"ފައްޔާޒްގެ ޗެއަރޕަރސަން ކަމުގައި އެމްޑީޕީއަށް އިތުރު ކާމިޔާބީ ހޯދައިދޭނެކަމާމެދު ޝައްކެއް ނުކުރަން"
ފައްޔާޒް އިންތިޚާބު ކާމިޔާބުކުރެެއްވީ 7000 އަށްވުރެ ގިނަ ވޯޓުގެ ތަފާތަކުން
އެމްޑީޕީން މާލެ ސިޓީގެ ރައްޔިތުންނާއެކު ބޭއްވި ބައްދަލުވުމުގެ ތެރެއިން
އިކޮނޮމިކް މިނިސްޓަރ ފައްޔާޒް އިސްމާއިލް އެމްޑީޕީގެ ޗެއަރޕަރސަންގެ މަގާމުގައި ހުންނަވައި އެމްޑީޕީއަށް އިތުރު ކާމިޔާބީތައް ހޯދައިދެއްވާނެކަމާއިމެދު ޝައްކެއް ނުކުރައްވާކަމަށް އެޕާޓީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހޮނިހިރު ދުވަހު ކުރިއަށްދިޔަ އެމްޑީޕީގެ ޗެއަރޕަރސަން އިންތިޚާބުގައި މާފަންނު އުތުރު ދާއިރާގެ މެމްބަރ އިމްތިޔާޒު ފަހުމީ (އިންތި) އާ ވާދަކުރައްވައި 7000 އަށްވުރެ ގިނަ ވޯޓުގެ ތަފާތަކުން އިންތިޚާބު ކާމިޔާބުކުރެއްވީ އިކޮނޮމިކް މިނިސްޓަރ ފައްޔާޒް އިސްމާއިލްއެވެ.
ފައްޔާޒް އިންތިޚާބު ކާމިޔާބުކުރެއްވުމުން އިންތި ވަނީ ފައްޔާޒްއަށް މަރުހަބާ ވިދާޅުވެ ޓްވީޓެއް ކުރައްވާފައެވެ. އަދި ދެގޮތެއްނުވެ ޕާޓީގައި ދެމިހުންނަވާނެ ކަމަށް އިންތި ވަނީ ވިދާޅުވެފައެވެ.
އިންތި ކުރެއްވި ޓްވީޓް ރީޓްވީޓް ކުރައްވައި ރައީސް ނަޝީދު ވަނީ މިނިސްޓަރ ފައްޔާޒްއަށާއި، ފައްޔާޒްގެ ކެމްޕޭން ޓީމަށް އަދި އިންތި އަށާއި އިންތިގެ ކެމްޕޭން ޓީމަށް މަރުހަބާ ވިދާޅުވެފައެވެ. އަދި ފައްޔާޒްގެ ޗެއަރޕަރސަން ކަމުގައި އެމްޑީޕީއަށް އިތުރު ކާމިޔާބީތައް ހޯދައިދެއްވާނެކަމަށް ޝައްކު ނުކުރައްވާކަމަށް ރައީސް ނަޝީދު ވިދާޅުވިއެވެ.
ފައްޔާޒް ވަނީ ރައީސް ނަޝީދުގެ ޓްވީޓު ރީޓްވީޓް ކުރައްވާފައެވެ. އަދި ރައީސް ނަޝީދުގެ ފުރިހަމަ އިރުޝާދުގެ ދަށުން ރާއްޖޭގެ ޑިމޮކްރެސީ މިގޮތުގައި ދަމަހައްޓައި ރާއްޖޭގެ ތަރައްގީއަށް މަސައްކަތްކުރައްވާނެ ކަމަށް ފައްޔާޒް ވަނީ ވިދާޅުވެފައެވެ.
މީގެ އިތުރުން އިންތިގެ ޓްވީޓަށް ޖަވާބުދެއްވައި ފައްޔާޒް ވަނީ އެމްޑީޕީ ސިޔާސީގޮތުން ފައްކާވެފައި އޮތް މިންވަރު މި ސިޔާސީ ހަރަކާތުން އެނގިލައްވާކަމަށް ވިދާޅުވެފައެވެ. ކުރިންވެސް ވިދާޅުވިހެން އިންތިޚާބަށްފަހު އެމްޑީޕީގެ ހުރިހާ މެމްބަރުން ތިބޭނީ އެއްކޮށް ކަމަށާއި، ޕާޓީ ދާނީ ކުރިއަށް ކަމަށް ފައްޔާޒް ވިދާޅުވިއެވެ.
އިންތިޚާބު ކާމިޔާބުކުރައްވައި ނޫސްވެރިންނާ ބައްދަލުކުރައްވައި ވާހަކަދައްކަވަމުން ފައްޔާޒް ވިދާޅުވީ އެމްޑީޕީގެ މެމްބަރުން ސަރުކާރާ ދޭތެރޭ ހިތްހަމަޖެހޭކަން މި އިންތިޚާބުގެ ނަތީޖާއިން ހާމަކޮށްދީފައިވާކަމަށެވެ. އަދި ރައީސް ޞާލިޙް އަށް އޮތް އިތުބާރު މިއިންތިޚާބުން ފެނިގެންގޮސްފިކަމަށާއި މިސަރުކާރު ވަރުގަދަކުރަން އާންމު މެމްބަރުން ބޭނުންވާކަން ފެނިގެންގޮސްފައިވާކަމަށް ފައްޔާޒު ވިދާޅުވިއެވެ.
