ތ. އަތޮޅުގައި ފަތުރުވެރިކަން ފަހިކުރުމުގެ ގޮތުން 2 އެއަރޕޯޓް ތަރައްގީކުރުންވެސް މުހިންމު – މިނިސްޓަރު މައުސޫމް
ކަނިމީދޫ ވެސް ވީ އެންމެ އަވަހަކަށް ހުޅުވުން އެއީ މަގުސަދެއް
ޓުއަރިޒަމް މިނިސްޓަރު ޑރ. އަބްދުﷲ މައުސޫމް މަޖިލީހުގެ ޖަލްސާގައި
ތ. އަތޮޅަށް ފަތުރުވެރިކަން ފަހިކޮށް އޭގެ ފައިދާ ހޯދުމަށްޓަކައި، އެ އަތޮޅުގައި އޮތް ތިމަރަފުށީ އެއަރޕޯޓުގެ އިތުރުން ވިލުފުށީ އެއަރޕޯޓް ތަރައްގީކުރުން މުހިންމު ކަމަށް ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރު މައުސޫމް މިހެން ވިދާޅުވީ ހޯމަ ދުވަހުގެ މަޖިލީހުގެ ޖަލްސާގައި، ސަރުކާރުގެ މި ދައުރުގެ ތެރޭގައި ކަނިމީދޫ ތަރައްގީކުރެވިދާނެތޯ މެންބަރު ރިޔާޒު ސުވާލުކުރެއްވުމުން އެ ސުވާލަށް ޖަވާބު ދެއްވަމުންނެވެ. މިނިސްޓަރު މައުސޫމް ވިދާޅުވީ ސަރުކާރުން ބޭނުންވަނީ ވީހާވެސް އަވަހަކަށް އެރަށް ހުޅުވުމަށެވެ. އަދި އެހެން އަތޮޅުތަކުގައި ވެސް ފަތުރުވެރިކަން ތަރައްގީކުރުމަކީ ސަރުކާރުގެ ވިސްނުމެއް ކަމަށެވެ.
އަދި ތ. އަތޮޅުގައި ފަތުރުވެރިކަން ފަހިކުރުމުގެ ގޮތުން 2 އެއަރޕޯޓް ތަރައްގީ ކުރުން ވެސް މުހިންމު ކަމަށާއި، މިހާރު ތިމަރަފުށީގައި އެއަރޕޯޓް އެބައޮތް ކަމަށާއި، އޭގެ އިތުރަށް އެހެން އެއަޕޯޓެއް ހެދުން ވެސް މުހިންމު ކަމަށް މިނިސްޓަރު މައުސޫމް ވިދާޅުވިއެވެ.
މިނިސްޓަރު ވިދާޅުވީ ކަނިމީދޫ ވެސް ވީ އެންމެ އަވަހަކަށް ހުޅުވުން އެއީ މަގުސަދެއް ކަމަށެވެ. އަދި އިރާދަކުރެއްވިއްޔާ އެ މަގަށް މަސައްކަތް ކުރައްވަމުންދާ ކަމަށާއި، ސީދާ ތާރީހެއް ދަންނަވަން އެނގިވަޑައިނުގަންނަވާ ކަމަށެވެ. ސަބަބަކީ ބަޔަކާއެކު މަޝްވަރާގެ މަސައްކަތް މިނިސްޓްރީން ކުރިއަށް ގެންދާތިއާއި، އެ މަސައްކަތުގެ ތެރެއިން އެކަން ކާމިޔާބުވެއްޖެނަމަ ވަރަށް އަވަހަށް މަސައްކަތް ފަށައިގެން ކުރިއަށް ގެންދެވޭނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ކްރޮސް ސަބްސިޑީ މޮޑެލްގައި މިނިސްޓްރީން ކުރާ މަސައްކަތް ކާމިޔާބުވަނެކަމުގެ ކުލަވަރު އެބަފެނިވަޑައިގަންނަވާ ކަމަށާއި، އުއްމީދަކީ މެންބަރުގެ އުއްމީދުގައި ކުލަޖެހި ތ. އަތޮޅުގެ ރައްޔިތުންގެ ހުވަފެނުގައި ފަތުރުވެރިކަމުގެ ކުލަޖެހިގެން ދިއުން ކަމަށެވެ.
