ސިޓީ މޮޅެއްނުވި، ލިވަޕޫލަށް އުއްމީދެއް!

އިނގިރޭސި ޕްރިމިއަރ ލީގު ދިފާއުކުރުމާ ގާތުގައި އޮތް މެންޗެސްޓަރ ސިޓީއަށް ވެސްޓްހޭމް އަތުން މޮޅުނުވެވުމުން, ވާދަވެރި ލިވަޕޫލަށް އުއްމީދެއް ލިބިއްޖެއެވެ. ވެސްޓްހޭމްްއާ ދެކޮޅަށް ސިޓީ ނިކުތް އިރު ލިވަޕޫލާ ދެމެޗު އޮތީ ތިން ޕޮއިންޓްގެ ފަރަގެކެވެ. ވެސްޓްހޭމް އަތުން މޮޅުވެގެން ހަތަރު ޕޮއިންޓްގެ ފަރަޤެއް ލިބުނު ނަމަވެސް މެޗުގެ އަދަދު ހަމަކުރާއިރު އެފަރަޤު ޕޮއިންޓަކަށް ކުޑަކުރުމުގެ ފުރުޞަތު މިހާރު ލިވަޕޫލަށް އެބައޮތެވެ.

ވެސްޓްހޭމް އަތުން ސިޓީ ޕޮއިންޓަކުން ފަރުޖައްސާލަން ޖެހުނީ ފުރަތަމަ ދެލަނޑު ޖަހާ ވެސްޓްހޭމްއިން ކުރި ހޯދާފައިވަނިކޮށް ފަހަތުން އަރާ ދެ ލަނޑު ޖަހައިގެންނެވެ. ވެސްޓްހޭމްގެ ދެ ލަނޑުވެސް ފުރަތަމަ ހާފްގައި ޖެހީ ބޮވެންއެވެ. ސިޓީގެ ފުރަތަމަ ލަނޑު ދެވަނަ ހާފްގައި ޖެހީ ގްރީލިޝްއެވެ. ނަތީޖާ ހަމަހަމަވީ ވެސްޓްހޭމް ކުޅުންތެރިން އަތުން ބައިކޮޅަށް ވަން ލަނޑަކުންނެވެ. ލީޑް ހޯދަން ސިޓީއަށް ލިބުނު ރަނުގެ ފުރުޞަތު ބޭކާރުވީ ރިޔާދު މާރޭޒް އަތުން ޕެނަލްޓީ ބޭކާރުވުމުންނެވެ. މިއީ އޭރިޔާ ތެރެއިން ޖިސޫސްއަށް ކުރި ފައުލަކަށް ދިން ޕެނަލްޓީއެކެވެ.

މެޗުން މޮޅުނުވިޔަސް ލީގު ހޯދުމުގެ އަމިއްލަ ބާރު އަދިވެސް އޮތީ ސިޓީއަށެވެ. އެއީ ފަހު މެޗުގައި މިމަހުގެ 22 ވަނަ ދުވަހުގެރޭ އެސްޓަން ވިލާ ބަލިކޮށްގެންނެވެ. ލިވަޕޫލަށް މިހަފްތާގައި ސައުތްހެމްޓަން ބަލިކޮށްގެން ފަރަގު ޕޮއިންޓަކަށް ކުޑަކޮށް, ސިޓީއަށް ޕްރެޝަރެއް ދެވޭނެއެވެ. ލިވަޕޫލް ފަހު މެޗުގައި ވާދަކުރަން ޖެހޭނީ ވުލްވްސްއާއެވެ.