އިނގިރޭސި ޕްރިިމިއާ ލީގުގައި މިރޭ ވެސްޓް ހޭމް ޔުނައިޓެޑާއި މެންޗެސްޓާ ސިޓީ ބައްދަލުކުރި މެޗުގައި ވެސްޓް ހޭމްގެ ވްލަޑިމީރް ސޫފާލް އަތުން ބައިކޮޅަށް ވަން ލަނޑާއެކު ސިޓީ ސަލާމަތްވެއްޖެއެވެ.

ވެސްޓް ހޭމްގެ ދަނޑުގައި ކުޅުނު މި މެޗުގައި ލަނޑު ޖަހައި ފުރަތަމަ ލީޑު ނަގާފައިވަނީ ވެސް އެ ޓީމުންނެވެ. މެޗުގެ 24 ވަނަ މިނެޓުގައި އެ ޓީމުން ލީޑު ނަގާފައިވަނީ ޖެރޮޑް ބޮވެން ޖެހި ލަނޑުންނެވެ. އޭގެ ފަހުން ފުރަތަމަ ހާފު ނިމުމުގެ ކުރިން ބޮވެން ވަނީ އިތުރު ލަނޑެއް ޖަހައި އެ ޓީމަށް ލީޑު ފުޅާކޮށްދީފައެވެ.

ލީގު ރޭހުގެ އެއް ވަނަ މަގާމުގައި އޮތް ސިޓީއަށް މެޗުގައި އުންމީދެއް ގެނެސްދިނީ ޖެކް ގްރީލިޝްއެވެ. އޭނާ ލަނޑު ޖެހީ ދެ ވަނަ ހާފު ފަށައިގެން ހަަަތަރު ވަނަ މިނެޓުގެ ތެރޭގައެވެ. ސިޓީއަށް ނަތީޖާ ހަމަހަމަވި ލަނޑަކީ ވެސްޓް ހޭމްގެ ސޫފާލްގެ އަތުން ބައިކޮަޅަށް ވަން ލަނޑެކެވެ. މި ލަނޑު އޭނާގެ އަތުން ބައިކޮޅަށް ވަދެފައިވަނީ ސިޓީއަށް ލިބުނު ހިލޭ ޖެހުމެއްގައި ރިޔާދް މާރޭޒް ނަގައިދިން ބޯޅައަށް ކުޅެން އުޅުމުގެ ތެރޭގައި ބޮލުން ޖެހިއެވެ.

މެޗުން މޮޅުވެ ތިން ޕޮއިންޓު ހޯދުމަށް ސިޓީއަށްް ވަނީ ތަނަވަސް ފުރުސަތެއް ލިބިފައެވެ. މެޗުގެ 89 ވަނަ މިނެޓުގައި ސިޓީއަށް ލިބުނު ޕެނަލްޓީއެއް މާރޭޒް ފޮނުވާލި ނަމަވެސް، ވެސްޓް ހޭމްގެ ކީޕަރު ލޫކަސް ފަބިއާންސްކީ ވަނީ އެ ޕެނަލްޓީ މަތަކޮށްފައެވެ.

މެޗުން ލިބުނު އެއް ޕޮއިންޓާއެކު ލީގު ތާވަލްގެ އެއް ވަނައިގައި ސިޓީ އޮތީ 37 މެޗުން 90 ޕޮއިންޓު ހޯދައިގެންނެވެ. ސިޓީގެ ފަހަތުން ދެ ވަނައިގައި އޮތް ލިވަޕޫލަށް ލިބިފައިވަނީ 36 މެޗުން 86 ޕޮއިންޓެވެ.