން ހާގް
މެންޗެސްޓަރ ޔުނައިޓެޑްގައި ކްރިސްޓިއާނޯ ރޮނާލްޑޯ ބަހައްޓަން ބޭނުންވާކަމަށް އެޓީމުގެ ކޯޗުކަމާއި އަލަށް ހަވާލުވި އެރިކް ޓެން ހާގް ބުނެފިއެވެ.
ޓެންހާގްގެ ޕްލޭންގައި ރޮނާލްޑޯ ނުހިމެނޭ ކަމަށް މީގެ ކުރިން އަޑުތައް ފެތުރުނު ނަމަވެސް އޭނާގެ ފަރާތުން އެފަދަ އިޝާރާތެއް ކޮށްފައެއް ނުވެއެވެ. އަނެއްކޮޅުން ރޮނާލްޑޯ ވަނީ ޓެން ހާގް ބޭނުންވާ ބަދަލުތައް ގެނައުމަށް ފުރުސަތުދޭން ޖެހޭކަމަށް ދާދި ފަހުން ބުނެފައެވެ. ރޮނާލްޑޯ ބުނީ ޓީމު ވެއްޓިފައި މިއޮތް ހާލަތުން އަރައިގަތުމަށް ޓެން ހާގް ބޭނުންވާ ބަދަލުތައް ގެންނަން ފުރުސަތު ދޭން ޖެހޭ ކަމަށެވެ. ނަމަވެސް ޓީމު އަލުން ފޯމަކަށް އެޅުވުމަށްޓަކައި ވަގުތު ނަގާނެކަން ރޮނާލްޑޯ ފާހަގަކުރިއެވެ.
ރޮނާލްޑޯ ބުނީ ޓީމުގެ ކޯޗުކަމަށް ޓެން ހާގް ހަމަޖެއްސުމުން ކުޅުންތެރިއެއްގެ ހައިސިއްޔަތުން އަދި ސަޕޯޓަރެއްގެ ހައިސިއްޔަތުންވެސް އުފާކުރާ ކަމަށެވެ. އަދި އަޔެކްސްގައިވެސް ތަފާތު ދައްކާފައިވާ މި ކޯޗަށް ވަގުތު ދީފި ނަމަ ޓީމު އުފާކޮށްދޭނެ ކަމަށެވެ.
ރޮނާލްޑޯ އާއި ގުޅޭ ގޮތުން ޓެން ހާގް ބުނީ އެނާ ހުރީ ކުރިއަށް އޮތް ތަނުގައި ރޮނާލްޑޯއާއެކު މަސައްކަތް ކުރަން ތައްޔާރަށް ކަމަށެވެ. އަދި ޓީމުގައި ރޮނާލްޑޯ ބަހައްޓަން ބޭނުންވާ ކަމަށްވެސް ޓެން ހާގް ބުންޏެވެ. ރޮނާލްޑޯއަކީ އަދިވެސް ވަރަށް އުންމީދީ ކުޅުންތެރިއެއްކަން ފާހަގަކޮށް، މި ސީޒަންގައިވެސް ޓީމަށް މުހިންމު ދައުރެއް އަދާކޮށްދީފައިވާކަން ޓެން ހާގް ފާހަގަކުރިއެވެ. ރޮނާލްޑޯ ވަނީ މި ސީޒަންގައި ޔުނައިޓެޑަށް ކުޅެދިން 30 މެޗުގައި 18 ލަނޑު ޖަހާފައެވެ.
ޓެން ހާގް ބުނީ ޔުނައިޓެޑަށް ދިމާވެފައިވާ އުނދަގޫ ހާލަތުން އަރައިގަތުމަށް މަސައްކަތްް ކުރާނެ ގޮތެއް ޓީމާއެކު މަޝްވަރާކުރަމުން އަންނަކަން ފާހަގަކޮށް ދެފަރާތުގެ ޚިޔާލުވެސް ދިމާވާކަމަށް އޭނާ ބުންޏެވެ. ކުރިއަށް އޮތް ސަމަަރ ޓްރާންސްފަރގައި ޓީމަށް މުހިންމު ނިންމުންތައް ނިންމުމަށް ޓެން ހާގް މި ހަފްތާގައި ޔުނައިޓެޑަށް ދާނެއެވެ.
